"Nəqliyyat 50-60 il qabaqkı kimi fəaliyyət göstərmir"
Ölkə başçısı Azərbaycan Respublikasının Nəqliyyat, Rabitə və Yüksək Texnologiyalar Nazirliyinin yaradılması haqqında sərəncam imzalayıb.
Azərbaycan Respublikası Konstitusiyasının 109-cu maddəsinin 7-ci bəndini rəhbər tutan dövlət başçısı, Azərbaycan Respublikasında dövlət idarəetmə strukturunu təkmilləşdirmək, habelə nəqliyyat, rabitə və yüksək texnologiyalar sahələrində dövlət siyasətini və tənzimlənməsini müasir dövrün tələblərinə uyğunlaşdırmaq və səmərəliliyi artırmaq məqsədilə bu qərara gəlib. Prezident iki nazirliyin birləşdirilərək yeni yaradılmasına sərəncam verdiyi Nəqliyyat, Rabitə və Yüksək Texnologiyalar Nazirliyinə rəhbər də təyin edib. Onun digər sərəncamı ilə yeni nazir vəzifəsi bunadək rabitə və yüksək texnologiyalar naziri olan Ramin Quluzadəyə həvalə edilib.
R.Quluzadə 2015-ci ilin axırlarında rabitə və yüksək texnologiyalar nazirinin birinci müavini, 2016-cı ilin yanvarında isə nazir təyin edilmişdi. O əvvəllər Heydər Əliyev Fondunda İşlər Departamentinin direktoru olub.
İki böyük nazirliyin birləşdirilməsi ətrafında geniş müzakirələr davam edir. Maraqlıdır, dünya praktikasında rabitə və nəqliyyat sahəsini birgə kurasiya edən qurum nümunəsi varmı?
Nəqliyyat sahəsi üzrə ekspert Ərşad Hüseynovun sözlərinə görə, belə təcrübə bir çox ölkələrdə var: "Nəqliyyat Nazirliyinin ləğv edilərək Rabitə və Yüksək Texnologiyalar Nazirliyinə birləşdirilməsi təcrübəsi bir sıra ölkələrdə mövcuddur. İki nazirliyin birləşdirilməsi zamanın tələbidir. Müasir dövrdə söhbət artıq logistikadan gedir. Nəqliyyat 50-60 il qabaqkı kimi fəaliyyət göstərmir. Bu işdə müasir texnologiyalar əsasında informasiya dəstəyi və yüksək rabitə təminatı, son texnologiyalı nəzarət (müxtəlif xarakterli naviqasiya sistemləri və s.) olmasa, normal idarəetmədən və fəaliyyətdən söhbət gedə bilməz. Bu iki nazirliyin birləşdirilməsi icra hakimiyyəti qurumunun işini xeyli dərəcədə sadələşdirir. Görünür, nəqliyyat sahəsində illərdən bəri yığılıb qalan problemlərin real həlli üçün belə təşkilati-hüquqi variant daha məqbul sayılıb. Ümid edək ki, nəhayət, problemlərin həqiqi həllini də görəcəyik. Həmçinin qeyd etməliyəm ki, dünyanın hər bir qitəsində nəqliyyat və rabitə sektorunun eyni orqan tərəfindən idarə edilməsi təcrübəsi olan dövlətlər (Türkiyə, Avstriya, Norveç, Finlandiya, Peru, Çili, Oman, Qətər, Myanma) var".
Məhəmmədəli QƏRİBLİ
