Samir Hümbətov: “Bu o deməkdir, böyük ehtimalla Pentaqonun, yaxud Mərkəzi Kəşfiyyat İdarəsinin əlində Rusiyanın bu ərazilərə hücum etməsinə dair informasiyalar var ki, Retkliff səfər edib və rəsmi Moskvanı bundan çəkindirməyə çalışır”
“The Wall Street Journal” xəbər verir ki, təyyarəsi çərşənbə axşamı Vnukovo hava limanına eniş edən və bir neçə saat sonra yola düşən ABŞ Mərkəzi Kəşfiyyat İdarəsinin direktoru Con Retkliffin Moskvaya gözlənilməz səfəri Vladimir Putinin gələcək planları ilə bağlı kəşfiyyat məlumatları ilə əlaqələndirilə bilər.
Kəşfiyyat məlumatlarına görə, Rusiya ordusu Kalininqrad vilayətində və digər bölgələrdə səfərbərlik təlimləri keçirərək Müdafiə Nazirliyinin infrastrukturunu yeni əsgərləri qəbul etməyə, onları ərzaq və silahla təmin etməyə hazırlıq baxımından sınaqdan keçirib.
Bundan əlavə, WSJ xəbər verir ki, ABŞ kəşfiyyatı Putinin NATO-nun dayanıqlığını sınamağa cəhd edə biləcəyi barədə məlumat alıb.
Görünür, səfəri zamanı Con Retkliff
Putinlə görüşüb. Kreml müxbirlərinin məlumatına görə, Rusiya prezidenti çərşənbə axşamı üçün planlaşdırılan tədbirləri ləğv edib, baxmayaraq ki, onlar əvvəlcədən hazırlanmış və böyük bir izdihamın cəlb olunması gözlənilirdi.
WSJ-nin məlumatına görə, analitiklər Retkliffin Putinə xəbərdarlıq gətirə biləcəyinə inanırlar. Milli kəşfiyyatın keçmiş direktor müavini Bette Sanner deyir: “Məqsəd “biz nə etdiyinizi bilirik və bunu etməməyiniz daha yaxşıdır demək ola bilərdi”-deyə Sanner əlavə edib: “Bu, həmçinin İranda atəşkəs və danışıqlara başqasının cəlb edilməsi ilə əlaqəli ola bilərdi”.
Ukrayna mediasının verdiyi xəbərlərə görə, Retkliffin səfərinin məqsədi enerji sektorlarına və limanlarına hücumlara qarşı Rusiya-Ukrayna qarşılıqlı moratoriumunu müzakirə etmək ola bilər. Sumı və Xarkov bölgələrində atəşkəs də ümumi deeskalasiyaya doğru addımlar kimi müzakirə edilib.
“iPaper” Ratkliffin səfərini mümkün məhbus mübadiləsi ilə əlaqələndirir. ABŞ hərbi təyyarəsi fevral ayında Rusiyaya eniş etdi, Putin Rusiyada narkotik qaçaqmalçılığında ittiham olunan 63 yaşlı məktəb müəllimi Mark Fogeli azad etməyə razılıq verdi. Fogelin mübadilə tərəfdaşının kimliyi hələ də məlum deyil. Əvvəllər, Mərkəzi Kəşfiyyat İdarəsinin köməyi ilə Tramp administrasiyası “Wall Street Journal-ın jurnalisti Evan Herşkovitz və dəniz piyadası Pol Uilanın azadlığa buraxılmasını təmin etmişdi. Hər ikisi casusluqda ittiham olunmuşdu.
"Kommersant" qəzetinin Flightradar məlumatlarına istinadən verdiyi məlumata görə, Retkliffin təyyarəsi Vnukovodan təxminən Moskva vaxtı ilə saat 18:50-də Latviyaya doğru yola düşüb. Onun ardınca Rusiyanın yüksək vəzifəli məmurlarını daşımaq üçün istifadə edilən "Rossiya" bölməsinə məxsus xüsusi təyinatlı təyyarə gəlib.
