Azərbaycan dövlət müstəqilliyini bərpa etdikdən sonra beynəlxalq təşkilatlarla əlaqələr qurdu, əməkdaşlıq etməyə başladı. İlkin döbvrlərdə Azərbaycanda müstəqil dövlət quruculuğu vəzifələri - müstəqilliyin möhkəmləndirilməsi, təhlükəsizliyin, ərazi bütövlüyünün və iqtisadi maraqların təmin olunması və s. özünəməxsus xüsusiyyətlərlə, vəzifə və taktiki gedişlərlə fərqlənən müxtəlif istiqamətli xarici siyasət yeridilməsini tələb edirdi. Ölkənin müstəqilliyinin
dönməzliyinə nail olmaq, onu tədricən ənənəvi siyasi təsir dairəsindən çıxarmaq, tarixən formalaşmış xarici iqtisadi, siyasi və mədəni əlaqələrdən müstəqillik mənafeləri üçün səmərəli istifadə etmək, Şərqlə Qərb arasındakı münasibətlər sistemində Azərbaycanın özünəməxsus yer tutmasını təmin etmək üçün region dövlətlərinin köklü mənafelərinə və maraqlarına toxunmamaq şərtilə çoxşaxəli və tarazlaşdırılmış siyasət həyata
keçirildi. Azərbaycan bu illər ərzində xarici siyasət sahəsində çox mükəmməl gedişlər etdi və həm regionun, həm də dünyanın aparıcı dövlətlərindən birinə çevirildi. Azərbaycan dünya dövlətləri və beynəlxalq təşkilatlarla uzun illərdir ki, əməkdaşlıq edir. Bu əməkdaşlıq nəticəsində ölkəmiz bir sıra üstünlüklər əldə edib.
Azərbaycanın sıx əməkdaşlıq etdiyi beynəlxalq qurumlardan biri Birləşmiş Millətlər Təşkilatıdır (BMT) ki, Azərbaycan ilə BMT arasında əməkdaşlıq Sovet İttifaqının dağılmasından və Azərbaycan öz müstəqilliyini bərpa etdikdən sonra yaranıb. Azərbaycan Respublikası 1992-ci il martın 2-də BMT-nin üzvlüyünə qəbul olunub.
1993-cü ildə BMT-nin Təhlükəsizlik Şurası Ermənistan-Azərbaycan, Dağlıq Qarabağ münaqişəsinə dair 822, 853, 874, 884 nömrəli qətnamələri qəbul edib. Qəbul edilən bu dörd qətnamələri baxmayaraq, BMT kimi böyük təşkilatın qərarına o zamanda,hətta bu gündə Ermənistan silahlı qüvvələri uymur, atəşkəsi hər daim pozurdur.Azərbaycanın ərazi toxunulmazlığını yenidən təsdiq edən bu dörd qətnamədə dərhal atəşkəsin elan olunması, hərbi əməliyyatlara son qoyulması və işğalçı qüvvələrin Azərbaycanın ərazisindən çıxarılması tələbləri irəli sürülüb, qətnamələrin müddəaları uzun illər yerinə yetirilməyib və Azərbaycan özü 44 günlük Vətən müharibəsində sözügedən qətnamələrin müddəalarını yerinə yetirib, torpaqlarını işğaldan azad edib. BMT Azərbaycanın ərazi bütövlüyünü hər zaman dəstəkləyib, Qarabağın Azərbaycanın suveren ərazisi olduğunu rəsmən bəyan edib...
Azərbaycanın BMT-dəki növbəti uğuru...
