Ermənistan minalar məsələsində “Sərhədsiz reportyorlar”ı da saymadı... - “əlaqə yaratsaq da...”

Yadigar Məmmədli: “Beynəlxalq təşkilatlar sərt və konkret mövqe sərgiləsələr, Ermənistan bu cür saymazyana münasibət göstərə bilməz”

img

“Sərhədsiz reportyorlar” təşkilatı Kəlbəcər rayonunda iki jurnalistin minaya düşərək həlak olması ilə bağlı bəyanat yayıb. Bəyanatda deyilir ki, İrəvan  azərbaycanlı jurnalistlərin ölümü ilə bağlı “Sərhədsiz reportyorlar”ın sorğusuna məhəl qoymur. Qeyd olunur ki, təşkilat Ermənistan hakimiyyəti ilə əlaqə yaratsa da, indiyədək bu ittihamlara cavab almayıb və ölkə  hakimiyyəti iki azərbaycanlı jurnalistin həlak olmasını şərh etməyib.

 

Bəyanatda qeyd olunub ki, jurnalistlər Dağlıq Qarabağdan kənarda və Ermənistanla sərhədin bir neçə kilometrliyində həlak olublar. AzTV - Azərbaycan Dövlət Televiziyasının operatoru Sirac Abışov və “AzərTAc” - Dövlət İnformasiya Agentliyinin müxbiri Məhərrəm İbrahimov reportaj hazırlamaq üçün Susuzluq kəndinə gediblər. Onların olduğu avtomobil tank əleyhinə minaya düşüb. Partlayış nəticəsində azərbaycanlı məmur da həlak olub və dörd nəfər yaralanıb: “Onlar 2020-ci ildə hərbi əməliyyatlar başa çatdıqdan sonra Azərbaycanın azad edilmiş ərazilərində, Dağlıq Qarabağın yaxınlığında, Azərbaycanın separatçı və ermənilərin yaşadığı bölgəsində öldürülən ilk jurnalistlərdir. Münaqişə zamanı ən azı yeddi jurnalist xəsarət alıb”.

Bu bir daha onu göstərir ki, Ermənistan üçün müqəddəs heç nə yoxdur. Qarşı tərəf kimi gəldi hədəfə alır və bütün bunlara görə məsuliyyət daşımır.

  • ...işğalçı tərəf öz məqsədlərindən əl çəkmək niyyətində deyil”

Məsələyə münasibət bildirən Demokratik Jurnalistlər Liqasının rəhbəri, media eksperti Yadigar Məmmədli Ermənistanın bu cür saymazyana mövqe sərgiləməsini bir sıra amillərlə əlaqələndirdi: “Bunun bir səbəbi onunla bağlıdır ki, Kəlbəcərdə baş verən məlum hadisə ilə bağlı bir sıra beynəlxalq qurumlar birmənalı mövqe sərgiləmirlər. Problem ondadır ki, konkret bir məsələyə birmənalı mövqe bildirmədilər. Bəzi qurumlar dedilər ki, işğal zonasında məlum hadisə baş verib. Digərləri dedilər ki, yox, burada şübhəli məqamlar var. Hansı şübhəli məqamlardan söhbət gedir? Noyabrın 25-də Kəlbəcər azad edilib. Ötən müddət ərzində orada bir sıra işlər görülüb. Həmin ərazilərdə artıq müəyyən quruculuq işləri aparılır. Bir neçə aydır media mənsubları ora ezam olunublar və mövcud vəziyyəti işıqlandırırlar. Özü də həmin yol işlək yoldur. Bu onu göstərir ki, məlum hadisə birbaşa ermənilərin təxribatıdır və onlar terrordan əl çəkmirlər. Beynəlxalq təşkilatlar sərt və konkret mövqe sərgiləsələr, Ermənistan tərəfi bu cür saymazyana münasibət göstərə bilməz. O baxımdan yaxşı olardı ki, “Sərhədsiz reportyorlar” daha sərt və aydın mövqe ortaya qoysun. Azərbaycanda hər hansı bir hadisə baş verəndə o dəqiqə “Sərhədsiz reportyorlar” sərt bəyanatla çıxış edir. Kəlbəcərdə 2 media təmsilçisi terrorun qurbanı olub. Ancaq biz bunun qarşılığında təşkilatın sərt mövqeyini görmürük. Yumşaq şəkildə Ermənistanın sorğuya cavab verməməsi tənqid olunur. Bu, ikili standartların bariz nümunəsidir. Ermənistanın məsələyə münasibət bildirməməsi həm də o deməkdir ki, onlar öz məqsədlərindən əl çəkmək niyyətində deyillər. Bənzər hadisələr təkrarlana bilər”.

Media eksperti bir daha qeyd etdi ki, bu kimi məsələlərdə beynəlxalq təşkilatlar konkret mövqe ortaya qoymalıdırlar.

Vidadi ORDAHALLI

Son xəbərlər