Məlum olduğu kimi, Yelisey sarayında Ermənistanın baş naziri Nikol Paşinyanın Fransa prezidenti Emmanuel Makron ilə görüşü olub. Ermənistan hökuməti mətbuat xidmətinin məlumatına görə, Makron Ermənistan və Fransa arasında çoxsahəli əməkdaşlığın daha da inkişaf etdirilməsinin vacibliyini vurğulayıb, Ermənistanın inkişafı və sabitliyinin təmin olunması işində Fransanın dəstəyini bir daha təsdiqləyib.
Paşinyan qəbula görə minnətdarlığını bildirib və qeyd edib ki, 2024-cü il Ermənistanla Fransa arasında münasibətlərdə son dərəcə dinamik il olub. Onun sözlərinə görə, iki ölkənin rəhbərləri və müvafiq idarələr səviyyəsində bir çox görüşlər keçirilib, müntəzəm təmaslar davam etdirilir və hazırda Ermənistan-Fransa münasibətləri yeni səviyyəyə yüksəlib. İki ölkə liderləri iqtisadiyyat, infrastruktur, yol tikintisi, energetika, təhsil və turizm kimi sahələrdə ikitərəfli əməkdaşlığın inkişafını, birgə layihələrin reallaşdırılması perspektivlərini müzakirə ediblər. Tərəflər Ermənistan və Azərbaycan arasında sülh prosesinə, sərhədlərin demarkasiyası prosesinin inkişafına və “Sülh kəsişməsi” layihəsi çərçivəsində regional kommunikasiyaların açılmasına da toxunublar. Bütün bunlara Makron tam dəstək ifadə etdiyini bildirib. Amma xüsusi qeyd olunmalıdır ki, Azərbaycanın razılığı olmadan regionda heç bir layihə reallaşa bilməz. Bura “Sülh kəsişməsi” layihəsi də daxildir. Nəqliyyat məsələlərinə həsr olunmuş müşavirədə çıxışı zamanı bununla bağlı prezident İlham Əliyev qeyd edib ki, Ermənistan, faktiki olaraq, 10 noyabr kapitulyasiyasından sonra üzərinə götürdüyü öhdəlikləri yerinə yetirmir: “Orada açıq-aydın göstərilirdi ki, Azərbaycanın əsas hissəsi ilə onun ayrılmaz hissəsi olan Naxçıvan Muxtar Respublikası arasında nəqliyyat bağlantısı olmalıdır. Ermənistan isə buna əməl etmir, müxtəlif bəhanələr gətirərək, müxtəlif qeyri-real və cəfəng layihələri ortaya ataraq, sadəcə olaraq, beynəlxalq ictimaiyyətin fikrini çaşdırmaq istəyir, manipulyasiyalarla məşğuldur. Yəqin ki, siz də eşitmisiniz, dırnaqarası “Sülh kəsişməsi” layihəsini ortalığa atıb və indi dünyada bir ölkə qalmayıb ki, o ölkəyə bu layihə təqdim edilməsin. Halbuki bu dırnaqarası layihənin Azərbaycansız iki qəpiklik də qiyməti yoxdur və biz bunu dəfələrlə Ermənistan tərəfinə müxtəlif kanallar vasitəsilə çatdırmışıq. Əgər siz bu layihəni doğrudan da həyata keçirmək istəyirsinizsə, ilk növbədə, Azərbaycana müraciət etməlisiniz. Çünki bizsiz bu, sadəcə olaraq, kağız parçasıdır, bizim şərtlərimiz isə ədalətlidir, beynəlxalq hüquqa əsaslanır və Ermənistanın özünün götürdüyü öhdəliklərinə əsaslanır. Ermənistan rəhbərliyinə bir daha məsləhət görərdim ki, 10 noyabr kapitulyasiya aktını diqqətlə oxusun və orada xüsusilə dediyim o bəndə diqqət yetirsin. Yenə də deyirəm, onların dırnaqarası layihəsi Azərbaycansız tamamilə əhəmiyyətsizdir”. Beləliklə, “Sülh kəsişməsi” layihəsini Ermənistan və Fransa istəsə də reallaşdıra bilməyəcək.
Paşinyanın Emmanuel Makronla görüşündə tərəflər müdafiə sahəsində də işbirliyini dərinləşdirməyə qərar veriblər. Bu da o deməkdir ki, Fransa Ermənistanı silahlandırmağa davam edəcək. Fransa Ermənistanı silahlandırmaqla Cənubi Qafqazda vəziyyəti gərginləşdirməyə çalışır. Təbii ki, Fransanın Ermənistanı hər vəchlə silahlandırmağa çalışması, onu yenidən təcavüzə və hərbi avantüraya cəlb etməsi qəbuledilməzdir. Rəsmi Paris bu yolla regiona yerləşməyə çalışır. Azərbaycan buna qətiyyətlə etiraz edir. Azərbaycan Fransa hökumətini onunla Qarabağ məsələsi ilə bağlı uzun illərdir münaqişədə olan Ermənistanı himayə etməkdə, onu silahlandırmaqda günahlandırır. Bütün hallarda, Fransanın Cənubi Qafqaz regionu üçün təxribatçı planları qəbulolunmazdır. Bu hal Ermənistanın sülh sazişi imzalamaq istiqamətində fəaliyyətinə müsbət təsir edə bilməz. Məhz bu səbəbdən Fransanın Ermənistanla hərbi sahədə əməkdaşlığı, təbii ki, Azərbaycanı narahat edir. Çünki Ermənistan hələ ki, Azərbaycanla sülh sazişi imzalamayıb. Bundan başqa, Ermənistan konstitusiyasında dəyişiklik edilməyib və ali qanunvericilik aktında hələ də Azərbaycana qarşı ərazi iddiaları yer alır. Bu isə Azərbaycan üçün təhdiddir. Belə vəziyyətdə rəsmi Bakının da tədbirlər görmək hüququ var. Ermənistanın sülhə marağı olmadığı, real vəziyyəti gələcəkdə yenidən Azərbaycana qarşı təcavüzə başlamaq üçün ehtiyat variantı kimi saxlamağa çalışdığı açıq-aydın ortadadır. Azərbaycan müharibədən sonra bölgədə sülhü təşviq etdiyi halda, Fransanın bu məsələyə Ermənistanı müharibəyə sürükləməklə və onu silahlandırmaqla cavab verməsi rəsmi Parisin təhlükəli addımlarından xəbər verir. Eyni zamanda, hazırda Ermənistanla Rusiya arasında münasibətlərdə nəzərə çarpan gərginlik bu ssenarinin müəlliflərinin kimlər olduğunu açıq şəkildə nümayiş etdirir. Reallıq budur ki, Qərb Ermənistanı ölkəmizə qarşı müharibəyə hazırlayır. Müharibəyə hazırlıq istiqamətində əsas addım Ermənistanın silahlandırılmasıdır. Hazırda Fransa bu missiyanı öz üzərinə götürüb. Ermənistana Fransa və Hindistanda Fransa lisenziyası ilə istehsal olunan silahların verilməsi bunun bir daha təsdiqidir.
Samirə SƏFƏROVA
