Məhəmməd Əsədullazadə: “Paşinyan Ermənistan siyasi ideologiyasında bir növ inqilabi hərəkətlər edir”
Yeni Konstitusiyada Müstəqillik Bəyannaməsinə istinad edilməməlidir. Bunu Ermənistanın Baş naziri Nikol Paşinyan Parlamentdə deyib.
“Yeni konstitusiyanın mətnini yaxın aylarda dərc edəcəyik və dediyim kimi, yeni konstitusiyada 1990-cı il İstiqlal Bəyannaməsinə istinad edilməməlidir. Qarabağ hərəkatını davam etdirməmək, ona son qoymaq qərarını elan etdik və xalq bu qərarı təsdiqlədi. Yeni konstitusiyanın qəbul edilməsi gündəliyi sırf Ermənistan gündəliyidir. Ermənistan vətəndaşları Konstitusiya Məhkəməsinin lehinə səs verərək, həmin gündəliyin lehinə də səs veriblər”, - deyə o qeyd edib.
Sözügedən məsələni baki-xeber.com-a şərh edən politoloq Məhəmməd Əsədullazadənin fikrincə, Paşinyan Konstitusiya məsələsində qətiyyətli görünür: “Çünki mövcud Ermənistan Konstitusiyası dəyişdirilmədən sülh sazişinin imzalanması, regionda dayanıqlı sülhün təmin edilməsi mümkünsüzdür. Paşinyan da fərqindədir ki, Ermənistan blokadadan çıxmadan dayanıqlı inkişafını təmin edə bilməz. O üzdən, yeni Konstitusiyanın qəbul edilməsi qaçılmaz reallığa çevrilib. Paşinyan hesab edir ki, yeni ölkə Konstitusiyası qəbul edilməlidir. Bu, de-yure Ermənistanın müstəqillik imkanlarını artıracaq. Təbii ki, burada Azərbaycanın da qəti tələbi var. Yəni Ermənistan bunu dəyişməlidir, ölkəmizə qarşı ərazi iddialarından imtina etməlidir. Paşinyan da açıq bəyan etdi ki, yeni Konstitusiyada 1990-cı il İstiqlal Bəyannaməsinə istinad edilməyəcək. Konstitusiya konkret olaraq real Ermənistan ideologiyasına fokslanacaq və bu, özündə qonşu ölkələrə qarşı ərazi iddialarını ehtiva etməyəcək. Bütün bunlar faktiki olaraq onu göstərir ki, Paşinyan Ermənistan siyasi ideologiyasında bir növ inqilabi hərəkətlər edir. Cəmiyyətin bu yöndə düşüncəsini dəyişir və prosesləri bu istiqamətdə aparır. Prosesi sürətləndirmək üçün revanşist müxalifətin liderlərini də həbs etməkdən çəkinmir. Bununla Konstitusiya referendumuna qarşı olan qüvvələri neytrallaşdırır. Bir sözlə, prosesi müsbətə doğru aparır. Güman edirəm ki, gələn il Ermənistanda yeni Konstitusiya referendumla qəbul ediləcək və Azərbaycanla sülh sazişi imzalanacaq”.
Vidadi ORDAHALLI
