Məhəmməd Əsədullazadə: “Rusiya bundan narahat və narazı olacaq”
Türkiyənin vitse-prezidenti Cövdət Yılmaz 36-cı NATO Dövlət və Hökumət Başçıları Zirvə Görüşü çərçivəsində NATO Konqresində keçirilən Müdafiə Sənayesi Forumunda çıxışı zamanı forumda və zirvə görüşündə yeni bir dövrə qədəm qoyduğunu deyib. O, “NATO 3.0" adlandırılan bu yeni dövrdə yükün Alyans daxilində daha ədalətli şəkildə bölüşdürüləcəyinə inandığını bildirib.
Yılmaz mövcud geosiyasi çətinliklər fonunda NATO daxilində daha güclü bir Avropa sütunu qurmağın zəruri olduğunu vurğulayıb. O, ötən il Haaqada qəbul edilən müdafiə xərclərinin artırılması qərarının əsasən bütün müttəfiqlər tərəfindən həyata keçirildiyini və müdafiə xərclərinə yanaşmanın kökündən dəyişdiyini qeyd edib.
“İndi qarşıda duran vəzifə bu artan müdafiə xərclərini maddi imkanlara çevirmək və bunun üçün lazımi sənaye istehsalı potensialını yaratmaqdır." Yılmaz istehsal güclərinin sürətlə və əlaqələndirilmiş şəkildə genişləndirilməsinin vacibliyi ilə bağlı qiymətləndirmə ilə razılaşdığını və bu kontekstdə Ruttenin tez-tez istifadə etdiyi "Texasdan Ankaraya" ifadəsinin son dərəcə mənalı olduğunu bildirib.
Vitse-prezident bildirib ki, "NATO-nun Avropa sütununa əhəmiyyətli töhfə verən Türkiyə, xüsusən də AB-nin Avropadakı bütün müdafiə və təhlükəsizlik təşəbbüslərində iştirak edə bilməlidir".
Türkiyənin bu istəyi, yəni Avropanın bütün müdafiə və təhlükəsizlik təşəbbüslərində iştirakçılıq imkanına malik olmaq niyyəti açıqlanıb və təbii ki, pis deyil. Ancaq bu baş verərsə Rusiya-Türkiyə münasibətləri necə olacaq?Türkiyə yəni Rusiyadan uzaqlaşmağa başlayır?
Politoloq Məhəmməd Əsədullazadə baki-xeber.com-a bildirdi ki, ümumiyyətlə, Rusiya ilə Türkiyə arasında heç bir yaxınlaşma olmayıb. “Tərəflər tarix boyu rəqib olublar. Müəyyən bir müddət ərzində təkcə Türkiyə Rusiya ilə bir çox məsələlərdə əməkdaşlıq edib və bu, Rusiya-Türkiyə yaxınlaşması kimi qiymətləndirilib. Lakin hazırkı müstəvidə Türkiyə NATO-nun, Qərb koalisiyasının üzvüdür. Amma bundan asılı olmayaraq Türkiyə müstəqil siyasət yürüdüb. Qeyd etdiyim kimi, hər birinin öz gündəliyi var. Ərdoğanın qəbul etdiyi siyasət bu müstəvidə olub, Türkiyə regional gücə çevrilib və indi beynəlxalq gücə çevrilməkdədir. Bu gün Türkiyənin Avropanı təhlükəsizliyinin təminatçısına çevrilməsi məsələsi artıq yeni dünya siyasi düzəninin təhlükəsizlik çağırışlarından irəli gəlir. Çünki Türkiyə güclü orduya malikdir, Avropanın da buna ehtiyacı var.
Düşünürəm ki, Rusiya bundan narahat və narazı olacaq. Onsuz da hazırda Rusiya ilə Türkiyə arasındakı münasibətlər yüksək səviyyədə deyil”.
M.Əsədullazadənin fikrincə, Rusiyanın Türkiyədən iqtisadi münasibətlər baxımından aslıdır. O, qeyd etdi ki, çünki Türkiyə Rusiyaya qarşı sanksiyalara qoşulmayıb, bu prosesdə iştirak etmir. “Rusiya qazının Türkiyəyə ixracı müəyyən xətlər üzrə bölünmə üsulları ilə həyata keçirilir, ona görə də Rusiya bundan faydalanır.
Onsuz da Suriya məsələsində Rusiya ilə Türkiyə arasında münasibətlər sistemi kifayət qədər pozulub. Əlbəttə ki, Türkiyənin Avropanın təhlükəsizlik məsələsində yer alması Avropanı gücləndirəcək və bu eyni zamanda Rusiya üçün mənfi ssenaridir”-deyə M.Əsədullazadə qeyd etdi.
İradə SARIYEVA