Beynəlxalq Münasibətlər və Diplomatiya Araşdırmaları Mərkəzinin rəhbəri, politoloq Samir Hümbətov baki-xeber.com-a bildirdi ki, ABŞ Mərkəzi Kəşfiyyat İdarəsinin direktoru Con Retkliffinin Moskvaya birbaşa qəfil baş tutan səfəri bir neçə istiqamət üzrə dəyərləndirilə bilər. “Birincisi, artıq neçə gündür ki, Rusiya mediası, əsasən də xarici media Rusiyada səfərbərliyin olacağını yazır. Hətta bundan sonra rusiyalı gənclərin ölkədən kütləvi şəkildə Gürcüstan, Qazaxıstan və digər ölkələr istiqamətində çıxmağa başladıları barədə də məlumatlar yayılmaqdadır. Səfərbərliyə gəlincə, burada genişmiqyaslı səfərbərlikdən söhbət gedir. Yəni 100-200 mindən yox, 1 milyon üzərində insanı əhatə edən səfərbərlikdən danışılır. Çox ehtimal ki, ABŞ Mərkəzi Kəşfiyyat İdarəsinin direktorunun bu qəfil səfərinin arxasında da məhz səfərbərlik məsələsi dayanır. Əgər səfərbərlik olursa demək səfərbərliyin arxasında çox ehtimal ki, Rusiyanın Ukrayna ilə paralel olaraq həm də Baltikyanı ölkələrə hücumu məsələsi də dayanır. Çünki Kalinqrad ərazisində artıq Rusiya raket, PUA sistemlərini yerləşdirilməyə, ərzaq depolarını möhkəmləndirməyə çalışır. Bununla bağlı informasiyalar getməkdədir. Eyni zaman Polşa hazırda Suvalki dənizi ətrafına qoşun yığır. Artıq NATO qırıcıları Rusiya ilə sərhəddə manevr etməyə, nəzarət funksiyası keçməyə başlayıb. Bu o deməkdir, böyük ehtimalla Pentaqonun, yaxud Mərkəzi Kəşfiyyat İdarəsinin əlində Rusiyanın bu ərazilərə hücum etməsinə dair informasiyalar var ki, Retkliff səfər edib və rəsmi Moskvanı bundan çəkindirməyə çalışır”.
S.Hümbətov qeyd etdi ki, çünki sonuncu dəfə belə bir səfər 2021-ci ildə, Ukrayna müharibəsindən təxminən 5 ay əvvəl baş tutub. “O dövrdə də ABŞ Mərkəzi Kəşfiyyat İdarəsinin direktorunun əsas məqsədi Rusiyanı bu hücumdan çəkindirmək idi. Çəkindirə bilmədi. Burada da 3 saatdan artıq keçirilib. Hesab edirəm ki, bu birbaşa o məsələ ilə bağlıdır. Yəni Avropada yeni müharibə, yeni ekskalasiya təhdidi var. Görününür ki, Rusiya bu strategiyaya gedir. “Əgər müharibədə qalib gələ bilmirəmsə müharibənin miqyasını genişləndirim və Avropaya da müdaxilə edim”. Yəni Rusiyanın yeni strategiyasında böyük ehtimal ki, Baltikyanı ölkələrə hücum etməklə bir növ onları ələ keçirmək və ondan sonra artıq Qərb ölkələri, Avropa İttifaqı və ABŞ-la Ukrayana məsələsində bazarlıq etmək var. Çünki bu gün Duqinin bir açıqlaması var. O, deyir ki, Ukraynanı bizə versinlər, biz də sakitləşək. Yəni bu o deməkdir ki, Duqin açıq şəkildə Putinin, Rusiyanın fikrini irəli sürür. Məqsəd də odur ki, Rusiya bazarlığa getsin. Yəni Ukrayana müharibəsini belə qazana bilmirsə ən azı zəif nöqtələr hansı ölkələrdirsə onları işğal etməklə bazarlığı daha rahat həyata keçirsin. Yəni bu strategiyaya keçid etdiyini göstərir. Amma buna indi ABŞ, yaxud Avropa ölkələri hansı reaksiyanı verəcək onu zaman göstərəcək. Ancaq hər vəziyyətdə Rusiyaya bu qədər şans verəcəklərini düşünmürəm”-deyə S.Hümbətov qeyd etdi.
İradə SARIYEVA
