Növbədənkənar parlament seçkiləri ilə bağlı Ermənistanda başlanan təşviqat kampaniyası getdikcə daha maraqlı xarakter alır. Siyasi qüvvələr arasında kəskinləşən ittihamlar fonunda fikirlər səslənir ki, Ermənistandakı mövcud vəziyyətdə seçkilər birinci turda bitməsə, proseslərin gedişi xaosla nəticələnəcək.
Baş verənlərlə bağlı “Joxovurd” qəzeti də yazır ki, indiki vəziyyət bir ay da davam edərsə, iyunun 20-dən sonra gözlənilənləri təsəvvür etmək belə qorxuncdur: “Ermənistan bu gün sahibsiz bir vəziyyətdədir və mövcud hökumət bu şərtlərdə hər hansı bir addım atmaq əvəzinə təşviqat kampaniyası aparır. Ermənistan baş naziri vəzifəsini icra edən Nikol Paşinyan, bütün qubernatorlar məzuniyyətdədir və seçkidən başqa heç bir məsələ ilə məşğul olmurlar. Xarici İşlər Nazirliyimiz ümumiyyətlə yoxdur: nazir və bütün müavinləri istefa verib, onların yerinə də hər hansı təyinat yoxdur. İndi hamı Ermənistan ərazisində azərbaycanlıların da olmasını tamamilə unudub. Ermənistanın İnsan Hüquqları müdafiəçisi Arman Tatoyan olmasaydı, heç kim bunu xatırlamazdı”. Belə bir vaxtda Arman Tatoyan bəyanat verərək bildirib ki, ölkədə seçki kampaniyasının getdiyi atmosferdən çox narahatdır. Bəyanatında seçki kampaniyasındakı gərginliyə toxunan ombudsman bu cür atmosferin dərinləşməsinin cəmiyyətdə fikir ayrılığına, parçalanmaya, həmrəyliyin pozulmasına gətirib çıxardığını vurğulayıb: “Bu cür davam edə bilməz. Bütün siyasi qüvvələr təhqir, nifrət və zorakılıqla əlaqədar hər hansı bir ifadəni işlətməkdən çəkinməlidir.
Hazırda əsas gərginlik “Qarabağ klanı” və Nikol Paşinyan komandası arasında gedir. Paşinyanın bu fonda əsas hədəflərindən biri sabiq prezident Serj Sarkisyan olub. Belə ki, Paşinyan seçicilər qarşısında deyib ki, Azərbaycanda saxlanılan erməni diversantlar gərək bir-iki ay da dözsünlər: “Çünki indi onların qaytarılması üçün danışıqlar nəticə vermir və deməli, məsələ seçkilərdən sonraya qalacaq”. Paşinyan onların Bakı həbsxanasında “Ermənistanın müstəqilliyi və suverenliyi üçün mübarizə apardıqlarını” deyib. Bu deyilənlərə cavab olaraq Serj Sarkisyan Paşinyanı həyasız adlandırıb. Eləcə də Paşinyana təklif edib ki, oğlu Aşotu Azərbaycanda saxlanılan 20-25 erməni əsgərinə dəyişsin. Paşinyan isə çox keçmədən bu deyilənlərə cavab verib, Sarkisyanı sutenyor, insan alverçisi adlandırıb: “Sənə, uzun illərin rəsmi sutenyoruna və insan alveri üzrə mütəxəssisə deyirəm ki, mən buna razıyam. Oğlumu bütün əsirlərə dəyişməyə hazıram. Rəsmən deyirəm. Serjik və Robik, alqı-satqı üzrə mütəxəssislər olaraq sizə bu məsələ ilə bağlı danışıqlar aparmaq səlahiyyəti verirəm. Əgər bu işdən bir neçə min dollar qazansanız, lap yerinə düşər”. Paşinyan Sarkisyanı kazinolarda böyük miqdarda pullar uduzmaqda da ittiham edib. Serj Sarkisyan buna cavabında bildirib: “Bu əxlaqsız tipə 24 saat vaxt verirəm, ya faktları təqdim etsin, ya da onun və ailəsinin haqqında həqiqətləri dərc edəcəm. Bu həqiqətlərdən sonra cəmiyyət onun üzünə tüpürəcək. İllərdir yalan məlumatlar yayırlar. Prezident olduğumu nəzərə alaraq reaksiya verməyə ehtiyac duymadım. Ancaq Nikol Paşinyan boş-boş danışır. Baden-Badendə XIX əsrdən bəri kazino var. Lakin orada muzeylər kazinodan daha çoxdur. Nəinki mənim dostlarım, hətta yüzlərlə insan təsdiq edər ki, mən kazino olan küçədən həmişə uzaq gəzmişəm. Baden özü bir sənət və mədəniyyət şəhəridir. Monakoya gəlincə, mən son 15 ildə orada olmamışam, yoxlamaq asandır, yoxlasınlar … Yenə də onlara 24 saat vaxt verirəm”. Paşinyanla Robert Köçəryan arasında da gərgin söz dueli gedir. Köçəryanın tənqidlərinə və onu duelə çağırmasına cavab olaraq Paşinyan bildirib ki, birdən bu təklifə razı olar, silahı götürər və darağı onun alnına boşaldar: “Bundan sonra deyəcəklər ki, bu nə zorakılıqdır, qatillərdir?” Paşinyan Köçəryan barəsində dediyi ifadə ilə diqqət çəkib. Belə ki, o, Köçəryanı aşağılayıb: “Robik, sən balaca oğlan deyilsən, kişi də deyilsən”.
Köçəryan isə Ermənistanın siyasi rəhbərliyinin qabiliyyətsizliyi səbəbindən dövlət sisteminin iflasa uğradığını deyib. Onun sözlərinə görə, orada həqiqi mütəxəssislərdən ibarət bir komanda işləyirdi, amma bu gün bu qurumun başı qoparılıb: “Və biz bundan sonra hansısa danışıqlar prosesi haqqında danışırıq? Axı məhz Xarici İşlər Nazirliyi məhbuslarla əlaqəli, qayıdış üçün beynəlxalq reaksiya və rezonans yaradan məsələlərlə məşğul olmalıdır. Ancaq bu qurum mövcud deyil və indi kimin çalışacağı bəlli deyil”. Bu durumda Paşinyan “Qarabağ klanı”na dəstək verən məmurları da sərt tənqid edib. O bildirir ki, Ermənistanda parlament seçkilərindən sonra dövlət idarəetmə sistemində kadr təmizliyi aparılacaq: “İnqilabdan əvvəl, 2018-ci ildə kadr təmizliyinin olmayacağını demişdim. İndi isə deyirəm ki, kadr təmizliyi olacaq və bu, 2018-ci ildən sonra xalq hakimiyyətinin dəhlizlərində oturub “Troya atı” rolunu oynayan vəzifəli şəxslərə qarşı aparılacaq. Bizə kadrları təmizləmək üçün mandat verin və biz bütün “Troya atlarını” dövlət idarəsi sistemindən rədd edək”. O, həmçinin, vətəndaşları müəyyən siyasi aksiyalarda iştiraka məcbur edən yerli hökumət və müəssisə rəhbərlərinə qarşı da “siyasi vendetta” vəd edib: “Vətəndaş intiqamına, vətəndaş vendettasına, kadr təmizliyinə hazır olun”.
TahirTAĞIYEV
