Kreml Ukrayna ilə bağlı sülh sazişi ehtimalını istisna etmir, lakin hazırda bunun üçün konkret zəmin görmür. Dmitri Peskovun sözlərinə görə, Rusiya və ABŞ arasında vasitəçilik səyləri davam edir, Moskva da danışıqlar yolu ilə həllə hazır olduğunu bildirir.
Peskov qeyd edib ki, ABŞ-ın vasitəçilik səylərini davam etdirmək niyyəti qalır. Eyni zamanda, Rusiyanın Ukrayna müharibəsi ilə bağlı əvvəl açıqlanmış mövqeyi dəyişməyib və Kiyev bu mövqedən xəbərdardır.
Peskov Rusiyanın sülh yolu ilə nizamlanmaya hazır olduğunu bildirsə də, Rusiya üçün məqbul olan yeni sülh təşəbbüsünün və ya danışıqlarda yeni imkanların yaranmadığını açıqlayıb. Bu açıqlama fonunda belə nəticəyə gəlmək olarmı ki, Moskva hazırda real kompromisə və sülh sazişinə hazır deyil, yoxsa Rusiya sadəcə öz şərtlərinin qəbul olunacağı bir razılaşma gözləyir?
İlqar Vəlizadə: "Cəbhədə real dəyişiklik olmasa, tərəflər kompromisə getməyə məcbur qala bilər"
Politoloq İlqar Vəlizadə məsələ ilə bağlı "Bakı-Xəbər" qəzetinə açıqlamasında bildirib ki, münaqişələrdə tərəflər, bir qayda olaraq, diametral əks mövqelərdən çıxış edir və danışıqlar masasına maksimum tələblərlə gəlirlər.
Onun sözlərinə görə, son nəticədə müharibə və qarşıdurmada kimin daha güclü olması tərəflərin danışıqlardakı mövqeyinə də ciddi təsir göstərir:
"Azərbaycan-Ermənistan münaqişəsində də biz bunun şahidi olduq. Ermənistan tərəfi müəyyən tələblər irəli sürürdü, lakin nəticə etibarilə hərbi qarşıdurmada kim güclüdürsə, onun mövqeyi daha təsirli olur".
Politoloq hesab edir ki, hazırda Rusiya-Ukrayna müharibəsində də hər iki tərəfin mövqelərində müəyyən sarsılmalar müşahidə olunur. Onun fikrincə, hərbi baxımdan tərəflər arasında nisbi tarazlıq yaranıb. Ukrayna Qərbdən maliyyə və hərbi-texniki dəstək alsa da, cəbhədə hələlik vəziyyəti köklü şəkildə dəyişə bilməyib.
İlqar Vəlizadə qeyd edib ki, yaxın aylarda cəbhədə real dəyişiklik baş verməzsə, tərəflərin kompromisə getmək ehtimalı arta bilər. Xüsusilə gələn ilin yazına qədər hərbi sahədə ciddi nəticə əldə olunmasa, həm Rusiya, həm də Ukrayna müəyyən kompromislərə getməyə məcbur qala bilər.
"Əgər cəbhədə real dəyişikliklər baş verərsə, məsələn, Ukrayna üstünlük əldə edər və Rusiyanın zərbələrinin effektivliyini azaldarsa, bu halda Moskvanın mövqeyində də dəyişikliklər mümkündür. Əksinə, hazırda Rusiya Ukraynanı ciddi təzyiq altında saxlayır. Ukraynanın limanlarının fəaliyyətinə maneələr yaranır, dəniz magistralları və infrastruktur obyektləri hədəfə alınır. Eyni zamanda, şəhərlərə və mülki infrastruktura zərbələr davam edir. Əsas məsələ Ukraynanın bu zərbələrə nə dərəcədə tab gətirə bilməsidir".
Politoloqun fikrincə, bütün bunlar gələcək danışıqların şərtlərinə birbaşa təsir göstərəcək. Hazırda tərəflərin mövqeləri müəyyən mənada bir-birinə yaxındır və nisbi tarazlıq müşahidə olunur. Lakin qarşıdakı bir neçə ay ərzində cəbhədə vəziyyət dəyişə bilər ki, bu dəyişikliklər danışıqlar prosesində tərəflərin mövqelərinə də təsir göstərəcək.
Akif NƏSİRLİ
