“Bu günə qədər bütün təşəbbüslərimiz, bütün planlarımız həyatda öz əksini tapıb. Elə bir təşəbbüs olmayıb ki, o, reallığa çevrilməsin”. Məlum olduğu kimi, bunu Prezident İlham Əliyev Azərbaycan Televiziyasına müsahibəsində deyib.
Dövlət başçısının sözlərinə görə, Azad İqtisadi Zonanın rəhbərliyi həm ölkə daxilində, həm də xaricdə müxtəlif tədbirlər keçirəcək: “Təqdimatlar keçirilməlidir, potensial investorlarla birbaşa təmaslar qurulmalıdır. Eyni zamanda, AİZ-in nümayəndələri müxtəlif ölkələrə ezam olunacaq, həmçinin, xaricdən potensial investorlar dəvət ediləcək. Bununla bərabər, mən indi bizim bütün xarici ölkələrdəki səfirliklərə göstəriş verirəm ki, öz təmasları əsnasında bu zonanın yaradılması ilə bağlı potensial investorlara məlumat versinlər. Beləliklə, bir ildən sonra - gələn ilin iyul ayında zona investorları qəbul etməyə hazır olacaq. Əminəm, biz görəcəyik ki, bax, burada göstərilən mənzərə həyatda öz əksini tapacaq. Çünki bu günə qədər bütün təşəbbüslərimiz, bütün planlarımız həyatda öz əksini tapıb. Elə bir təşəbbüs olmayıb ki, o, reallığa çevrilməsin. Ən çətin layihələr, transmilli layihələr, çox çətin geosiyasi vəziyyətdə həyata keçirdiyimiz layihələr uğurla başa çatıb. Bunları sadalamağa ehtiyac yoxdur, hər kəs bilir söhbət nədən gedir. Ona görə bu zonanın yaradılması, əminəm ki, uğurumuzun növbəti addımı olacaqdır”.
Bütün bunlar əminlik yaradır ki, Ələt qəsəbəsində yaradılan Azad İqtisadi Zona özünü doğruldacaq. Xarici sərmayədarları cəlb edə biləcək.
“Azərbaycanın əldə etdiyi ciddi nəticələr bunu diqtə edir”
Məsələyə münasibət bildirən ekspert Rəsul Cahangirli hesab edir ki, sözügedən məsələ ilə bağlı Prezidentin səsləndirdiyi fikirlər ciddi arqumentlərə söykənir: “Məsələ ondadır ki, Azərbaycan mürəkkəb geosiyasi məkanda yerləşsə də, böyük transmilli layihələrə imza atıb. Bununla bağlı imzalanan sazişlər kağız üzərində qalmayıb, hamısı reallaşıb. Baxmayaraq ki, zaman-zaman Cənubi Qafqazda böyük dövlətlərin maraqları toqquşub. Ancaq buna rəğmən, Azərbaycan Bakı-Tiflis-Ceyhan neft, Bakı-Tiflis-Ərzurum qaz kəmərlərini reallaşdırdı. Daha sonra Bakı-Tiflis-Qars dəmir yolu istismara verildi. TANAP, TAP layihələri hesabına Azərbaycan qazı Avropaya çıxarıldı. 90-cı illərdə bunların reallaşacağı xəyal kimi görünürdü. Bir çoxu bunu real hesab etmirdi, amma bu belə olmadı. Azərbaycan regionun mənzərəsini dəyişdi. Eyni zamanda, Azərbaycandan keçən Şimal-Cənub Nəqliyyat Dəhlizi işə düşmək üzrədir. Azərbaycan regionun mühüm nəqliyyat və logistika mərkəzinə çevrilir. O baxımdan, böyük transmilli layihələrə imza atan dövlətin uğurlu Azad İqtisadi Zona yaradacağı qaçılmazdır. Çünki Azərbaycanın əldə etdiyi ciddi nəticələr bunu diqtə edir”.
Ekspert onu da qeyd etdi ki, Azərbaycanın əldə etdiyi nailiyyətlər bu qənaətə gəlməyə əsas verir.
Vidadi ORDAHALLI
