Eyyub Hüseynov: "Qida Təhlükəsizliyi Agentliyinin yaradılması ilə ölkənin qida sektorunda yaşanan problemlər tədricən aradan qaldırılacaq"
Rəşad Həsənov: "Qida Təhlükəsizliyi Agentliyinin işi düzgün qurularsa, hazırda prioritet sahə hesab olunan kənd təsərrüfatının inkişafına da müsbət təsir göstərə bilər"
Xəbər verildiyi kimi, Prezident İlham Əliyev ölkədə qida təhlükəsizliyi sisteminin təkmilləşdirilməsi ilə bağlı əlavə tədbirlər haqqında fərman imzalayıb.
Fərmanda bildirilir ki, Azərbaycanda qida məhsullarının təhlükəsizliyinə dair normativ tənzimləməni (sanitariya normaları və qaydalarının, habelə gigiyena normativlərinin hazırlanmasını və təsdiqini), risqlərin təhlilini, qanunla müəyyən edilmiş qaydada gigiyenik sertifikatlaşdırma işinin aparılmasını, o cümlədən xarici ölkələrə ixrac edilən qida məhsullarına keyfiyyət sertifikatının verilməsini, habelə qida məhsulları istehlakçılarının hüquqlarının müdafiəsi sahəsində və "tarladan süfrəyədək" prinsipi əsasında məhsulun daşıdığı risq səviyyəsinə uyğun olaraq qida məhsulları istehsalının bütün mərhələlərində dövlət nəzarətinin həyata keçirilməsini təmin etmək məqsədilə Azərbaycanın Qida Təhlükəsizliyi Agentliyi yaradılacaq.
Məsələ barədə fikir bildirən Azad İstehlakçılar Birliyinin (AİB) rəhbəri Eyyub Hüseynov "Bakı-Xəbər"ə açıqlamasında qeyd etdi ki, Qida Təhlükəsizliyi Agentliyinin yaradılması ilə ölkənin qida sektorunda yaşanan problemlər tədricən aradan qaldırılacaq.
Onun sözlərinə görə, Qida Təhlükəsizliyi Agentliyi İşçi Qrupunun rəhbəri Əli Əhmədova məktub yazıb. Məktubda Prezidentin imzaladığı fərmanın çox əhəmiyyətli olduğunu qeyd edib: "4 il öncə beynəlxalq təşkilatlar qida təhlükəsizliyinə dair qanun layihəsi hazırlamışdı. Həmin qanun layihəsi hökumətə göstərildi".
Ekspert hesab edir ki, agentliyin fəaliyyəti sayəsində aptek və ya hansısa dükan qarşısında yaşanan növbələrin sayı azalacaq. İnsanların orta ömrü yaxın 10 il ərzində uzanacaq.
İqtisadçı-ekspert Rəşad Həsənovun sözlərinə görə, ərzaq təhlükəsizliyi məsələləri haqqında fərman gözlənilən idi: "Agentliyin yaradılmasında məqsəd bu istiqamətdə mövcud nəzarətin, eyni zamanda problemlərin həlli istiqamətində görüləcək işlərin vahid idarəetmə altında birləşdirilməsidir".
İqtisadçının fikrincə, Qida Təhlükəsizliyi Agentliyinin işi düzgün qurularsa, hazırda prioritet sahə hesab olunan kənd təsərrüfatının inkişafına da müsbət təsir göstərə bilər: "Ancaq, ümumilikdə, kənd təsərrüfatı müqayisəli üstünlüyə malik sahələrdən biri hesab olunur və ixracda müəyyən paya malikdir. Bəllidir ki, sahibkarlar bu istiqamətdə müəyyən problemlərlə üzləşir. Xüsusilə də dünya bazarının tələblərinə uyğun keyfiyyətli məhsul istehsal edilməsi, sertifikatların alınması, keyfiyyət standartlarının əldə olunması və ixrac əlaqələrinin qurulması məsələlərində problemlərlə üzləşirlər. Yeni yaradılan qurumun vəzifələrindən biri də Azərbaycanda standartların beynəlxalq standartlara uyğunlaşdırılmasını təmin etməkdir. Bu reallaşarsa, gələcəkdə Azərbaycan dövlət qurumları tərəfindən verilmiş keyfiyyət sertifikatı dünya tərəfindən də qəbul edilə bilər. Dövlət bununla bağlı işlər aparmalıdır. Çünki bu günə qədər sertifikatlar satılıb. Bu, Azərbaycanla əməkdaşlıq edən ölkələrə də məlumdur. Məlum olmasa belə, ilkin olaraq hər hansı müayinələrdə üzə çıxır ki, bu məhsullar əslində sertifikatda göstərilən tələblərə cavab vermir. Bu da son nəticədə ölkənin ixracına mənfi təsir göstərir. Bu mənada yeni qurum ilk növbədə reputasiyasının müsbətə doğru dəyişməsinə çalışmalıdır".
Günel CƏLİLOVA
