Livanlı erməni Vətən müharibəsində Azərbaycanı muzdlu döyüşçülərə görə əsassız ittiham edənləri ifşa etdi... Yasamal Məhkəməsi dünyanın diqqətində...

Rövşən Rəsulov: “Yasamal Rayon Məhkəməsində erməni terrorçularının mühakiməsi ilə yanaşı, həm də sübut olundu ki...”

img

Yasamal Rayon Məhkəməsində Azərbaycana qarşı terrorçuluqda təqsirləndirilən Livan vətəndaşının məhkəmə iclasında onun qanunsuz yaşadığı Maral Nazaryanın istintaqa verdiyi videoifadə elan olunub.

M.Nazaryan bildirib ki, təqsirləndirilən şəxs pul müqabilində Qarabağda azərbaycanlılara qarşı döyüşüb: “Eulcekcian Viken Abrahamla biz Beyrutdan Ermənistana gəldik və oteldə yerləşdirildik. Daha sonra bizi Şuşadakı otelə yerləşdirdilər. Həmin vaxt o, Hovak adlı Livan vətəndaşı ilə telefonla danışdı. Hovak ona təklif etdi ki, müharibədə döyüşmək üçün ayda 2000-2500 dollar verirlər. Bundan əlavə, maaş da verəcəklər. Viken onunla razılaşdı. Mən ona etiraz etdim ki, sən Ermənistan vətəndaşı deyilsən və bu, gələcəkdə bizə problem yaradacaq. Çünki biz yenidən Livana qayıtmaq istəyirdik. Amma pandemiyaya görə qalmışdıq. Biz müharibədən əvvəl Livana qayıtmaq istəsək də, onun sənədləri düz olmadığı üçün buraxmadılar. Mən də Livana gedib bir müddət qalandan sonra Ermənistana qayıtmalı oldum.

Müharibə başlayanda Viken döyüşlərə getdi. 3-4 gündən sonra qayıtdı və dedi ki, azərbaycanlılar çox güclüdürlər, muzdlular hamısı öldü, mən qaçdım. Biz daha sonra Laçına gəldik. Noyabrın 10-da eşitdik ki, müharibə qurtarıb. Biz Şuşadakı oteldən əşyalarımızı götürməyə gələndə Azərbaycan hərbçiləri bizi tutdular. Vikenin telefonunda döyüşdüyü şəkilləri görüb onu saxladılar”.

Prosesdə əvvəlcə Maral Nazaryanın ifadəsi ilə razılaşmayan təqsirləndirilən şəxs Eulcekcian Viken Abraham prosesdə onun səngərdən video və fotoları nümayiş olunandan sonra ittihamlarla razılaşmalı olub. Bildirib ki, guya o, səngərdə şəkil çəkdirməyə gedib, amma döyüşməyib.

  • “Onların kələflərinin bir ucu Qərbin gizli şəkildə dəstək göstərdiyi, maliyyələşdirdiyi düşərgələrə qədər gedib çıxır”

Siyasi ekspert Rövşən Rəsulov “Bakı-Xəbər”ə bildirdi ki, Azərbaycana qarşı qondarma muzdlular ittihamı irəli sürən dünya ölkələri, beynəlxalq təşkilatlar indi məhkəmədə üzə çıxan dəhşətli faktlara münasibət bildirsinlər. R.Rəsulovun sözlərinə görə, dünya Ermənistanın bu cinayətlərini də görməlidir.

“Yasamal Rayon Məhkəməsində erməni terrorçularının mühakiməsi ilə yanaşı, həm də sübut olundu ki, bu adamlar Yaxın Şərq ölkələrindən Qarabağa qanunsuz yollarla gələrək, üstəlik, 2000, 2500 ABŞ dolları müqabilində Azərbaycan Ordusuna qarşı döyüşüblər. Əslində, bu həm də bir etiraf idi ki, Ermənistanın işğalçılıq siyasəti və təcavüzü, eyni zamanda, beynəlxalq terrorçuluğun yayılmasına xidmət edib və dünya birliyi bu faktları heç də sözdə, eləcə də ötəri deyil, şiddətlə qınamalıdır”.

