Məlum olduğu kimi, Tarif Şurasının keçirdiyi növbəti iclasda “Elektrik enerjisinin ölkədaxili tariflərinin tənzimlənməsi barədə” 28 noyabr 2016-cı il tarixli qərara dəyişiklik olunub.
Dəyişikliyə əsasən, iyulun 1-dən elektrik enerjisinin 1 kVt/saat-nın qiyməti saat 08:00-dan 22:00-a qədər 7,3 qəpik, saat 22:00-dan 08:00-a qədər isə 3,5 qəpik müəyyən edilib. Bu tariflər enerji təchizatı birbaşa 35 və 110 kV-luq xətlərlə həyata keçirilən, gün ərzində yük tələbatı stabil olan, istehsal məqsədləri üçün orta aylıq enerji istehlakı 5 milyon kVts-dan az olmayan məlumatların emalı, qeydə alınması və ötürülməsi üzrə fəaliyyət göstərən məlumat mərkəzlərinə şamil olunur.
Bu tarifin əhaliyə və qərarda qeyd edilən fəaliyyətdən fərqli fəaliyyətlə məşğul olan qeyri-əhali abonentlərinə aidiyyəti yoxdur. Əhali kateqoriyası üzrə mövcud tariflərə hər hansı dəyişiklik edilməyib.
Ümumilikdə, işıq qiymətində bəzi sahələrdə gecə və gündüz tarifləri nə deməkdir? Gecə və gündüz qiymətləri niyə müxtəlifdir?
“Bu, elektrik enerjisindən daha qənaətlə istifadə etmək vərdişləri formalaşdıracaq”
Sözügedən məsələyə aydınlıq gətirən iqtisad üzrə fəlsəfə doktoru Firdovsi Şahbazov bununla bağlı bir sıra məqamlara toxundu: “Günün müxtəlif vaxtlarında fərqli tariflərin tətbiq olunması uzun illərdir dünya praktikasında mövcuddur. Özü də bu çox effektli bir yanaşmadır. Bunun mahiyyəti əsasən ondan ibarətdir ki, işin pik vaxtlarında elektrikə tələbat artdığı üçün qiymətlər yüksək olur. Günün digər saatlarında isə qiymətlər bundan aşağı olur. Bu cür qiymət tarifləri elektrik enerjisindən daha səmərəli istifadə etməyə şərait yaradır. Bunun sayəsində gecələr küçə və prospektləri işıqlandırmaq mümkün olacaq. Məlum aşağı qiymət tarifi imkan verəcək ki, sözügedən sahədə problemlər öz həllini tapsın. Hansı ki, bununla bağlı Azərbaycanda müəyyən problemlər var. Ümumilikdə, yeni tariflər elektrik enerjisindən daha qənaətlə istifadə etmək vərdişləri formalaşdıracaq. Nəzərə almaq lazımdır ki, saat 22:00-dan 08:00-a qədər istifadə ediləcək elektrik enerjisinin qiyməti 2 dəfə aşağı salınacaq. Bu, kiçik rəqəm deyil”.
Bir sözlə, ekspert yeni tariflərin tətbiqinin zərurətdən irəli gəldiyini qeyd etdi.
Vidadi ORDAHALLI
