“Azərbaycanda təhlükəsizlik təmin edilir. Azərbaycan dünyanın bəlkə də ən təhlükəsiz ölkələrindən biridir. İnvestorlar üçün bu amil də çox önəmlidir”.
Bunu Prezident İlham Əliyev Ələt Azad İqtisadi Zonasının təməlqoyma mərasimindən sonra Azərbaycan Televiziyasına müsahibəsində deyib.
Ölkə başçısının sözlərinə görə, Azərbaycanda çox gözəl sərmayə iqlimi var: “Biz bunu həm neft-qaz layihələrinin icrası zamanı nümayiş etdirmişik, həm də digər sahələrdə aparılan islahatlar nəticəsində çox gözəl investisiya iqlimi yaradılmışdır. Həmçinin, son illər ərzində Azərbaycanda çox güclü kadr potensialı yaradılıb.
Azərbaycanda mədəniyyətlərarası dialoq, dini tolerantlıq məsələləri dünya miqyasında artıq nümunə kimi göstərilir. Biz istəyirik ki, bütün dünya ölkələri buraya gəlsinlər və investisiya qoysunlar. Bu amil də çox önəmlidir. Digər tərəfdən, ölkəmizdə mövcud olan sabitlik hər bir investor üçün əsas şərtlərdən biridir. Sabitlik olmayan ölkələrə heç kim sərmayə qoymur. Bu, aksiomdur. Sərmayə qoyuluşu baxımından cəlbedici ölkələrin təcrübəsinə baxsanız, bunu görərsiniz. Bu gün Azərbaycana qoyulan və qoyulacaq sərmayələrin əsas şərtlərindən biri, bəlkə də birincisi ictimai-siyasi sabitlikdir, xalq-iqtidar arasındakı birlikdir”.
Görünən odur ki, sabitlik və təhlükəsizlik xarici investorların diqqət etdiyi ən vacib faktorlardan biridir. O da Azərbaycanda mövcuddur.
“İndi bununla bağlı hər hansı bir təhdid ölkədə mövcud deyil”
Məsələyə münasibət bildirən iqtisadçı-alim, professor Əli Əlirzayevin sözlərinə görə, Azərbaycanın bu cür üstünlüyə sahib olması çox önəmli amildir: “Xarici sərmayə axınlarında ölkədə sabitlik və təhlükəsizlik mühüm əhəmiyyət kəsb edir. Təhlükəsizliyin dayanıqlı olması növbəti illərdə də sərmayə cəlbi üçün münbit zəmin yaradır. Çünki xarici sərmayə hesabına tikilən müəssisələr 5-10 ildən sonra ciddi təhdidlə üzləşə bilər. Bütün bunlardan sığortalanmaq üçün ölkədə güclü təhlükəsizlik sistemi olmalıdır. O zaman xarici investorlar çəkinmədən sərmayə qoyacaqlar. Ona görə də kapitalı, əmlakı, vəsaiti qorumaq üçün birinci təminat sistemi olmalıdır. Bu da ölkədəki sabitlikdən asılıdır. Məsələ ondadır ki, ölkədə tez-tez hakimiyyət dəyişikliyi baş verirsə, qeyri-sabit vəziyyət hökm sürürsə, o zaman xarici sərmayə qaçır. Məsələn, 90-cı illərin ortalarına qədər Azərbaycana xarici sərmayədarlar maraq göstərmirdilər. Çünki Azərbaycanda müharibə gedirdi, ölkədə terror hadisələri baş verirdi və s. İndi bununla bağlı hər hansı bir təhdid ölkədə mövcud deyil. Təhlükəsizlik baxımından bütün məsələlər yüksək səviyyədə təmin edilir. Ona görə də xarici sərmayədarlar ölkəmizə maraq göstərirlər. Özü də təhlükəsizlik dünya standartlarına uyğun təmin olunub. Bu baxımdan, xarici investorlar üçün risq yoxdur. Varsa da, olduqca minimum səviyyədədir. Doxsanıncı illərdə biz Azad İqtisadi Zona yarada bilməzdik. Ancaq bu gün bunun üçün çox münbit zəmin var. Necə ki, dünya ölkələri bu kimi zonalarda xüsusi güzəştlər tətbiq edir, biz də bunu edəcəyik. Ona görə də ölkəyə xarici sərmayə gəlməlidir. İnvestisiyanın təşviqi təhlükəsizliklə bağlıdır. Bu bizdə var. İndi biz çalışmalıyıq ki, bununla bağlı qanunvericilik ən yüksək səviyyədə olsun”.
Professor hesab edir ki, bu sahədə müsbət gözləntilər var.
Vidadi ORDAHALLI
