Mətləb Salahov: “Hindistan daha çox Ermənistan bazarında Rusiyanın yerini doldurmağa çalışır”
“Əvvəla ondan başlayım ki, 44 günlük müharibə dövründə və ondan əvvəlki zamanlarda Hindistan ardıcıl şəkildə Ermənistanın silah arsenalını yeniləyən dövlət kimi tanınır. Rəsmi Dehli bütün zamanlarda İrəvanın yanında yer alıb və bu proses günü bu gün daha aktiv şəkildə davam edir. Bəs bu ölkədə Azəbaycan əleyhinə belə ritorika nədən qaynaqlanır? Məlumdur ki, Azərbaycan və Pakistan müttəfiq ölkələrdir və bu müttəfiqlik tarixin sınaqlarından çıxıb. Pakistanla düşmən münasibətdə olan Hindistan isə həm özünə silah bazarı tapmaq, həm də dünya siyasətində zəif olan nüfuzunu və təsirini mümkün qədər yuxarı qaldırmaq üçün Ermənistan üzərindən fəallaşmağa, rəsmi İrəvanı müdafiə edən Qərb strukturları ilə işbirliyini möhkəmləndirməyə çalışır. Açıq-aydın görünür ki, Hindistan dünya siyasətində varlığını hiss etdirmək və Qərb dövlətləri üçün “lazımlı dövlət” olduğunu isbatlamaq üçün Ermənistandan tramplin kimi istifadə edir. Bu gerçək faktdır”. Bu fikirləri "Bakı-Xəbər"ə açıqlamasında jurnalist-ekspert Mətləb Salahov bildirib. O qeyd edib ki, Hindistanın müdafiə katibi Raçeş Kumar Sinqxin İrəvana iki günlük səfəri və bu barədə Rusiya və habelə yerli mediada dərc edilən sensasion faktlar iki ölkə arasındakı silah ticarətinin daha aktiv fazaya keçdiyini, rəsmi irəvanın Hindistandan güclü silah arsenalı əldə etdiyinə işarədir. “Diqqət edin: görüşlərdən sonra iki ölkə arasında müdafiə sənayesində tədqiqat, innovasiya və birgə istehsal üzrə memorandum imzalanıb. Sənəd sadəcə hazır silahların alınmasını deyil, müdafiə texnologiyalarının hazırlanmasını, mütəxəssis mübadiləsini, startap və innovasiya layihələrini də nəzərdə tutur. Bu gün Ermənistan Hindistan üçün əsas silah bazarına çevrilib. Xüsusilə Rusiya ilə hərbi ticarət əməkdaşlığını minimuma endirən Ermənistan, Fransa və Hindistan üzərindən silah idxalını artırır. Dehli artıq Ermənistana yalnız kiçik həcmli hərbi məhsullar satmır. Çünki son illərdə İrəvan Hindistanın “Svathi” radarları, “Pinaka” yaylım atəş sistemləri, “Akaş” hava hücumundan müdafiə sistemi və artilleriya sistemləri ilə maraqlanıb və bu istiqamətdə müqavilələr bağlayıb. Hindistan daha çox Ermənistan bazarında Rusiyanın yerini doldurmağa çalışır. Nə zamana kimi?- onu da zaman göstərəcək...”
Namiq Quliyev