Dövlətimiz 30 ildir ki, BMT ilə sıx əməkdaşlıq edir. Torpaqlarımız işğalda olduğu dövrlərdə də, azad ediləndən sonra da, indi də dövlətimiz daim öz haqlı və ədalətli mövqeyi ilə BMT-də öz yerini tutur. 30 ildən çoxdur ki, erməni mafiyasının, lobbi və diaspor təşkilatının yalan, saxtakarlıq dolu müraciətlərinə baxmayaraq, BMT yenə də Azərbaycana qarşı mövqeyini dəyişmir. Doğrudur, işğalçı Ermənistana qarşı da heç bir tədbir görmədi...Ermənilər və onların havadarları dəfələrlə Azərbaycana qarşı qondarma ittihamlarla BMT-nin qapısını döyüblər, amma istədiklərinə nail ola bilməyiblər.
Bildiyimiz kimi, BMT Təhlükəsizlik Şurası ermənilərin yaşadığı Azərbaycanın Qarabağ bölgəsini Ermənistanla birləşdirən Laçın-Xankəndi yolunun guya “bağlanmasından” sonra yaranmış “humanitar böhranı”n müzakirəsi üçün təcili iclas keçirdi. Təcili iclas Ermənistanın müraciəti əsasında baş tutsa da, ermənilər istədiklərinə nail ola bilmədilər. Çünki Azərbaycanın BMT-dəki daimi nümayəndəsi Yaşar Əliyev faktlarla qarşı tərəfin yalanını ifşa etdi, Ermənistanın ölkəmizə qarşı təbliğ etdiyi “blokada” və ya “humanitar böhran” ilə bağlı bütün əsassız və sübutu olmayan iddiaları qətiyyətlə rədd etdi. Məlumat verdi ki, Ermənistanın humanitar məsələ kimi təqdim etməyə çalışdığı əslində Azərbaycanın suverenliyinə və ərazi bütövlüyünə xələl gətirmək üçün aparılan təxribat xarakterli və məsuliyyətsiz siyasi kampaniyadır.
Bütün dünya bir daha bildi ki, orada yaşayan etnik ermənilər Azərbaycanın sakinləridir, Azərbaycan hökuməti bu sakinlərin zəruri mallara çıxışını təmin etmək, onlar üçün müvafiq yaşayış şəraiti yaratmaq əzmindədir. “Bu məqsədlər beynəlxalq hüquqa və beynəlxalq humanitar hüququn prinsiplərinə tam uyğundur ki, bu da Azərbaycanın sözügedən standartlara riayət etməkdə sarsılmaz sadiqliyini nümayiş etdirir”. Bunu Y.Əliyev bildirirdi.
Məlum olduğu kimi, BMT Təhlükəsizlik Şurasının iclasında iştirak edən dövlətlərin əksəriyyəti Ermənistana, ermənilərə və onların havadarlarına mesaj verdilər ki, himanitar məsələni siyasiləşdirmək olmaz və bu məsələ Azərbaycanın daxili işidir, daxildə həll olunmalıdır.
Ermənilər elə zənn edirdilər ki, bu dəfə də havadarlarının şantaj və rüşvət mexanizmi işə yarayacaq, Azərbaycanın əleyhinə hansısa qərar qəbul ediləcək. Amma gördüyümüz kimi, cəhdləri alınmadı. Əlbəttə, bu Azərbaycanın xarici siyasətinin, diplomatiyasının gücünün göstəricisi olmaqla yanaşı həm də dövlətimizin BMT institutları ilə uzunmüddətli səmərəli əməkdaşlığının nəticəsi kimi qəbul edilməlidir. Ermənilərin səyləri alınmadı, onlar məyus vəziyyətdə əlləri ətəklərindən uzun geri qayıtdılar. Çünki artıq dünya dəyişir və kimin yalan, kimin doğru danışdığı tez zamanda bilinir. Ekspertlər haqlı olaraq deyirlər ki, BMT TŞ-da Ermənistanın və Fransanın xəyalları puça çıxdı, separatçılar çox ciddi zərbə aldılar, bu iclas bir daha kimin kim olduğunu göstərdi, Azərbaycanın diplomatiok sahədə növbəti qələbəsini ortaya qoydu.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
