"Bələdiyyələrə səlahiyyət verməmiş onları birləşdirmək düzgün deyil"
Milli Məclisdə bələdiyyələrin sayının və tərkibinin azaldılması təklif edilib. Belə bir təkliflə Milli Məclisin İctimai birliklər və dini qurumlar komitəsinin sədri, hakim Yeni Azərbaycan Partiyasının (YAP) icra katibinin müavini Siyavuş Novruzov çıxış edib.
S.Novruzov bələdiyyələrlə bağlı illik məruzənin müzakirəsində çıxışı zamanı deyib ki, bələdiyyələrin sayı azaldılmalıdır: "Bakının bir rayonundan 19 bələdiyyə üzvü seçilir. Kiçik bir kənddə 5-7 nəfər üzv olur. Bu bələdiyyələri birləşdirmək lazımdır".
Deputat qeyd edib ki, bələdiyyələrə kifayət qədər status verilib: "Bələdiyyələr verilən səlahiyyətlərlə xeyli iş görə bilər. İndi də gec deyil. Onlar əldə edilən gəlirlərdən bələdiyyə bağçası, məktəbi, qəbiristanlığı və s. salmaq əvəzinə vəsaiti başqa istiqamətə xərcləyirlər. Düşünürlər ki, ola bilər, növbəti mərhələdə seçilməzlər, ona görə nə varsa, xərcləyirlər. Vaxtilə bələdiyyələr qeyri-neft sektoru üçün böyük işlər görə bilərdilər. Əsasən də buraya kənd bələdiyyələri daxildir. Əfsuslar olsun ki, əldə olunan vəsaitlərin hamısını mebelə, maşınlara və əməkhaqlarına sərf ediblər".
Bələdiyyələrin sayının və tərkibinin azaldılması ilə bağlı fikir bildirən ekspert Samir Əliyev "Bakı-Xəbər"ə açıqlamasında qeyd etdi ki, bələdiyyələrin birləşdirilməsi ilə bağlı bir neçə il öncə təklif irəli sürüb və uzun müddət bunun təbliğatı ilə məşğul olub: "Hətta 2009-cu ildə hökumət bizim təklifimiz əsasında bir neçə bələdiyyəni birləşdirdi. O vaxt 2757 bələdiyyə var idi və birləşdiriləndən sonra onların sayı 1718-ə salındı. 2014-cü ildə isə kiçik birləşmə baş verdi. Təxminən 110 bələdiyyə birləşərək sayı 1608-ə çatdı. Hazırda 1608 bələdiyyə var. Bu gün də düşünürük ki, hazırda bələdiyyələrin sayının azaldılmasına ehtiyac var. Ancaq zənnimcə, aktual məsələ deyil. Bələdiyyələr birləşdirilməzdən öncə onlara səlahiyyət verilməlidir ki, onların maliyyə imkanı artsın. Xatırladım ki, bir neçə il öncə bələdiyyələri birləşdirən zaman onların vəziyyəti yaxşılığa doğru getmədi. Maddi vəziyyəti yaxşı olan bələdiyyə ilə sosial durumu ağır olan bələdiyyə birləşdirildi. Nəticədə durumu yaxşı olan bələdiyyənin vəziyyəti pisləşdi. Yəni onun problemini öz üzərinə götürərək vəziyyətini ağırlaşdırdı. Bələdiyyələrə səlahiyyət verməmiş onları birləşdirmək düzgün deyil".
Günel CƏLİLOVA
