Eyyub Hüseynov: “O restoranı ona görə prokurorluğa vermirlər ki...”
Qida Təhlükəsizliyi Agentliyinin əməkdaşları tərəfindən Bakı şəhəri, Nəsimi rayonu, Ə.Quliyev küçəsi, ev 114 ünvanında fəaliyyət göstərən fiziki şəxs Ağaisa Əlisa oğlu Nəbiyevə məxsus "İbrahim Tatlışiş" kabab evində yoxlama keçirilib.
Bildirilib ki, yoxlama zamanı istifadə olunan farşın keyfiyyət və təhlükəsizliyini təsdiq edən müşayiətedici sənədlər təqdim edilməyib.
Məhsullardan götürülən nümunələrin laborator müayinəsi nəticəsində ətdə at DNT-si aşkarlanıb. Bundan əlavə, müəssisədə izlənmə sisteminin tətbiq edilmədiyi, həmçinin sanitar-texniki və sanitar-gigiyenik tələblərin pozulduğu müəyyən olunub.
Faktla bağlı sahibkar barəsində inzibati protokol tərtib edilərək məsuliyyətə cəlb olunub və müəssisənin fəaliyyəti nöqsanlar aradan qaldırılanadək məhdudlaşdırılıb.
Qeyd edək ki, həmin obyektin sahibi 2025-ci ilin may ayında keçirilən yoxlama zamanı da at DNT-si aşkarlanması faktına görə məsuliyyətə cəlb olunmuşdu.
Bakıda “İbrahim Tatlışiş” restoranında artıq ikinci dəfədir ki, kababdan at əti DNT-si çıxıb. Bununla bağlı restorana xəbərdarlıq edilib. Niyə xəbərdarlıq edilir, niyə konkret cinayət işi açılmır? Belə yumşaq davranışın səbəbi nədir? Əvvəllər belə bir hadisə baş verən kimi AQTA restoranları prokurorluğa verirdi, bu restoranı niyə vermir?
Azad İstehlakçılar Birliyinin rəhbəri Eyyub Hüseynov baki-xeber.com-a bildirdi ki, ölkədə at ətinin, bütövlükdə istənilən ətin satışına heç bir qadağa yoxdur. “Sadəcə olaraq qanunvericilik tələb edir ki, ətin mənşəyi yazılsın, istehlakçı aldadılmasın. Bu halda obyekt sahibi vətəndaşı, istehlakçını aldatdığı üçün cəzalandırılır. Bunun üçün də əsas deyil ki, müəssisə bağlansın. Yəni yalnız istehlakçını aldatdığı, at ətindən istifadə etdiyi üçün olub. Digər tərəfdən, heç kəs işlək atı kəsmir. At xəstələnib öləndən, murdar olandan sonra onu kəsə bilərlər. Əslində at kəsilməməlidir. Cəmdəyi basdırılmalıdır. Lakin biz görürük ki, at ətindən istifadə olunur. Təsadüfi deyil ki, illər boyu murdar olmuş heyvan ətinin, at ətinin, eşşək ətinin şəhərə daşınması müşahidə olunur. Bu sahədə ən uğurlu mübarizəni nə Kənd Təsərrüfatı Nazirliyi, nə Azərbaycan Qida Təhlükəsizliyi Agentliyi, nə də epidemoloji qurumlar həyata keçirir. Bu hallarla mübarizəni illər boyu Daxili İşlər Nazirliyinin Baş Mütəşəkkil Cinayətkarlığa Qarşı mübarizə idarəsi aparır. Ona görə uğurlu işlər görürlər ki, bu qurum ətləri ekespertizadan keçirir, bu işləri görənləri həbs edir və qanunvericilyə uyğun bütün addımları atırlar. Çox təəssüf ki, Azərbaycan məhkəmələri bu pis işlərlə məşğul olanları qısa müddətdə azadlığa buraxırlar. O cür adamlara bəraət verilməli deyil, onlar öz cəzalarını axıra qədər çəkməlidirlər. Çox təəssüf ki, adını çəkdiyim qurum bu işləri ardıcıl aparmır. AQTA-ya qida təhülkəsizliyinin qorunması istiqamətində daha geniş səlahiyyətlər verilməlidir ki, bu işlər görülsün. Lakin görürük ki, bəzi qurumlar cərimə edir və sonra da buraxılır. Bu sahədə ətin mənşəyinin gizlədilməsi yönündə ölkədə böyük problem yaşanır. Mən birmənalı şəkildə Nazirlər Kabinetinə çağrış edirəm ki, Azərbaycanda ənənəvi olaraq yeyilməyən heyvan ətlərinin istehlakına qadağa qoyulsun. Qanundakı boşluqdan istifadə edirlər. Hansı ət ucuzdur, hansı ət yararsızdır onu gətirib bişirirlər”.
E.Hüseynov qeyd etdi ki, Qida Təhlükəsizliyi Agentliyi əlindən gələni edir, lakin hələ işlərin effektiv nəticəsini görmürük.
“O restoranı ona görə prokurorluğa vermirlər ki, burada söhbət yalnız istehlakçını aldatmaqdan gedir. Dediyim kimi ölkədə at ətinin satışına qadağa yoxdur. Yənin ki, cərimə edib məsələni bu cür həll edəcəklər”-deyə E.Hüseynov qeyd etdi.
İradə SARIYEVA
