Zaur İbrahimov: “Bu konkret informasiya təxribatıdır”
“Sputnik Armenia” Azərbaycana qarşı təxribatçı niyyətlərini davam etdirir. Bu media qurumu Azərbaycanla Ermənistan arasında başlanan sülh prosesinə qarşı yönəlmiş informasiya manipulyasiyasını və təxribatını hər fürsətdə ortaya qoyur.
Peyk görüntülərinə istinad etdiyini bildirən saytın iddiasına görə, Azərbaycan Ermənistan ərazisinin dərinliklərində mövqeyini genişləndirib və gücləndirib. Guya Azərbaycan Sünikdə yerləşən bu ərazini 2021-ci ildən sonra işğal edib.
“Digər məsələlərlə yanaşı, 2025-ci ilin may və iyul aylarına aid peyk şəkillərini araşdırılıb. Şəkillərin müqayisəsi nəzərəçarpacaq bir dəyişiklik olduğunu göstərir: iki ay ərzində giriş yolları genişləndirilib, xəndəklər qazılıb və yeni istehkamlar tikilib. İyul ayında çəkilmiş şəkil də davam edən işlərin əlamətlərini göstərir.
Qeyd etmək lazımdır ki, delimitasiya prosesinin bir hissəsi olaraq, Ermənistan və Azərbaycan delimitasiya proseslərinin SSRİ-nin dağılması zamanı mövcud olan Sovet respublikaları arasındakı sərhədlərə əsaslanması barədə razılığa gəliblər. 2024-cü ildə Tavuşda təxminən 12 kilometrlik sərhəd artıq Sovet xəritələrinə əsasən razılaşdırılıb. Lakin Google Maps ilə 1974-cü ilə aid Sovet Baş Qərargahının xəritəsini müqayisə etdikdə məlum olur ki, Azərbaycan Silahlı Qüvvələrinin bu mövqeyi Ermənistan ərazisində, sərhəddən təxminən 3 kilometr aralıda yerləşir. Müvafiq olaraq, Sovet xəritələrinə əsaslanan gələcək delimitasiya İrəvanın bu ərazi üzərində suverenliyinə etiraz etmək üçün heç bir hüquqi əsas qoymur" – deyə sayt yazır.
“Sputnik Armenia” ilk dəfə deyil ki, belə təxribatçı xəbər yayır. Sayt dəfələrlə iki ölkə arasında sülhü hədəf alan yalan və təxribatçı xəbərlər yayıb. Yenə də Kremlə bağlı “Sputnik Armenia” Azərbaycanla aranı yenə qarışdırmağa çalışır.
Azərbaycanla münasibətlərə bunun nə dərəcədə aidiyyəti var? Ola bilərmi ki, bu həm də Azərbaycanla münasibətlərin köklü sürətdə yenidən qurulmasını nəzərdə tutur?
Politoloq Zaur İbrahimov baki-xeber.com-a bildirdi ki, Azərbaycan və Ermənistan şərti dövlət sərhəddinin delimitasiya və demarkasiyası üçün əhəmiyyətli addımlar atıblar. “Sərhədlərin dəqiqləşdirilməsi ilə bağlı birgə yaradılan komissiya bütün normativ aktları dəqiqləşdirib, hazırda razılaşdırmış sənədlər şərti dövlət sərhəddinin 984 kilometrini xəritə üzərində delimitasiya və demarkasiya aparmağa imkan verir. Eyni zamanda ölkələrimiz arasında 12, 5 metr sərhəd xətti dəqiqləşdirilib və sərhəd dirəkləri quraşdırılıb. Eyni zamanda sərhədlərin dəqiqləşdirilməsi, delimitasiya və demarkasiyası, həmçinin sərhəd təhlükəsizliyi ilə əlaqədar yaradılan komissiyası normativ aktları da razılaşdırıb. Bu normativ aktlar imkan verir verir ki, ölkələrimiz arasındakı sərhəddin 984 kilometri xəritələr üzərində işlənilməklə dəqiqləşdirilsin. Bu çox ciddi addımdır. Eyni zamanda artıq Gürcüstan sərhəddindən başlayaraq cənuba doğru demarkasiya və delimitasiya prosesinin aparılması da razılaşdırılıb. Ermənistanın 2031-ci ilə qədərki hökumət proqramında da bu məsələ öz əksini tapıb. Beləliklə proses dinamik şəkildə gedir. Güman etmək olar ki, yaxın vaxtlarda tərəflər bu istiqamətdə praltiki addımlar atacaq. “Sputnik Armenia” isə dəfələrlə olduğu kimi, artıq formalaşmış etimad mühitinə zərbə vurmağa çalışır. Bu konkret informasiya təxribatıdır. Təsadüfi deyil ki, bu cür informasiya təxribatları Paşinyan hökumətinin avqustun 25-də açıqlananan 5 illik proqramından sonra daha da intensivləşib. Çünki həmin proqramın prioritetləri Azərbaycanla sülh gündəliyini davam etdirmək, Türkiyə ilə münasibətləri normallaşdırmaq, əməkdaşlığı bərpa etməkdir. Həmçinin Zəngəzur dəhlizinin açılması ilə bağlı praktik addınların atılmasıdır. Bütün bunlar isə görünür ki, “Sputnik Armenia”nı və onun arxasında duran qüvvələri qıcıqlandırır. Lakin qeyd etmək lazımdır ki, Azərbaycan ictimaiyyətində bununla bağlı artıq ciddi immunitet var və görünən budur ki, Ermənistan cəmiyyəti də bu istiqamətdə yetkinləşir. Yəni artıq bu cür informasiyalar Ermənistan cəmiyyətində əvvəkli qədər rezonans yaratmır. Bu da kifayət qədər müsbət addımdır.
Gözləmək olar ki, bu cür təxribatlar daha da intensivləşəcək. Lakin hesab edirəm ki, həm Azərbaycanda olan ictimai ab-hava, həmçinin Ermənistanda müşahidə etdiyimiz proseslər bu cür informasiya təxribatlarının nəticələrini puça çıxaracaq. Yəni heç bir ciddi nəticə müşahidə olunmayacaq”.
Z.İbrahimov fikrincə, bu cür cəhdlərlə Azərbaycanla Ermənistan arasındakı sülh gündəliyini zədələməyin mümkün olmadığını artıq Moskvada, Kremldə başa düşməlidirlər və bu cür addımlardan əl çəkməlidirlər. “Hesab edirəm ki, Azərbaycanla Ermənistanın birgə səyləri, xüsusən də sərhəddlərin dəqiqləşdirilməsi, delimitasiya və demarkasiyası prosesi ilə bağlı məsələlə artıq hamını inandıracaq, o cümlədən Kremldə də tezliklə anlayacaqlar ki, bu cür addımlara vaxt sərf etmək əbəsdir”-deyə Z.İbrahimov qeyd etdi.
İradə SARIYEVA
