"Daşınmaz əmlak bazarında yaşanan aktivlik mənzillərin qiymətinə qısa müddət ərzində təsir edə bilməz"
İctimaiyyət dolların qiymət artımını gözləsə də, son günlər ABŞ valyutasının qiyməti sürətlə ucuzlaşdı. Bu isə, öz növbəsində, ümidini dollara bağlayıb gəlirini artırmaq istəyənlərə böyük zərbə oldu.
Məlumatlara görə, qarşıdakı günlərdə paytaxtda mənzillərin qiyməti iki dəfəyə yaxın enəcək. Ehtimallara görə, qiyməti təxminən 100 min manat civarında olan mənzillər 50-60 min manat həddində qərarlaşacaq. Xüsusən bu bahalaşma paytaxtın Xətai, Nizami, Suraxanı, Sabunçu və Yasamal rayonlarında qeydə alınacaq.
Əsasən yeni və köhnə tikili binalarda mənzillərin qiymətinin ucuzlaşacağı bildirilir.
Ekspertlər mənzillərin ucuzlaşacağını iki əsas amillə əlaqələndirir: "Buna dolların ciddi şəkildə ucuzlaşması və ipoteka kreditləri ilə bağlı qaydaların sərtləşməsi səbəb olacaq".
Daşınmaz əmlak məsələləri üzrə ekspert Nüsrət İbrahimov "Bakı-Xəbər"ə açıqlamasında qeyd etdi ki, yaxın müddət ərzində mənzillərin satış qiymətində dəyişiklik gözlənilmir. Manatın möhkəmlənməsi daşınmaz əmlakın qiymətinə təsir edə bilməz: "Hələ bilinmir ki, məzənnədə yaşanan məlum dəyişiklik nə qədər davam edəcək. Müvəqqəti olacaq və ya birdəfəlik manat əvvəlki vəziyyətinə qayıdacaq. O üzdən bu hal daşınmaz əmlakın qiymətinə təsir edə bilməz".
Ekspert Hesab edir ki, manatın məzənnəsinin dollara nisbətən dəyişməsi daşınmaz əmlak bazarında aktivliyə səbəb ola bilər: "Əlində dolları olan şəxslər çalışacaq ki, yatırım etmək üçün mənzil sahibi olsun. Əmlak almaq üçün müraciət edənlərin sayı arta bilər. Ancaq bu aktivlik qiymət dəyişikliyinə təsir edə bilməz".
Müsahibimizin sözlərinə görə, daşınmaz əmlak bazarında qiymət dəyişikliyi tez bir zamanda baş vermir: "Bu uzun zaman tələb edir. 7-8 ay ərzində daşınmaz əmlak bazarında yaşanan aktivlik qiymətə öz təsirini göstərir".
Günel CƏLİLOVA
