Proseslərin gedişi göstərir ki, Qarabağ separatçıları ətrafında halqa getdikcə daralır. Artıq separatçılar da bunu anlamağa başlayıblar. Çünki iki ildən sonra rus sülhməramlıları Qarabağı tərk edəcək. Ermənistan Qarabağ separatçılarına əvvəlki kimi dəstək verə bilmir.
Ona görə ki, aprelin 23-də Laçın yolunun başlanğıcında post qurulub. Bu o deməkdir ki, əvvəlki kimi həmin yolla silah daşımaq mümkün deyil. Belə olan halda Qarabağ ermənilərinin yeganə çıxış yolu Azərbaycana inteqrasiya olmaqdan keçir. Ya Azərbaycanın şətlərini qəbul etməlidilər, ya da oranı tərk etməlidilər.
Bu arada erməni mətbuatı yazır ki, Ermənistan rəsmiləri Rusiya sülhməramlılarının müvəqqəti yerləşdirildiyi Azərbaycan ərazilərindəki separatçı rejimin zənglərinə cavab vermir. Qeyd edilir ki, bu səbəbdən separatçı rejim ümidsizliyə qapılıb: “Əvvəllər bütün idarələrin bir-biri ilə sıx əlaqələri olub, istənilən məsələ tez həllini tapıb. İndi sadəcə zənglərə cavab vermirlər”.
Bundan əvvəl “Hraparak” qəzeti yazıb ki, Ermənistan hakimiyyəti separatçıların “rəhbəri” Arayik Arutyunyanı seçim qarşısında qoyub. O ya Bakı ilə danışıqlara başlamalı, ya da ermənilərin Qarabağdan çıxarılmasını qəbul etməlidir.
“Birləşmiş Ştatlar bu yöndə Paşinyan hakimiyyətinə təzyiq edir”
Sözügedən məsələ ilə bağlı fikirlərini “Bakı-Xəbər”lə bölüşən sabiq millət vəkili, hüquqşünas Qulamhüseyn Əlibəyli hesab edir ki, separatçılar getdikcə Ermənistandan əlini üzür: “Çünki Qarabağda separatçılar ətrafında gedən oyunlar artıq bitmək üzrədir. Ona görə ki, 44 günlük Vətən müharibəsi zamanı Azərbaycan öz sözünü deyib. Ətraf 7 rayon tam azad edilib. Şuşa daxil Qarabağın əhəmiyyətli hissəsi separatçılardan təmizlənib. Əvvəlki kimi Ermənistanla sərbəst əlaqələrdən məhrum olublar. Üstəlik, Birləşmiş Ştatlar bu yöndə Paşinyan hakimiyyətinə təzyiq edir. Məhz bunun nəticəsidir ki, Paşinyan Qarabağın Azərbaycanın tərkib hissəsi olduğunu bəyan etdi. Hesab edirəm ki, məhz Vaşinqtonun səyləri sayəsində Ermənistan hakimiyyəti bu addımları atır. Vaşinqton Qarabağ ermənilərinin Azərbaycanın suverenliyi altında olmasında maraqlıdır. Hamı çalışır ki, Azərbaycanın ərazi bütövlüyü tam şəkildə təmin olunsun. O cümlədən, Avropa İttifaqı da maraqlıdır ki, məsələ ölkəmizin suverenliyi çərçivəsində birdəfəlik həll olunsun. Çünki regionda gərginlik Avroittifaqın maraqlarına cavab vermir. Bu səbəbdən Ermənistan hakimiyyəti separatçılara təzyiq edir ki, Azərbaycan hakimiyyəti ilə ortaq məxrəcə gəlin. Separatçılar bundan yayınmaq üçün Rusiyaya yalvarırlar. Çünki yaxşı bilirlər ki, Rusiya hakimiyyəti Qarabağ məsələsində konstruktiv mövqedən çıxış etmir. Rusiya məsələnin birdəfəlik həllini istəmir. Təsadüfi deyil ki, bu günlərdə Araik Rusiya prezidenti Vladimir Putinə məktub göndərdi. Gələcəklərinin dumanlı olduğunu görüb Rusiyadan mədət umurlar. Ancaq Rusiya daim erməni separatçılarını himayə etsə də, indiki halda onları qoruya bilməyəcək. Ukraynada yaranmış vəziyyət Rusiyanı elə vəziyyətə salıb ki, artıq onların əvvəlki gücü yoxdur. Azərbaycan addım-addım öz planlarını reallaşdırır. Bu baxımdan Xankəndiyə nəzarət zaman məsələsidir. Ən uzağı 2025-ci ilin sonunda bu məsələ öz həllini tapacaq”.
Vidadi ORDAHALLI
