Nadir Azəri: “Azərbaycanın uğurlarını həzm edə bilməyən qüvvələr növbəti dəfə də məğlub olacaqlar”
Azərbaycan Respublikasının Medianın İnkişafı Agentliyi (MEDİA) sentyabrın 3-də rəsmi bəyanat yayaraq, mənzil-qərargahı Polşada yerləşən “Nexta” kanalı, Polşanın TVP telekanalı və digər Qərb media resursları tərəfindən Azərbaycana qarşı mütəşəkkil dezinformasiya və hibrid informasiya kampaniyası aparıldığını bildirib.
Agentliyin yaydığı bəyanatın əsas məqamları bunlardır. “Polşada fəaliyyət göstərən “Nexta” platforması Goranboy rayonunun Nizami kəndi yaxınlığında baş vermiş sursat partlayışı/yanğın hadisəsini subyektiv mülahizələrə əsaslandıraraq dövlətlərarası (Bakı-Moskva) siyasi münasibətlər fonunda təqdim etməyə çalışıb və ictimai rəyi çaşdırmağa yönəlmiş məlumat yayıb”.
MEDİA qeyd edib ki, ümumi informasiya mühitinin monitorinqi bu fəaliyyətlərin vahid mərkəzdən idarə olunan hibrid informasiya kampaniyasının tərkib hissəsi olduğunu göstərir.
Azərbaycanın beynəlxalq imicini zədələməyə yönələn bu informasiya hücumunda Polşanın dövlət televiziyası TVP ilə yanaşı, Böyük Britaniyanın The Independent, The Guardian qəzetləri və BBC teleradio şirkəti, ABŞ-nin CNN telekanalı, eləcə də Fransanın Le Monde qəzeti ittiham olunub.
MEDİA bəyan edib ki, bu cür klassik dezinformasiya halları regionda sabitliyin möhkəmlənməsinə mane olmaq, ölkənin informasiya məkanını çirkləndirmək və cəmiyyətdə süni təşviş yaratmaq məqsədi daşıyır.
Agentlik bu növ dezinformasiya cəhdlərinin qarşısının alınması və araşdırılması istiqamətində lazımi tədbirlərin görüləcəyini vurğulayıb.
Bu media orqanlarının Azərbaycana qarşı qərəzli davranışları, yazıları məlumdur. Ermənistanla müharibə dövründə səbəb bəlli idi və bilirdik ki, bu dezinformasiyalar, ölkəmizi qaralayan bu yazılar erməni lobbisinin təsiri altında yazılır. İndi niyə bu media orqanları bizə qarşı qərəz nümayiş etdirir? İndi hansı qüvvələrin təhriki ilə Azərbaycana qarşı işləyirlər?
"Orta Asiya və Güney Qafqaz Söz Azadlığı Şəbəkəsi" İctimai Birliyinin sədri, siyasi şərhçi Nadir Azəri baki-xeber.com-a bildirib ki, burada Azərbaycanın uğurlarını həzm edə bilməyən qüvvələrin birmənalı olaraq əli var. “Bu, danılmaz həqiqətdir ki, Azərbaycanın əldə etdiyi uğurlar dostlarımızı nə qədər sevindirirsə, düşmənlərimizi bir o qədər məyus edir. Lakin həmin qüvvələr bununla kifayətlənmir, Azərbaycanın qazandığı uğurlara mane olmaq, əldə olunan nəticələrin qarşısını almaq üçün müxtəlif çirkin üsullara əl atırlar”.
O, qeyd edib ki, Azərbaycanın hədəfə alınması Qərbdəki anti-Azərbaycan dairələrinin ənənəvi fəaliyyət istiqamətlərindən biridir.
N.Azəri vurğulayıb ki, Azərbaycan həm işğal dövründə, həm də 44 günlük Vətən müharibəsi zamanı bu cür təzyiqlərin və informasiya hücumlarının dəfələrlə şahidi olub: “44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə Azərbaycan Ordusu düşmənlə üz-üzə cəbhədə qəhrəmanlıq göstərərək tarixi Zəfər qazandı. Eyni zamanda, cənab Prezidentin qətiyyəti, liderliyi və prinsipial mövqeyi sayəsində biz arxa cəbhədə – informasiya savaşında da Qərbin anti-Azərbaycan və erməni lobbisinə bağlı dairələrinə qarşı ciddi mübarizə apardıq və qalib gəldik.
Bəlli bir dövrdən sonra bu hücumlar səngisə də, son vaxtlar onların yenidən intensivləşdiyini görürük. Bu prosesdə Polşanın daha çox önə çıxması isə təsadüfi deyil. Çünki Polşa uzun müddətdir Qərbdəki anti-Azərbaycan dairələrinin müəyyən maraqlarının ifadə olunduğu platformalardan birinə çevrilib.
Digər tərəfdən, Polşanın regionla bağlı öz maraqları da mövcuddur. İstər Polşa, istərsə də onun arxasında dayanan bəzi dairələr Cənubi Qafqazda sülhün, sabitliyin və iqtisadi inkişafın təmin olunmasında maraqlı görünmürlər. Çünki onların siyasəti çox zaman qarşıdurma və gərginlik üzərindən qurulur.
Azərbaycan isə bunun tam əksinə olaraq, 44 günlük Vətən müharibəsində qalib gəlməsinə baxmayaraq, sülhə sadiqliyini qoruyub saxladı. Cənab Prezident dəfələrlə Azərbaycanın yaratdığı yeni reallıqlar fonunda Cənubi Qafqazda davamlı sülhün, sabitliyin və iqtisadi inkişafın mümkün olduğunu bəyan edib. Bu gün artıq dünyanın böyük hissəsi də məhz bu yanaşmanın regionun gələcəyi üçün əsas olduğunu qəbul edir.
Bunu qəbul etmək istəməyən isə bəlli anti-Azərbaycan dairələridir. Lakin mən hesab edirəm ki, onlar necə indiyədək məğlub olublarsa, bu dəfə də məğlub olacaqlar. Üstəlik, bu məğlubiyyət əvvəlkilərdən daha ciddi olacaq. Onlar təkcə Azərbaycan ictimaiyyətinin deyil, bütövlükdə dünya ictimaiyyətinin, eləcə də regionda sabitlik və sülhün təmin olunmasında maraqlı olan Ermənistandakı cəmiyyətinin sülh istəyən kəsiminin də ciddi etirazı ilə üzləşəcəklər.
Belə qüvvələr anlamalıdırlar ki, Azərbaycan haqqında əsassız və təhqiramiz bəyanatlar səsləndirmək, Azərbaycanı hədəf göstərmək yalnız qarşı tərəfin özünə ziyan vurur. Azərbaycan həm cəbhədə, həm də informasiya məkanında öz mövqeyini qorumağı bacaran dövlətdir.
Bizim dəmir yumruğumuz cəbhədə olduğu kimi, informasiya cəbhəsində də yerindədir. Azərbaycana qarşı düşmən mövqe sərgiləyən bütün qüvvələr gec-tez bunun siyasi və ictimai nəticələri ilə üzləşməli olacaqlar”.
İradə SARIYEVA
