Davud Rəhimli: "Müəssisə rəhbərlərinin belə insanların işə götürülməsində maraqlı olmaması əsas problemlərdən biridir"
Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti tərəfindən əlilliyi olan şəxslərin məşğulluğunun təminatı işləri davam etdirilir. Bu ilin yanvar-iyun aylarında Xidmətin həyata keçirdiyi aktiv məşğulluq tədbirləri nəticəsində 260 nəfər əlilliyi olan şəxs münasib işlərlə təmin olunub.
Nazirlər Kabinetinin "Sosial müdafiəyə xüsusi ehtiyacı olan və işə düzəlməkdə çətinlik çəkən vətəndaşlar üçün kvota tətbiq edilməsi Qaydası" əsasında sosial müdafiəyə xüsusi ehtiyacı olan və işə düzəlməkdə çətinlik çəkən vətəndaşlar üçün idarə, müəssisə və təşkilatlarda kvota üzrə iş yerləri ayrılır. Əlilliyi olan şəxslər də həmin vətəndaşların kateqoriyasına aiddir və bu ilin 6 ayında Xidmət tərəfindən işlə təminatı həyata keçirilən əlilliyi olan şəxslərdən 89 nəfərinin kvota üzrə iş yerlərində məşğulluğu təmin olunub.
Bu il nazirliyin xətti ilə peşə hazırlığı və əlavə təhsil kurslarına cəlb edilənlər sırasında əlilliyi olan şəxslərin sayı isə 212 nəfər olub. Onlardan 62 nəfəri üçün nazirlik yanında Dövlət Məşğulluq Xidməti tərəfindən əmək bazarında tələb olunan peşələr üzrə peşə hazırlığı və əlavə təhsil kursları təşkil edilib. Qalan 150 nəfər isə nazirlik yanında Dövlət Sosial Müdafiə Fondunun 1 saylı Sağlamlıq İmkanları Məhdud Gənclərin Peşə Reabilitasiya Mərkəzində peşə hazırlığına cəlb olunub. Kursları bitirənlər peşə sertifikatları ilə təmin edilməklə, onların yeni yiyələndikləri peşələr üzrə məşğulluqlarının təmin olunması üçün də nazirliyin məşğulluq orqanları tərəfindən müvafiq işlər aparılıb.
Maraqlıdır, bəs ekspertlərin bu istiqamətdə görülən işlərə münasibəti necədir? Məsələyə münasibət bildirən Əlil Təşkilatları İttifaqının sədri Davud Rəhimlinin sözlərinə görə, əlilliyi olan şəxslərin işlə təmin olunması ilə bağlı müəyyən işlər görülsə də, bəzi problemlər hələ də qalmaqdadır: "Məlum olduğu kim, əlilliyi olan şəxslərin işlə təmin olunması ilə bağlı Nazirlər Kabinetinin müəyyən etdiyi kvota var. Müəssisələr hər il öz vakant iş yerləri barədə nazirliyin müvafiq strukturuna məlumat verirlər. Bunlar əvvəlcə məşğulluq mərkəzlərində qeydiyyata alınır, sonradan da müvafiq iş yerlərinə yönəldilir. Ancaq məsələ ondadır ki, əlilliyi olan şəxslərin işlə təmin olunmasında hələ də müəyyən problemlər var. Müəssisə rəhbərlərinin əlilliyi olan insanların işə götürülməsində maraqlı olmaması əsas problemlərdən biridir. Onlar zənn edirlər ki, bu onlar üçün müəyyən problemlər yarada bilər. Məsələ ondadır ki, əlilliyi olan şəxs işə götürüldükdə gərək iş yeri ona uyğunlaşdırılsın, əlçatanlığı təmin olunsun. Təəssüf ki, müəssisə rəhbərləri bir sıra hallarda buna getmir və bu şəraiti yaratmırlar. Baxmayaraq ki, kvota çərçivəsində müəyyən cərimələr də nəzərdə tutulub. Ancaq bu sistemin, mexanizmin özü işləmir. Ona görə də əlilliyi olan şəxslərin işlə təmin olunmasında problemlər yaşanır. Buna rəğmən, ötən 6 ayda 260 nəfər əlilliyi olan şəxsin işlə təmin olunması yaxşı haldır. Hesab edirəm ki, bu sayı daha da artırmaq lazımdır. İşəgötürənlərə müəyyən imtiyazlar verməklə bunu daha da stimullaşdırmaq olar".
Vidadi ORDAHALLI
