Elşad Həsənov: “Rusiyanın hava məkanı bağlı olmadığı üçün nəqliyyat təyyarələri çoxsaylı dronların hədəfi ola bilər”
Ukrayna prezidenti Volodimir Zelenski mülki aviaşirkətlərə Rusiyanın hava məkanının təhlükəli olması barədə xəbərdarlıq edib. Bundan sonra ölkədə çoxsaylı reyslərin ləğv edildiyi, aeroportların bağlandığı xəbərləri gəlib. Bir sıra xarici aviaşirkətlər Rusiyaya uçuşlardan imtina ediblər.
Məlumata görə, söhbət fəaliyyətin müvəqqəti pozulmasından yox, onun həftənin yeddi günü, sutkanın 24 saatı bloklanmasından gedir. Strategiya bu hava limanlarını istifadəyə yararsız hala salmaqdır.
Maraqlıdır, dron hücumlarının sayı və intensivliyi artarsa, Ukrayna Rusiyada mülki uçuşları tam və ya əhəmiyyətli dərəcədə dayandıra bilərmi?
Sözügedən məsələyə aydınlıq gətirən siyasi ekspert Elşad Həsənov baki-xeber.com-a açıqlamasında prinsipcə, bunu istisna etmədi: “Rusiya-Ukrayna müharibəsi 4 il yarımdır davam edir. Bu müddət ərzində müharibənin miqyası, tətbiq olunan silah növləri, savaşın arealı sürətlə dəyişir. Son aylar müharibə təkcə Ukrayna ərazisində deyil, həm də Rusiya ərazisində aparılır. Söhbət Rusiyanın dərinliklərində yerləşən obyektlərə Ukraynanın endirdiyi uğurlu zərbələrdən gedir. Ukrayna birinci Rusiyanın iri neft emalı zavodlarını vurmağa başladı və bunun fəsadları dərhal özünü göstərdi. Rusiyada ciddi yanacaq çatışmazlığı yarandı və bu, uzun növbələrin yaranmasına səbəb oldu. Daha sonra Ukrayna Rusiyanın elektron ticarət infrastrukturuna qarşı dron kampaniyasını genişləndirdi. Ukrayna “Wildberries” elektron ticarət şəbəkəsinin 20-yə yaxın iri logistika mərkəzini məhv edib. Ondan sonra Rusiyanın ikinci ən böyük onlayn marketpleysi olan Ozon-un logistika şəbəkəsini hədəf alaraq həmin mərkəzlərinə zərbələr endirməyə başladı. Bu, “Wildberries” obyektlərinə hücumlardan sonra yeni mərhələdir. Bütün bu zərbələr Rusiyaya on milyardlarla dollar zərər vurub. Artıq butan bu zərbələr həm Rusiya iqtisadiyyatında özünü daha qabarıq biruzə verir, həm də ictimai narazılıqların artmasında özünü göstərir. Digər tərəfdən, 2022-ci ilin fevralında müharibə başlayandan bəri Ukraynanın hava məkanı bağlıdır. Yalnız Ukraynanın qırıcı təyyarələri ölkənin hava məkanından istifadə edir. Ölkəyə xaricdən gediş-gəliş qatarlarla və avtomobillərlə təmin edilir. Ancaq bu müddət ərzində Rusiyanın hava məkanı bağlı olmayıb. Ölkədaxili və xarici dövlətlərə aviareyslər həyata keçirilir. Düzdür, bir sıra hallarda hava limanlarında fasilələr yaranıb, amma aviareyslər davam edib. Rusiya ərazisinə görə dünyada birinci dövlət olduğu üçün sərnişinlərin daşınmasında təyyarələrin önəmi olduqca böyükdür. Lakin Ukraynanın Rusiyaya yönəlik dron hücumlarını artırması və Zelenskinin xəbərdarlıq etməsi ciddi məqamlardan xəbər verir. Bu, o deməkdir ki, mülki təyyarələr artıq əvvəlki kimi sərbəst uça bilməyəcəklər. Bu, o demək deyil ki, Ukrayna mülki təyyarələri hədəf alacaq. Təbii ki, yox. Sadəcə, Rusiyanın hava məkanı bağlı olmadığı üçün nəqliyyat təyyarələri çoxsaylı dronların hədəfi ola bilər. Çünki Ukrayna Rusiyaya gündə 1000 dron buraxmağı qarşısına məqsəd qoyub. Bu xəbərdarlığa bir sıra xarici aviaşirkətlər dərhal reaksiya verdilər və uçuşlardan imtina etdilər. Çünki mülki vətəndaşların həyatını təhlükəyə ata bilməzdilər. Aviadaşımaların pozulmasının zərəri Rusiya üçün qat-qat böyük olacaq. Onsuz da müharibəyə görə Avropa Rusiyaya uçuşları dayandırıb. Asiya və digər ölkələr də uçuşları dayandırsa və yaxud da onların sayını kəskin azaltsa, xarici şirkətlər ölkədaxili reyslərdən imtina etsə, Rusiya bunun altından çıxa bilməyəcək. Artıq bunun əlamətləri özünü real olaraq özünü göstərməkdədir. Ona görə də bu, çox ciddi məsələdir və belə davam edərsə, ölkə daxilində narazılıqlar kəskin arta bilər. Hətta bu, Rusiyada xaosa səbəb ola bilər”.
Vidadi ORDAHALLI
