Xəyal Məmmədxanlı: "... gərək qanunvericiliyə müəyyən dəyişiklik edilsin"
Azərbaycanda ənənəvi sığorta sahələrindən fərqli yeni sığorta formaları tətbiq edilə bilər. Bu barədə fins.az-a sığorta bazarından məlumat verilib. Yeni sığorta formasının tətbiqi dedikdə söhbət cığorta yardımlaşma fondlarından gedir.
Ekspert Xəyal Məmmədxanlı "Bakı-Xəbər"ə açıqlamasında qeyd etdi ki, belə bir fond ilk dəfə XVII əsrdə İngiltərədə yaradılıb: "XVII əsrdə insanlar müəyyən yanğın risqlərindən xilas olmaq üçün özləri üçün fond yaradırdılar. Hətta bu fonda "yanğın ortaqlığı" da deyilirdi. 15-20 nəfər əmlak sahibi özləri həmin fonda pul qoyub şirkətlərini yaradaraq, həm özlərini qoruyurdular, həm də qazanc olardısa, onu öz aralarında bölürdülər. Sığorta Yardımlaşma Fondu daha sonra 1752-ci ildə ABŞ-da yaradılıb. Hətta bəzi ölkələrdə Sığorta Yardımlaşma Fondunun xüsusi assosiasiyaları da var. Bu təcrübənin ömrü əsrlərə dayanır".
Həmsöhbətimiz hesab edir ki, Sığorta Yardımlaşma Fondu Azərbaycanda yeni yaradılacaq. Ekspertin fikrincə, belə bir fond xüsusi bir tələblə geniş inkişaf etməyəcək. Bu yalnız o halda mümkün ola bilər ki, insanlar sığortanın əhəmiyyətini ciddi şəkildə anlasın: "Eyni zamanda, başqalarının risqlərini paylaşmaq barədə məsuliyyət hiss etməlidirlər. Təəssüf ki, bu kriteriyadan yanaşılanda, Azərbaycanda sığortaya inam o dərəcədə inkişaf etməyib".
X.Məmmədxanlı onu da əlavə etdi ki, Azərbaycanda adıçəkilən fond yaradılmazdan öncə qanunvericilikdə müəyyən dəyişiklik olunmalıdır: "Sığorta fəaliyyəti haqqında" Qanunda sığortanın bu forması nəzərə alınmayıb. Bizdə yalnız sığortanın səhmdar cəmiyyət forması nəzərə alınır. Yardımlaşma Fondu Mülki Məcəllədə "ortaqlıq" təşkilatı hüquqi formasına daha çox uyğun gəlir. Sığorta Yardımlaşma Fondunun yaradılması üçün gərək qanunvericiliyə müəyyən dəyişiklik edilsin".
Günel CƏLİLOVA
