Böyük Britaniyanın Baş naziri Endi Bernem avropalı liderlərlə birlikdə sentyabrda ABŞ-a səfər edərək Donald Trampı Ukraynaya ABŞ-ın “Patriot” raket-interseptor ehtiyatlarının bir hissəsini verməyə razı salmağa çalışacaqlarını bildirib.
Məsələnin əsas məqsədi qışa qədər Ukraynanın hava hücumundan müdafiə imkanlarını gücləndirməkdir. Ukrayna tərəfi, xüsusilə Rusiya tərəfindən enerji infrastrukturuna mümkün yeni hücumlar fonunda “Patriot” raketlərinin çatışmazlığından narahatdır.
Bernem bildirib ki, Avropa liderləri Nyu-Yorkda BMT Baş Assambleyası çərçivəsində Ukraynaya ABŞ və digər ölkələrin ehtiyatlarından raket-interseptorların verilməsi məsələsini müzakirə edə bilərlər. Onun sözlərinə görə, bunun üçün bir neçə ölkənin iştirakı və çoxsaylı danışıqlar tələb olunacaq.
Britaniya özü “Patriot” sistemlərindən istifadə etmədiyi üçün Bernem digər Avropa ölkələrinin bu məsələdə daha çox fəallııq göstırməli olduğunu vurğulayıb. Londonun Ukraynaya Storm Shadow raketlərinin istehsal texnologiyasını vermək qərarı da iki ölkə arasında hərbi əməkdaşlığın genişləndiyini göstərir.
Böyük Britaniyanın Baş naziri Endi Bernemin Ukraynaya “Patriot” raketlərinin verilməsi üçün Donald Trampa təsir göstərmək cəhdləri fonunda, London və digər Avropa liderləri Trampı ABŞ-ın “Patriot” ehtiyatlarını Ukraynaya açmağa məcbur edə biləcəklərmi?
Oqtay Qasımov: "Avropa liderlərinin Trampa təsir göstərmək imkanları var"
Politoloq Oqtay Qasımov məsələ ilə bağlı "Bakı-Xəbər" qəzetinə açıqlamasında bildirib ki, Ukraynanın “Patriot” raketlərinə ehtiyacı məsələsi uzun müddətdir ki, Prezident Vladimir Zelenski tərəfindən gündəmə gətirilir. Zelenski hər fürsətdə bu mövzunu ABŞ və Avropadakı tərəfdaşları ilə müzakirə edir və Ukraynaya bu istiqamətdə dəstəyin artırılmasını xahiş edir.
Ekspertin sözlərinə görə, iyun ayında Ankarada keçirilən NATO sammitində Zelenskinin ABŞ Prezidenti Donald Trampla görüşündə də bu məsələ müzakirə olunub. Lakin həmin vaxt ABŞ tərəfi məsələyə daha ehtiyatlı yanaşırdı. Bunun əsas səbəblərindən biri ABŞ-ın İranla müharibə fonunda özünün də “Patriot” raketlərinə ehtiyacının artması idi.
Oqtay Qasımov qeyd edib ki, ABŞ əvvəlcə Ukraynaya “Patriot” sistemlərinin istehsalı ilə bağlı lisenziya verilməsi məsələsinə də müsbət yanaşmışdı, lakin sonradan Donald Tramp bu mövqeyindən geri çəkildi. Ekspert hesab edir ki, ABŞ prezidentinin məsələyə münasibətindəki bu ziddiyyətli yanaşma həm Ukraynada, həm də Avropanın əsas dəstəkçiləri arasında müəyyən narahatlıq yaradır.
Politoloq vurğulayıb ki, Böyük Britaniya Ukraynanın əsas dəstəkçilərindən biridir və Londonun, eləcə də digər Avropa liderlərinin Donald Trampa müəyyən qədər təsir göstərmək imkanları var. Onun fikrincə, bu təsir ABŞ-dan “Patriot” raketlərinin alınaraq Ukraynaya çatdırılmasına imkan yarada bilər.
Oqtay Qasımovun sözlərinə görə, Rusiya-Ukrayna müharibəsi hazırda elə mərhələdədir ki, Ukrayna kifayət qədər fəallıq nümayiş etdirir və Rusiya ərazisində də müəyyən çətinliklər yaradır. Bu baxımdan ABŞ-ın, böyük həcmdə olmasa belə, məhdud sayda “Patriot” raketlərinin verilməsinə razılıq verməsi və onların Avropa üzərindən Ukraynaya çatdırılması mümkün variantlardan biri hesab oluna bilər.
Dəniz NƏSİRLİ
