Vüqar Bayramov: "Yanvarda bazara çıxarılan kənd təsərrüfatı məhsullarının həcmi azalır və bu da qiymətlərin artmasına öz təsirini göstərir"
Bu ilin yanvar ayında Azərbaycanda istehlak məhsulları və xidmətlərin qiymətləri 2016-cı ilin yanvar ayına nisbətən 11,9 % artıb. Dövlət Statistika Komitəsinin verdiyi xəbərə görə, o cümlədən ərzaq məhsullarının qiymətlərində 14,5 %, qeyri-ərzaq məhsullarının qiymətlərində 12,3 %, əhaliyə göstərilən ödənişli xidmətlərin qiymətlərində 8,0 % artım qeydə alınıb.
Cari ilin yanvar ayında 2016-cı ilin dekabr ayına nisbətən istehlak məhsullarının və xidmətlərin qiymətləri 2,3 %, o cümlədən ərzaq məhsullarının qiymətləri 2,8 %, qeyri-ərzaq məhsullarının qiymətləri 2,0 %, əhaliyə göstərilən ödənişli xidmətlərin qiymətləri isə 1,9 % artıb.
Ay ərzində düyü, un, qarabaşaq yarması, makaron, kolbasa məmulatları, mal, qoyun və toyuq əti, balıq, süd məhsulları, pendir və yumurta, kərə və bitki yağları, şəkər və şəkər tozu, qəhvə, çay və kakao, alma, armud, heyva, nar, portağal, naringi, banan, kələm, göyərti, pomidor, xiyar, kartof, soğan, sarımsaq, yerkökü, çuğundurun qiymətlərində bahalaşma müşahidə olunub. Digər ərzaq məhsullarının qiymətlərində ciddi dəyişikliklər baş verməyib.
Qeyd edək ki, Azərbaycanda 2016-cı ildə istehlak məhsulları və xidmətlərin qiymətləri 2015-ci ilə nisbətən 12,4 %, o cümlədən ərzaq məhsullarının qiymətləri 14,7 %, qeyri-ərzaq məhsullarının qiymətləri 16,7 %, əhaliyə göstərilən ödənişli xidmətlərin qiymətləri 5,8 % artıb.
Ötən ilin dekabr ayında noyabra nisbətən istehlak məhsulları və xidmətlərin qiymətləri 3,0 %, o cümlədən ərzaq məhsullarının qiymətləri 4,1 %, qeyri-ərzaq məhsullarının qiymətləri 2,2 %, əhaliyə göstərilən ödənişli xidmətlərin qiymətləri isə 2,4 % yüksəlib.
Ümumilikdə, ekspertlər illik inflyasiyanın həcmini necə dəyərləndirir? Məsələyə münasibət bildirən iqtisadçı-ekspert Vüqar Bayramov buna bir neçə prizmadan yanaşdı: "Statistika Komitəsinin verdiyi məlumat ondan xəbər verir ki, qiymət artımları müşahidə edilir. Söhbət yanvar ayında qeydə alınan qiymət artımlarından gedir. Bu da onu göstərir ki, illik inflyasiya birrəqəmli deyil, ikirəqəmlidir. Bu il qarşıya birrəqəmli inflyasiya göstəricisinə nail olmaq məqsədi qoyulub. O baxımdan güman olunur ki, Azərbaycan hökuməti 2017-ci ildə birrəqəmli inflyasiyaya nail olmaqla bağlı fəaliyyətini gücləndirməyə çalışacaq. Bu ilin yanvarında xüsusən də kənd təsərrüfatı məhsullarının qiymətinin artması müəyyən qədər obyektiv amillərlə bağlıdır. Çünki burada digər məqam ondan ibarətdir ki, bu dövrdə bazara çıxarılan kənd təsərrüfatı məhsullarının həcmi azalır. Bu da, nəticə etibarilə, qiymətlərin artmasına öz təsirini göstərir. Ona görə də düşünürəm ki, yanvar ayının yekunları 2017-ci ildə birrəqəmli inflyasiyanın saxlanması ilə bağlı məsələni gündəmə gətirir. O üzdən, hökumət çalışmalıdır ki, birrəqəmli inflyasiyaya nail olsun".
Vidadi ORDAHALLI