Onun fikrincə, dünya birliyində özünəməxsus yerlər tutan bir sıra nüfuzlu qurum və təşkilatlar, siyasi dairələr belə həssas məsələlərə etinasız yanaşmamalıdırlar, əks halda, eyni olaylar digər ölkələrə də sıçraya bilər: “Biz unutmamalıyıq ki, Suriyada, İraqda və s.Yaxın Şərq ölkələrində beynəlxalq terrorun tüğyanı yüzminlərlə insanın ölümünə səbəb oldu və təəssüf ki, bir sıra hallarda aparıcı Qərb ölkələri öz iqtisadi, siyasi maraqlarına görə bəlli qruplara istər maliyyə, istərsə də silah təminatı və başqa məsələlərdə gizli, ya da açıq dəstək də göstərirdilər. Bu gün də eyni hal yaşanır və bu dəfə Azərbaycanın qalibiyyətlə başa çatdırdığı 44 günlük müharibədə erməni işğalına son qoyması Qərbin müəyyən cinahlarını narahat etməyə başlayıb. Çünki bu terrorçular məhz xüsusi düşərgələrdə təlimlərdən keçən şəxslərdirlər və onların kələflərinin bir ucu Qərbin gizli şəkildə dəstək göstərdiyi, maliyyələşdirdiyi düşərgələrə qədər gedib çıxır.

Gəlin müqayisə aparaq. Məgər qardaş Türkiyənin artıq 40 ildən çoxdur ki, mübarizə apardığı PKK terror təşkilatının öz gücü yetərdimi ki, nəhəng, qüdrətli ordusu, iqtisadiyyatı, necə deyərlər, topu-topxanası olan bir ölkə ilə uzun illər silahlı savaş aparsın? Əlbəttə, əsla. Ancaq bu reallıqların da arxasında dəstəklər dayanmaqdadır. Misal üçün, biz unutmamalıyıq ki, artıq belə dəstəklər gizlilikdən açığa çıxmağa başlayıb. Bunu ABŞ-ın PKK-nı terrorçu təşkilatlar sırasından çıxarması ilə sübut edə bilərik.

İndi isə Azərbaycana qarşı bu qədər etinasızlığın göstərilməsi heç bir çərçivəyə sığmır və əslində, bundan da təəccüblənməməliyik. Yəni ad-ad desək, Avropa Şurasının, Avropa Parlamentinin, Avropa İttifaqının, İnsan Haqları Məhkəməsinin, eləcə də zaman-zaman bizə öz təbirlərincə dərs keçməyə cəhd göstərən, hesabatlar hazırlayan Qərb QHT-lərinin səsləri 30 ilə yaxın işğala, təcavüzə, terrora, soyqırımlara məruz qaldığımız dövrdə, ümumiyyətlə, çıxmadı. Yalnız “təəssüf hissi” və “narahatlıq” görüntüsü. Bundan sonra da onlardan hər hansı bir sərt, ciddi bəyanatları gözləməyə ehtiyac duymuram.

Bütün bunların yerinə isə Azərbaycan dövlətindən üçtərəfli atəşkəs bəyanatından sonra ərazilərimzə keçib diversiya hadisələri törədən, minalar basdıran terrorçuların azadlığa buraxılmalarını tələb etmələri sırf siyasi həyasızlıq nümunəsidir”, - deyən Rövşən Rəsulov bu məsələdə də qərəzi, birtərəfli mövqe faktorlarının səbəblərinin olduğunu vurğulayıb: “Götürək, Ermənistanın ölkəmizə mina xəritələrini israrla verməməsini. Niyə bu dairələr Ermənistandan mina xəritələrini tələb etmirlər, amma Azərbaycandan terrorçuların geri qaytarılmasını dərhal, özü də günaşırı tələb edirlər? Axı beynəlxalq insan haqları, konvensiyalar var və bütün bunlar birbaşa mühakimə olunanların lehinə olmayan faktlardır. Bir müddət sonra isə insanlar bir daha bu cür görüntü xarakterli qurum və təşkilatlara etimad edə bilməzlər. Amma fakt budur ki, biz burada bir daha ikili standartları görməkdəyik və bu ikili standartlar dünyaya, bütövlükdə, heç bir səmərə, tərəqqi bəxş edə bilməz. Bunun qarşısını elə özlərini aparıcı hesab edən Qərb dünyası, o cümlədən, “xristian klubu”na üzv dairələr almaqdadırlar. Azərbaycan təbii ki, bütün hüquqi və qanuni addımlarını atmaqda davam edəcək və dünyaya sübut edəcək ki, sizlər - bəlli dairələr, siyasi mərkəzlər beynəlxalq terrorun qarşısını almaq üçün əməli fəaliyyətə keçmirsinizsə, yalnız öz maraqlarınızı düşünməklə digər maraqları ayaqlarınız altına ataraq əzəcəksinizsə, biz müvafiq çərçivələrdə öz addımlarımızı atmağa davam edəcəyik. Bu qədər bəsit və sadə, həm də qətiyyətli olaraq” - deyə R.Rəsulov qeyd etdi.

İradə SARIYEVA

Son xəbərlər