Ermənistanın baş naziri vəzifəsini icra edən Nikol Paşinyan növbəti dəfə qəribə açıqlaması ilə gündəmə gəlib. Belə ki, Paşinyan növbədənkənar parlament seçkiləri öncəsi tərəfdarları ilə görüşündə Ermənistanda 2018-ci ildən, yəni onun hakimiyyətə gəlişindən sonra çox şeyin dəyişdiyini deyib.
O, buna baxmayaraq, son bir il ərzində ölkəsinin uğursuzluqla üzləşdiyini söyləyib, gülməli səslənsə də, bunu Tanrının Ermənistandan üz çevirməsi ilə əlaqələndirib: “Ermənistanda xalqın gücünü bərpa etməliyik. Çünki biz sizdən aldığımız gücü qaytardıq. Bu müddət ərzində bəzi qüvvələr hakimiyyəti ələ keçirmək istədilər. Amma, nəyin bahasına olursa-olsun, hakimiyyəti qoruduq. Ən çətin suallardan biri 2020-ci ildə niyə belə bir uğursuzluğa düçar olmağımızdır. Bunun üçün müxtəlif açıqlamalar ola bilər: siyasi, geosiyasi, iqtisadi, hərbi, mənəvi, psixoloji və s. Amma ağlıma belə bir fikir gəldi. Qəribə görünməsin, sadəcə, bunu sizinlə bölüşürəm. Deyirəm, bəlkə Tanrı 12-ci Məzmurdakı (Bibliyadan) kimi bizdən üz çevirdi”.
Yeri gəlmişkən onu da qeyd edək ki, bu, Paşinyanın ilk qəribə açıqlaması deyil. Bundan iki il əvvəl Nikol 2019-cu ildə Milli Təhlükəsizlik Xidmətinə müxalifətin şeytanla əlaqəsinin araşdırılması tapşırığı verib: “Zarafat etmirəm və tam ciddi şəkildə deyirəm ki, mən təhlükəsizlik xidmətinə müəyyən dairələrin şeytanla əlaqəsini araşdırmaq tapşırığı vermişəm. Budur, siz gülürsünüz, amma belə bir problem varsa, onda bunu aydınlaşdırmaq lazımdır. Bu, milli təhlükəsizlik məsələsidir”.
Bu cür yanaşma, faktiki olaraq, Paşinyanın psixi durumunun yerində olmadığını göstərir. Çünki ölkəyə rəhbərlik edən siyasi bir fiqurun baş verən müəyyən hadisələri mistika ilə əlaqələndirməsi dünyada normal qəbul olunmur.
O baxımdan, ekspertlər Paşinyanın məsələyə bu rakursdan yanaşmasını necə dəyərləndirirlər?
“Ona görə hakimiyyətdən ikiəlli yapışıb ki, müxalifət tərəfindən sərt cəzalandırılacağından qorxur”
Sözügedən məsələ ilə bağlı fikirlərini “Bakı-Xəbər”lə bölüşən AVCİYA-nın vitse-prezidenti, professor Məhərrəm Zülfüqarlı Paşinyanın bu cür açıqlama ilə çıxış etməsini bir sıra amillərlə əlaqələndirdi: “Bunun bir səbəbi onunla bağlıdır ki, Paşinyanın psixi durumu ilə bağlı Ermənistanda birmənalı fikir mövcud deyil. Bəzi məlumatlara görə, 30 il əvvəl buna görə Nikol Rusiyada müalicə olunub. Digər tərəfdən, o, seçki ərəfəsində bu cür fikirlər səsləndirməklə məğlubiyyətə görə özünə haqq qazandırmağa çalışır. Hansı ki, bu cür mövqedən çıxış etmək dövlət başçısına yaraşmır. Çünki siyasi uğursuzluqları din amili ilə əlaqələndirmək, ümumiyyətlə, real siyasətdə normal qəbul olunmur. Nəzərə almaq lazımdır ki, Ermənistan dünyəvi dövlətdir. Dini əsaslarla idarə olunan dövlət olsaydı, bəlkə də onun bu dediklərinə haqq qazandırmaq olardı. Başqa bir tərəfdən, onun belə açıqlama ilə çıxış etməsi həm də zəiflik əlamətidir. Zəif dövlət başçısı, zəif insanlar xalqdan dəstəyi, özünün gücü olmayanda bu cür sərsəm açıqlamalarla çıxış edirlər. Bu həm də Paşinyanın tükəndiyi anlama gəlir. Sadəcə, ona görə hakimiyyətdən ikiəlli yapışıb ki, müxalifət tərəfindən sərt cəzalandırılacağından qorxur. Çünki Ermənistandakı mövcud revanşistlər hakimiyyətə gəlsələr, fikrimcə Paşinyandan amansız qisas alacaqlar”.
Professorun fikrincə, proseslərin axını Ermənistanda vəziyyətin daha da gərginləşəcəyindən və seçkidən sonra ciddi toqquşmaların olacağından xəbər verir.
Vidadi ORDAHALLI
