Azərbaycan Respublikasının Prezidenti İlham Əliyevə, Baş prokuror Zakir Qaralova, Daxili işlər naziri Ramil Usubova açıq məktubla müraciət edən Rövşən Məhərrəmov məktubunda yazır: "Möhtərəm Prezident, cənab Baş prokuror və cənab Daxili işlər naziri!
Sizə dələduzluğun qurbanı olmuş, ailəsi ac qalmış, öz sadəlövhlüyü nəticəsində qohumlarını da birisinin dələduzluq əməllərinə qurban vermiş bir çarəsiz Azərbaycan vətəndaşı kimi müraciət edirəm.
Mən və yaxınlarım Qədim Ədilov adlı bir şəxsin aldatma və dələduzluq əməllərinin qurbanı olmuşuq. Bütün dövlət orqanlarına rəsmi şikayət etməyimizə, məktub göndərməyimizə baxmayaraq, o hələ də cəzasız qalır.
Son vaxtlar saytlarda özünü MTN-in qurbanı kimi qələmə verib "yazıqlanan" Qədim Ədilovun müsahibələrini oxuduqca insanın nə qədər ədalətsiz ola biləcəyi haqda təsəvvürlərim dəyişir. İndiyə qədər bir mənzili iki-üç şəxsə satan mənzil kooperativləri haqda hamı eşitmişdi. Lakin Qədim Ədilov 2014-cü ildən başlayaraq Keşlə dəmiryolu stansiyasında bir vaqon taxta üçün 4-5 sahibkardan pul alır, sonra səhər tezdən kim tez gəlib çıxsa, kim daha çox səs-küy salsa, malı həmin adama verir, qalanlarına - sənə bundan sonra gələn vaqonu verəcəm deyirdi. Bu minvalla Qədim Ədilov onlarla sahibkardan aldatma yolu ilə milyon yarım dollardan artıq pul ələ keçirib və bu pulu vermək fikri də yoxdur. 2015-ci ilin iyul-avqust-sentyabr aylarında 8 nəfər sahibkar müvafiq orqanlara şikayət ərizəsi ilə müraciət edib. Onun haqqında cinayət işi açılsa da, Sabirabadda prokuror əvəzi işləyən əmisi oğlunun, Şirvanda polisdə və ədliyyədə işləyən qardaşlarının himayədarlığı sayəsində Qədim Ədilov hələ də həbs edilməyib. Mən şəxsən Rövşən Məhərrəmov Qədim Ədilova 160 767 dollar pul vermişəm. O cümlədən, sahibkar Xaləddin Yusibov mənim iştirakımla Qədim Ədilova 126 700 dollar və 50 000 dollar pul verib və əvəzində heç bir şey almayıb. Mən özüm Qədim Ədilovun, Məmməd və Sadiq Cəfərov qardaşlarının iki yüz min dollardan artıq pullarını necə aldığının şahidi olmuşam. Amma nədənsə, bütün şikayətlərimizə rəğmən, bu adam həbs olunmaq əvəzinə, bəzi saytlar tərəfindən az qala "milli qəhrəman" statusuna qaldırılıb.
Həm də mən onun digər dostlarından eşitmişəm ki, o, dələduz kimi ifşa olunmaqdan qorxaraq ölkədən qaçmağa hazırlaşır.
İndi bizim əlacımız ona qalıb ki, ya Qədim Ədilovun əməlləri sayəsində evsiz-eşiksiz və ac qalmış ailə üzvlərimizlə birlikdə Baş Prokurorluq qarşısında aksiya keçirək, ya da kollektiv şəkildə özümüzü yandıraq ki, bəlkə hüquq-mühafizə orqanlarımız bizim problemi ciddiyə ala. Bəli, mən ciddi deyirəm - əgər bu şəxs cəzasına çatdırılmasa, Baş Prokurorluq qarşısında özümüzü yandıracağıq".
Redaksiyadan: Qəzetimizin elektron poçtuna daxil olmuş bu şikayət məktubunu qarşı tərəfin fikrini öyrənmədən yalnız bir səbəbə görə ictimailəşdirməyə məcbur olduq. Bu da o dur ki, söhbət açıq-aşkar kollektiv intihardan gedir. Düşündük ki, bəlkə bu hadisəni dərhal ictimailəşdirməklə əsaslı olub-olmadığını hələ bilmədiyimiz hansısa intiharın, bədbəxtliyin qarşısını almaqda hüquq-mühafizə orqanlarına dəstək ola bilərik. Düşünürük ki, hüquq-mühafizə orqanları qaldırdığımız məsələyə həmişəki kimi həssas yanaşaraq, vətəndaşı intihara məcbur edən məsələnin əsl mahiyyətini aydınlaşdıracaq. Bununla belə, vətəndaş Rövşən Məhərrəmovun ittiham etdiyi şəxsin əleyhinə göstərilən iddiaların həqiqət olub-olmadığı barədə heç bir qəti söz demirik, bunun hüquq-mühafizə orqanlarının işi olduğunu qəbul edirik və Qədim Ədilovun da mövqeyini qəzetimizdə və baki-xeber.com saytında işıqlandırmağa hazır və borclu olduğumuzu bildiririk. Onu da qeyd edək ki, Rövşən Məhərrəmovun olduqca kəskin tonda yazdığı müraciətin müəyyən hissələrini ixtisar etmək və dəyişdirməklə çap etdik.
