Son bir neçə həftə ərzində Vaşinqton Azərbaycan və Ermənistanla daim iş aparıb ki, humanitar yardım Dağlıq Qarabağ əhalisinə çatsın. Bu barədə dünən Dövlət Departamentinin nümayəndəsi Vedant Patel bildirib.
Daha sonra Patel bunları qeyd edib: “Laçın dəhlizinin humanitar, ticarət və sərnişin daşımaları üçün dərhal yenidən açılması ilə bağlı çağırışımızı təkrar edirik. Biz ərzaq, dərman və digər zəruri malların əngəlləməsinin davam etməsi nəticəsində Dağlıq Qarabağda humanitar vəziyyətin pisləşməsindən çox narahatıq”.
Diqqəti çəkən məqam odur ki, Patelin şərhləri Konqresin insan hüquqları üzrə ikipartiyalı komissiyasının Dağlıq Qarabağdakı vəziyyətlə bağlı ictimai dinləmələr keçirməyə hazırlaşdığı vaxtda səslənib. Qərəzli münasibətə bax ki, Patel Ağdam-Xankəndi yolundan bir kəlmə belə danışmayıb. Sanki belə bir yol yoxdur, Azərbaycan bu yolu təklif etməyib. Konqresdəki müzakirələr ərəfəsində Dövlət Departmenti Laçın yolu ilə bağlı belə iddialı mövqe nümayiş etdirir və Ağdam-Xankəndi yolunun adını çəkmir. Niyə?
“Patel dinləmələr ərəfəsində belə birtərəfli mövqe sərgiləməklə, Azərbaycana qarşı qərəzli mövqeyə zəmin yaradır”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyev bunu bir sıra amillərlə əlaqələndirdi: “Ümumiyyətlə, son dövrlərdə ermənilərin Laçın yolunda yaratdığı şou anti-azərbaycançı mövqedən çıxış edən müxtəlif dövlətlərin və onların parlamentlərində müzakirə predmetinə çevrilib. Bu zaman sual ortaya çıxır. ABŞ Dövlət Departamenti, Fransa və s. nəyə görə indiyədək işğal altında olan ərazilərimizlə bağlı heç bir dinləmə həyaa keçirməyib? Bu gün Laçın yolunda baş verənləri "humanitar böhran" adı ilə qələmə verən erməni diasporası bəlli dövlətlərə təəssüflər olsun ki, təsir etmək gücündədir. Ermənistan həmin dövlətlərin əlində siyasi alətə çevrilib. Fakt odur ki, ermənilər tərəfindən illərlə Azərbaycan insanının, uşaqlarının hüquqları pozulub. Ölkəmizə qarşı terror aktı həyata keçirilib, vandalizm və etnik təmizləmə siyasəti reallaşdırılıb. Ancaq təəssüflər olsun ki, bütün bunların fonunda Ermənistana qarşı qətnamələr, bəyanatlar qəbul olunsa da onların heç biri icra olunmayıb. Çünki bütün bunların icrası həyata keçirilməyib. Buna misal olaraq, BMT Təhlükəsizlik Şurasının Azərbaycanla bağlı dörd qətnaməsini göstərə bilərik. Azərbaycan dövləti məcburiyyət qarşısında qalıb həmin qətnamələrin icrasını özü həyata keçirdi. Bu gün Azərbaycan dövləti öz vəzifələrini gözəl anlayır, layiqincə yerinə yetirir. Digər tərəfdən, bu dəhlizlə bağlı proses bizim daxili ərazimizdir. Biz nə istəsək, nəyi lazım bilsək onu əldə edəcəyik. Düzdür, burda hazırda Rusiyanın sülhməramlı deyilən bir kontingenti var. Onlar da ikibaşlı oyun oynayırlar. Gah ermənilərə rəvac verirlər, gah onların şıltaqlıqlarına göz yumurlar. Ancaq bu daim davam edə biləcək bir məsələ deyil. Patel dinləmələr ərəfəsində belə birtərəfli mövqe sərgiləməklə, Azərbaycana qarşı qərəzli mövqeyə zəmin yaradır. Halbuki, o, Ağdam yolunu dilə gətirsəydi, məsələ başqa cür ola bilərdi. Əfsuslar olsun ki, Departament rəsmisi erməni lobbisinin maraqlarına uyğun gedişlər edir”.
Vidadi ORDAHALLI
