Belə bir başlıqla erməni saytlarından biri çox maraqlı yazı dərc edib. Yazıda bildirildiyinə görə, şənbə günü Ermənistan parlamenti ali orqanının toplantısı keçirilib və toplantıya müdafiə naziri Seyran Ohanyan da dəvət olunub. Əslində müdafiə nazirinin belə bir dönəmdə ölkıədı taleyüklü məsələlərin həllilə bağlı istənilən toplantıya dəvət olunması qeyri-adi hadisə deyil. İndiki halda isə qeyri-adi məqam toplantının ardından jurnalistlər üçün ənənəvi brifinqin keçirilməməsi sayılır. Beləliklə də parlament suallardan yayınıb. Parlamentin fraksiya rəhbəri isə yalnız onu deməklə kifayətlənib ki, müdafiə naziri sərhəddəki situasiya ilə bağlı məlumat verib.
Saytın yazdığına görə, Seyran Ohanyanın önəmli məsələlərlə bağlı ətrafına açıqlama verən biri olmadığı nəzərə alınarsa, onun parlamentdə nələri açıqlayacağı həm maraqlı, həm də gözlənilməzdir. Daha maraqlı olanı isə bu yazı ilə saytın əslində Ermənistanda baş verənləri aşkara çıxarmasıdır. Sən demə, dördgünlük müharibə zamanı bu ölkənin parlamenti "ağzına su alıb” oturub. Ölkə parlamentinin bu boyda hadisəyə reaksiya verməməsi isə ölkədə böyük narazılıq yaradıb və onun reytinqini yerlə bir edib. Müdafiə nazirinə gəldikdə isə, bildirilir ki, bu kontekstdə kütlədə onun özündən də böyük narazılıq var . Belə ki, həmin günlərdə cəbhədə nə baş verdiyi barədə ictimaiyyətə geniş açıqlama verməyib. Yalnız bir neçə bəyanatla kifayətlənib ki, onlar da ya təsdiqini tapmayıb, ya da bir-birini təkzib edib. Yəni tipik erməni manevri...
Sayt yazır ki, hazırda ölkənin yuxarı eşelonlarında, xüsusilə müdafiə strukturlarında və siyasi rəhbərlikdə bir çaşqınlıq hiss olunur və bu çaşqınlıq ondan xəbər verir ki, siyasi xətdə vahid mövqe yoxdur. Bunu isə sayt onunla əsaslandırır ki, erməni tərəfi dördgünlük müharibədə itirdiyi mövqeləri geri alacaqları barədə ard-arda gurultulu bəyanatlar versə də, "müəmmalı şəkildə qəfil səsini qısmalı olub” və son situasiyaya hətta bəyanat formasında da etiraz etməyib. Bu hadisənin ardından kütləni coşduran da elə bu məsələlərdir və görünür ki, bir sıra sualları açıq qalıb. Sayt bu suallardan bəzilərini də sıralayır və bildirir ki, dördgünlük müharibə ölkənin müdafiəsinə ayrılan pulların təyinatı üzrə xərclənmədiyini ortaya çıxarıb. Həmin günlərdə kəşfiyyat işləməyib, mövqelər arasında radioəlaqə sıfır səviyyəsində olub və əsgərlər ən elementar vasitələrin yoxluğundan əziyyət çəkib. Necə deyərlər, əlavə şərhə ehtiyac yoxdur.
Məsələ burasındadır ki, ölkədə narazılıqların artması fonunda istər ölkə rəhbərliyinin, istərsə də hakimiyyətin digər qolu olan parlamentin situasiyanın yumşaldılmasına hesablanmış heç bir addım atmaması onun sonunu gözlənildiyindən daha tez gətirmək iqtidarındadır. Artıq bu ölkənin mətbuatında yer alan xəbərlərlə kütlədə narazılığın get-gedə artdığı müşahidə olunmaqdadır. Bu narazılığı körükləyən əsas məsələlər isə hələ də əhalinin adam yerinə qoyulmaması və onlara baş verənlərin izahının verilməməsidir. Nəzərə alınsa ki, artıq ölkə miqyasında Ermənistan vətəndaşlarının Qarabağ üçün ölmək istəməməsi tentensiyaları artır, qarabağlı ölkə rəhbərliyinin sonunun çox yaxında olduğu şübhə doğurmur.
Bu dediklərimizi saytın sonda qoyduğu bir ehtimal daha da möhkəmləndirir: "Yəqin müdafiə nazirini parlamentə çağırmaqda məqsəd, hakimiyyətdə parçalanma baş verərsə, onun kimin tərəfində qalacağını aydınlaşdırmaqdır”...
Samirə SƏFƏROVA
