İran hökuməti ayda 110 litrdən çox yanacaq işlədən istehlakçılar üçün benzinin qiymətini artırdığını bildirib. Bu qərar ABŞ sanksiyaları və ölkə limanlarının blokadasının daxili iqtisadiyyatı sarsıtmaqda davam etdiyi bir vaxtda verilib. Hökumətin sözçüsü Fatimə Mühacirani deyib ki, 110 litrədək benzin almağa imkan verən birinci və ikinci kvotalar üzrə qiymətlər dəyişməz qalacaq.
Ancaq üçüncü kvota üzrə benzinin litrinin qiyməti iki dəfə artır və 100 min İran rialı olacaq. Bu, azad bazardakı məzənnə ilə 4.5 ABŞ senti və ya 8 qəpik deməkdir. Yeni tariflər sentyabrın 8-dən qüvvəyə minəcək. Mühacirani deyib ki, digər sürücülər əvvəlki kimi 60 litr benzinin litrini 15 min riala, əlavə 50 litrin hər litrini isə 30 min riala ala biləcəklər.
İran benzinin dünyada ən ucuz satıldığı ölkələr sırasındadır. Qiymətlərin daha geniş miqyasda artırılması müzakirə olunsa da, hakimiyyət bu addımdan çəkinib. Ehtimallara görə, rəsmilər bunun yeni küçə etirazlarına səbəb ola biləcəyindən narahat olublar. İri neft hasilatçısı olan İran uzun illərdir yanacağın qiymətini əsasən subsidiyalaşdırır. Buna görə də qiymətlərə hər hansı dəyişiklik siyasi baxımdan həssas məsələ sayılır. 2019-cu ildə benzinin qiyməti qaldırılanda ölkədə genişmiqyaslı etirazlar baş vermişdi. Bu arada, İran parlamentinin sədri Məhəmməd Baqir Qalibaf deyir ki, "mütənasib cavablar" dövrü başa çatıb, ölkəsinin maraqlarına və təhlükəsizliyinə hər hansı yeni hücuma daha sərt cavab veriləcək: "İranın maraqlarına və təhlükəsizliyinə istənilən təcavüzə daha sürətli, daha ağır və daha ağrılı cavab veriləcək". Bundan əvvəl isə ABŞ ordusu Xark və Cask adaları yaxınlığında, eləcə də Oman körfəzində üç İran neft tankerini hədəfə alaraq məhv etdiyini açıqlayıb. ABŞ Mərkəzi Komandanlığı (CENTCOM) bildirib ki, zərbələr İslam İnqilabı Keşikçiləri Korpusunun (SEPAH) ABŞ-ın iki hərbi gəmisinə ballistik raketlərlə hücumuna cavab olaraq endirilib. Həmin hücumlarda amerikalılar arasında itki olmayıb. CENTCOM komandanı Bred Kuper xəbərdarlıq edib ki, İran ABŞ gəmilərinə hücumları dayandırmasa, bunun iqtisadi nəticələri daha ağır olacaq, İranın neft tankerləri sıradan çıxarılacaq. İran Xarici İşlər Nazirliyi isə ABŞ zərbələrini "qanunsuz və təcavüzkar" adlandırıb. İranın mərkəzi hərbi komandanlığı olan "Xatəmül-Ənbiya" Mərkəzi Qərargahının sözçüsü bildirib ki, dəniz blokadası davam edərsə, ABŞ qüvvələrinə hücumlar daha da şiddətlənə və genişlənə bilər.
Ramil QULİYEV
