Ermənistanın Baş nazir səlahiyyətlərini icra edən Nikol Paşinyan eks-prezident Serj Sarkisyanın “Oğlun Aşotu Azərbaycanda saxlanılan 20-25 erməni əsgərinə dəyiş” təklifinə cavab verib.
Paşinyan bu təkliflə razı olduğunu deyərək, Sarkisyanla Robert Köçəryanı “sutenyor və insan alverçiləri” adlandırıb:
“Sənə, uzun illərin rəsmi sutenyoruna və insan alveri üzrə mütəxəssisə deyirəm ki, mən buna razıyam. Və rəsmi olaraq Əliyevə deyirəm – bütün əsirlərin əvəzinə oğlumu təklif edirəm. Rəsmi olaraq deyirəm. Serjik və Robik, insanların alqı-satqısı üzrə mütəxəssislər olaraq sizə bu məsələ ilə bağlı danışıqlar aparmaq səlahiyyəti verirəm. Əgər bu işdən bir neçə min dollar qazansanız lap yerinə düşəcək”.
Köçəryanın tənqidlərinə və onu duelə çağırmasına cavab olaraq isə Paşinyan bildirib ki, birdən bu təklifə razı olar, silahı götürər və darağı onun alnına boşaldar:
“Bundan sonra bunun da zorakılıq olduğunu söyləyəcəksiniz, qatillər?”.
Qeyd edək ki, Paşinyan bundan əvvəl də oğlundan siyasi məqsədlər üçün istifadə edib. Onu, güya könüllü olaraq Qarabağda hərbi xidmət keçməyə göndərmişdi və bunu əsl piar vasitəsinə çevirdi. Sonra məlum oldu ki, sən demə, onun oğlunun sadəcə adı Qarabağda hərbi xidmətdə olub. Əslində isə İrəvanda istirahət edib. Paşinyanın oğlundan siyasi məqsədlər üçün istifadə etməsi ilə bağlı ekspertlərin fikri nədir?
Politoloq Elşən Mustafayev “Bakı-Xəbər”ə açıqlamasında bildirdi ki, bu açıqlamadan Ermənistandakı vəziyyətin çox gərgin olduğu aydın görünür: “Belə sərt fikirlər daha çox siyasi populizm nümunəsidir. Çünki seçkiyə qalan vaxt azaldıqca ritorikadakı sərtlik də artan xətt üzrə gedir. Faktiki olaraq, namizədlər bir-birini küçə söyüşlərilə təhqir edir. Paşinyanın oğlunu diversantlara dəyişməyə hazır olması blefdən başqa nəsə deyil. O bilir ki, Azərbaycan buna gedən deyil. Çünki bizdə bu məsələlər çəngəllik qanunları ilə deyil, hüquqla tənzimlənir. Azərbaycanda həbsdə olan diversantlar antiterror əməliyyatları nəticəsində həbs edilib. Onlara qarşı Azərbaycan qanunlarına əsaslanmaqla rəsmi ittiham elan olunub. Yaxınlarda mühakimə edilərək, konkret cəzalara məhkum ediləcəklər. Paşinyanın təklifindən görünür ki, onlar ölkəni qanunlarla deyil, hisslərilə idarə edirlər. Paşinyan bununla özünə seçkiqbağı dividend qazanmaq istəyir. Oğlunu qurban verməyə hazır idisə, müharibə zamanı ön cəbhəyə göndərərdi. Həmin vaxt onu öz yanında saxladı. Belə blefləri Paşinyan ailəsi tez-tez edir. Onun həyat yoldaşı da bir vaxtlar əlində silah Qarabağda poz verirdi. Sonunu gördük. Bu baxımdan da, Paşinyanın oğlundan siyasi məqsədlər üçün istifadə etməsinə onun bütün imkanlarının tükəndiyi kontekstindən yanaşa bilərik”.
Məhəmmədəli QƏRİBLİ
