Aydın Hüseynov: "İndiyədək istiqraz sahibi olanların yenidən qiymətli kağızlar əldə etməyə maraq göstərməsi tələbatla bağlıdır"
SOCAR istiqrazlarının təkrar bazarında marketmeyker fəaliyyətini həyata keçirən "PSG Capital" şirkəti yanvar ayının nəticələrini açıqlayıb. Şirkətin yaydığı məlumata əsasən, istiqrazlara yalnız yeni müştərilərin marağı artmayıb. İndiyədək istiqraz sahibi olanlar da yenidən qiymətli kağızlar əldə etməyə başlayıb.
SOCAR istiqrazlarının dövriyyəyə buraxılmasından keçən 3 ay ərzində hər iki istiqrazdan biri təkrar bazarda alınıb-satılıb. Belə ki, bu müddətdə SOCAR istiqrazları üzrə təkrar bazarda 50 milyon dollardan çox alqı-satqı həyata keçirilib.
Təkcə yanvar ayında 16,5 milyon dollarlıq SOCAR istiqrazlarının alqı-satqısı üzrə 82 əqd bağlanıb. "PSG Kapital İnvestisiya Şirkəti"nin məlumatına görə, istiqraz alanların 72 faizini yeni müştərilər təşkil edib. 28 faiz insanlar isə artıq istiqrazı olanlardır.
Məsələ ilə bağlı fikir bildirən Milli Məclisin Aqrar siyasət komitəsinin üzvü, millət vəkili Aydın Hüseynov "Bakı-Xəbər"ə açıqlamasında qeyd etdi ki, SOCAR istiqrazları buraxarkən bunun məhdud sayda olduğunu və müəyyən müddət ərzində tədavüldə olduğunu etiraf etmişdi: "O müddət ərzində kim istiqraz almışdısa, ilkin qiymətlə istiqraza sahib olmuşdu. Sonrakı mərhələdə isə istiqrazların satışı ilkin qiymətdə olduğu kimi olmadı. Bunun səbəbi isə təkrar satışda qiymətin yüksək olmasıdır. Tələbat artırsa, bunun qiyməti artmalıdır".
Millət vəkilinin sözlərinə görə, SOCAR istiqrazlarının satışının artması sevindiricidir. SOCAR istiqrazlarının satışının yüksək olması buna ehtiyacın olmasının göstəricisidir: "Vətəndaşlar öz vəsaitlərini həmin istiqrazlarda yatırtmağa daha çox üstünlük verir".
A.Hüseynov qeyd etdi ki, SOCAR istiqrazlarının təkrar satışı müsbət bir haldır: "İndiyədək istiqraz sahibi olanların yenidən qiymətli kağızlar əldə etməyə maraq göstərməsi tələbatla bağlıdır. Tələb təklifi üstələyərsə, bu, qiymətdə özünü göstərir. Bu təbii bir haldır".
Günel CƏLİLOVA
