Aydın Hüseynov: “Avrasiyanın nəqliyyat xəritəsinin önəmli hissəsinə çevriləcək”
Bakı-Tiflis-Qars (BTQ) dəmir yolunun açılışı Avropa İttifaqı, Türkiyə, Gürcüstan, Azərbaycan və Mərkəzi Asiyanı birləşdirən nəqliyyat sistemi bağlantıları sahəsində atılan böyük addımdır. Bu barədə Avropa İttifaqının dəmir yolunun açılışı ilə bağlı yaydığı bəyanatda deyilir.
Avropa İttifaqı yeni dəmir yolu dəhlizini alqışlayır, bu, sərmayələr, infrastrukturun təkmilləşdirilməsi və logistikanın əlaqələndirilməsi ilə birgə bağlantıların daha yaxşı qurulmasına, yeni biznes imkanlarının yaranmasına, ticarətin artmasına səbəb olacaq.
Avropa İttifaqı hesab edir ki, Bakı-Tiflis-Qars dəmir yolunun açılışı Şərq Tərəfdaşlığı, eləcə də onun Mərkəzi Asiya strategiyasının mahiyyətinə uyğun məsələdir: “Aİ hər zaman qonşu tərəfdaş ölkələrlə bağlantıların yaxşılaşmasına yönələn layihələri dəstəkləyib. Türkiyə ilə Bolqarıstan, eləcə də Azərbaycanla Mərkəzi Asiya arasındakı nəqliyyat əlaqələrinin daha da yaxşılaşdırılması ilə bu layihə qədim İpək Yolu boyu Avropa ilə Asiya arasında quru ilə sürətli və etibarlı nəqliyyat bağlantısını təmin edəcək”.
Aİ enerji sahəsində sistemlərin oxşar bağlantısını təmin edəcək “Cənub Qaz Dəhlizi”ni də dəstəklədiyini bəyan edib.
Qeyd edək ki, BTQ-nin ümumi uzunluğu 826 kilometrdir. Birinci mərhələdə BTQ ilə ildə 1 mln. sərnişin və 6,5 mln. ton yük daşınacaq. Gələcəkdə isə illik yük axını 17 mln. tona, sərnişin axını 3 mln-a çatdırılacaq. Ümumilikdə BTQ-nin istifadəyə verilməsi yeni biznes imkanlarının yaranmasına, ticarətin artmasına nə kimi təsir göstərəcək?
Məsələyə münasibət bildirən millət vəkili Aydın Hüseynovun sözlərinə görə, BTQ-nin biznesin inkişafı, qarşılıqlı faydalı əməkdaşlıq üçün çox böyük əhəmiyyəti var: “Bu yol vasitəsilə birinci mərhələdə 5 milyon, ondan sonrakı mərhələdə 17 milyon, ondan sonra isə daha böyük həcmdə yüklərin daşınması nəzərdə tutulur. Bakı-Tiflis-Qars dəmir yolunda ilk səfərin reallaşması ilə “Orta dəhliz” layihəsinin ən önəmli mərhələsi başa çatdırılacaq. Beləliklə, Londondan Çinə birbaşa dəmir yolu xətti qurulacaq. Bölgədə geniş bir tranzit qovşağı yaranacaq, yükdaşınmaları geniş biznesin böyüməsinə imkan verəcək. Sərmayələr, infrastrukturun təkmilləşdirilməsi və logistikanın əlaqələndirilməsi ilə birgə bağlantıların daha yaxşı qurulmasına, yeni biznes imkanlarının yaranmasına və ticarətin artmasına səbəb olacaq. Yolun istifadəsi bölgədə əlavə biznes subyektlərinin fəaliyyətinə, iş yerlərinin yaradılmasına səbəb olacaq. BTQ Avrasiyanın nəqliyyat xəritəsinin önəmli hissəsinə çevriləcək. Asiyanı, Avropanı və Afrikanı bir-birilə birləşdirmək məqsədilə başladılan yeni “İpək Yolu” təşəbbüsü nəticəsində regionda siyasi cəhətdən sülh, təhlükəsizlik və sabitlik möhkəmlənəcək. Layihə sosial baxımdan rifah gətirəcək, yük və sərnişin daşınması ilə yanaşı, məlumat mübadiləsi ilə də ölkələrimizin qlobal inkişafına töhfə verəcək. BTQ-nin uğurlu fəaliyyəti Azərbaycanın regionda geosiyasi əhəmiyyətini artıracaq. Nəzərə alsaq ki, uzunluğu 850 kilometr olan polad magistralın 504 kilometri Azərbaycan ərazisindən keçir, onda ölkəmizin hansı strateji gücə malik olacağı məlumdur”.
Vidadi ORDAHALLI
