Elşad Həsənov: “Yeni bir geosiyasi konfiqurasiya qurulub və bu, regionda çox böyük bir inkişafa gətirib çıxaracaq”
Prezident İlham Əliyev və Özbəkistan Prezidenti Şavkat Mirziyoyevlə mətbuata bəyanatında bildirib ki, Mərkəzi Asiya və Azərbaycan vahid geosiyasi regiondur:
“Bu gün Mərkəzi Asiya və Azərbaycan böyük potensiala, eyni zamanda, bundan da böyük inkişaf imkanlarına malik vahid geosiyasi və geoiqtisadi regiondur. Bu böyük, hətta deyərdim ki, yenidən yaradılmış və artıq kifayət qədər inteqrasiya olunmuş regionun inkişafının ümumi müsbət dinamikası da bu halda Özbəkistan və Azərbaycan arasında sıx qarşılıqlı əlaqələrdən asılıdır”.
Sözügedən məsələyə aydınlıq gətirən siyasi ekspert Elşad Həsənov baki-xeber.com-a açıqlamasında bildirdi ki, Mərkəzi Asiya ilə Azərbaycan arasında inkişaf edən münasibətlər Prezident Əliyevin səfərləri timsalında daha da sürətlə inkişaf edir: “İlk dəfə olaraq Azərbaycanla Özbəkistan arasında “Əbədi dostluq müqaviləsi” imzalandı. Bu, siyasi diplomatiyada bir ilkdir. Azərbaycan demək olar əksər türkdilli dövlətlərlə strateji müttəfiqlik müqaviləsi imzalayıb. İlk olaraq Özbəkistanla “Əbədi dostluq müqaviləsi” imzalanıb. Bu, yeni bir siyasi xətt və strategiyadır. Azərbaycanın Mərkəzi Asiya Ölkələri Məşvərət Şurasının üzvü olması da məhz Özbəkistan Prezidenti Şavkat Mirziyoyevin təşəbbüsü ilə reallaşıb. Nəticədə yeni bir geosiyasi konfiqurasiya qurulub və bu, regionda çox böyük bir inkişafa gətirib çıxaracaq. Bununla belə, Özbəkistanla Azərbaycan Xəzərdə yeni gəmiçilik donanmasının yaradılması haqqında da razılığa gəliblər. Hesab edirəm bu da bir yenilikdir. Çünki Özbəkistan son illər sürətlə inkişaf etməkdədir. Ölkədə əhalinin sayı iki dəfədən çox artıb. Ölkədə sürətli inkişaf müşahidə edilir. Özbəkistan bütün Mərkəzi Asiya ölkələri ilə həmsərhəddir və olduqca əlverişli coğrafi mövqedə yerləşir. Özbəkistan Mərkəzi Asiyada kəsişən logistika yolları üzərində yerləşir. Mərkəzi Asiya ölkələrinin Azərbaycan üzərindən Avropa ilə nəqliyyat əlaqələri qurması region dövlətlərinin Rusiyadan asılılığını azaldır. Ona görə də bütün bunlar yeni vahid geosiyasi və geoiqtisadi reallıqlar yaradır. Bölgənin inkişafına yeni yön verir. Yeni geosiyasi reallıqlar, həm də yeni geoiqtisadi inkişaf deməkdir. Böyük bir potensialın üzə çıxmasında Azərbaycanın rolu böyükdür. Fikrimcə, Azərbaycanla Özbəkistan arasında əlaqələrin inkişafı regionun inkişafına keyfiyyətcə yeni yön verəcək”.
Vidadi ORDAHALLI
