Ramil Məmmədli: “Bu, yeni bir şey deyil və Moskvanın da əsas istəklərindən biridir”
Keçmiş prezident Robert Köçəryan və “Taşir Qrupu”nun rəhbəri Samvel Karapetyanın təmsil olunduğu müxalifət KTMT sülhməramlılarının ölkəyə daxil olmasını istəyir. Bunu Ermənistanın Baş naziri Nikol Paşinyan bildirib.
“Məqsədiniz KTMT sülhməramlılarının Ermənistana daxil olmasıdır. KTMT sülhməramlıları və ümumiyyətlə xarici sülhməramlılar olmayacaq. Bu olmayacaq, çünki sülh bərqərar olub, çünki Ermənistan və Azərbaycan xalqları ən yaxşı sülhməramlılardır”, - deyə Paşinyan parlamentdə “Ermənistan” və “Güclü Ermənistan” müxalifət fraksiyalarına müraciətində bildirib.
Sözügedən məsələ ilə bağlı fikirlərini baki-xeber.com-la bölüşən hərbi ekspert Ramil Məmmədli hesab edir ki, nəinki parlament müxalifəti, Rusiyaya bağlı bütün revanşist siyasi qüvvələr Moskvanın egidası altında KTMT-nin Ermənistan-Azərbaycan sərhədinə yerləşdirilnəsini istəyir: “Prinsipcə, bu, yeni bir şey deyil. Bu, Moskvanın da əsas istəklərindən biridir. Çünki KTMT adı ilə sərhədə yerləşsələr, burada əsas qüvvə rolunda Rusiya çıxış edəcək. Bu minvalla Rusiya nəinki Ermənistanda təsirini genişləndirəcək, həm də Azərbaycana müəyyən təzyiqlər göstərməyə cəhd edəcək. Sərhəddə istənilən təxribatı törədib gərginlik yaradacaqlar. Nəticədə Azərbaycanla Ermənistan arasında sülh gündəliyi təhlükə altına düşəcək, sərhədlərin açılması, delimitasiyası, normal münasibətlərin qurulması uzanacaq. Nəticə etibarı ilə Ermənistan daxilində gərginlik artacaq və Rusiyaya bağlı qüvvələrin hakimiyyəti ələ keçirməsinə zəmin formalaşacaq. Ssenari budur. Nəzərə almaq lazımdır ki, Rusiya aprel ayından başlayaraq Ermənistana iqtisadi təzyiqləri artırır. Söhbət Ermənistanda istehsal edilən bir sıra kənd təsərrüfatı məhsulların Rusiyada satılmasına qoyulan məhdudiyyətlərdən gedir. Emənistanda əhalinin müəyyən hissəsi aqrar sahədə çalışır və baş verənlər bilavasitə onların sosial vəziyyətinə təsir edir. Bütün bunların fərqində olan Paşinyan əlbəttə revanşist müxalifətə bu imkanı verməyəcək. Hələ istisna deyil ki, yaxın dövrlərdə Rusiya hərbçilərinin İranla sərhəddən çıxarılması gündəmə gətirilsin. Diqqəti çəkən məqam odur ki, məhz indiki dövrdə Paşinyan hakimiyyəti revanşist müxalifətin üzərinə hücuma keçib. Sabiq prezident Robert Köçəryan və o düşərgəyə məxsus bir sıra üzdə olan fiqurlar həbs edilib. İstisna etmirəm ki, Paşinyan bunu Qərblə razılaşdırıb. Çünki o düşərgəni ciddi zəiflətmədən Konstitusiya ilə bağlı referendum keçirmək, Azərbaycanla yekun sülh sazişi imzalamaq çətin olacaq. Ən azından ona görə ki, həmin qüvvələr Rusiyanın əlində əsas siyasi vasitələrdən biridir”.
Vidadi ORDAHALLI
