Natiq Cəfərli: "Manatla depozit yatıran insanların əksəriyyəti sonradan həmin əmanəti dollara çevirib"
Kommersiya banklarının depozit portfelində dollarla ifadə olunan əmanətlərin məbləği yüksək olaraq qalır. Mərkəzi Bankın statistikasına əsasən, bu il yanvarın 1-nə qədər banklarda xarici valyutada qoyulan depozitlər 9 milyard 336 milyon manata yüksəlib. Belə ki, manatla olan depozitlərdə də 2016-cı ilin yekununda əvvəlki illə müqayisədə artım müşahidə olunub və 3 milyard 896 milyon manatdan 5 milyard 163 milyon manata yüksəlib.
Depozitlərdə manatın payının azalması barədə fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, manat depozitlərinin azalması milli valyutaya münasibəti və güvənsizliyi göstərir: "Çox güman ki, bir zamanlar manatla depozit yatıran insanların əksəriyyəti sonradan həmin əmanəti dollara çevirib. Bank çərçivəsində insanlar əllərində olan valyutanı konvertasiya edib. Bir qrup əmanət sahibləri banklarda olan əmanətini tam şəkildə çəkərək onu hansısa formada yatırıma çevirib. Əmanətçilər, demək olar ki, öz vəsaitini xarici valyutaya çevirib. Təəssüf ki, bu hal milli valyutamız olan manata güvənsizliyin göstəricisidir".
Həmsöhbətimizin sözlərinə görə, üç il öncə manatın dollar nisbətində baha olduğu dönəmdə əmanətlərin, demək olar ki, 80 faizi manatla qoyulurdu: "Manat əmanətlərinin artımı hər ay qeydə alınırdı. Son zamanlar isə manat əmanətlərində azalma sürətlənib. Hesabat dövründə açıqlanan rəqəmlər bir daha sübut edir ki, əhalinin manata etibarı çox aşağı səviyyədədir".
Günel CƏLİLOVA
