Rəsul Cahangirli: "Artıq ölkədə qeyri-neft sektorunun inkişaf etdirilməsi ilə əlaqədar islahatlar həyata keçirilir"
"Bazarda qiymətlərin müəyyən artımı hiss olunur, biz bunu etiraf edirik". Bunu mətbuata açıqlamasında baş nazirin müavini Əli Əhmədov deyib.
Ə.Əhmədovun sözlərinə görə, hökumət tərəfindən qiymətlərin daha sürətlə artmaması üçün vacib olan tədbirlər görülür: "Güman etmirəm ki, qiymətlərin indiki artım səviyyəsində onun Azərbaycanda yoxsulluq səviyyəsinə təsir etməsi haqqında həyəcan təbili çalmaq üçün əsaslar yaranıb. Mən bu fikirdən kənardayam. Amma hökumətin bu gün həyata keçirdiyi bütün işlərin qarşısında duran məqsəd ondan ibarətdir ki, Azərbaycanda qiymətlərin artımının qarşısı mümkün qədər alınsın və bu, insanların həyat, yaşayış səviyyəsinə ciddi şəkildə təsir etməsin. Bu istiqamətdə də geniş proqram hazırlanır".
Hər halda, müşahidələr də göstərir ki, hökumət mümkün olan qədər qiymət artımının qarşısını almağa səy göstərir. Ancaq elə məsələlər var ki, bu, hökumətdən asılı deyil. Dünya iqtisadiyyatında müşahidə olunan böhran bütün ölkələrə, o cümlədən Azərbaycana da öz təsirini göstərir.
Ümumilikdə, qiymət artımının qarşısını almaq üçün hazırlanan geniş proqramın mahiyyəti nədən ibarət ola bilər?
Məsələyə münasibət bildirən ekspert Rəsul Cahangirlinin sözlərinə görə, burada söhbət daxili istehsalın artırılmasından gedə bilər: "Müşahidə olunan qiymət artımının qarşısını ancaq daxili istehsalı artırmaqla almaq olar. Belə ki, bu istiqamətdə işlər gedir. Artıq ölkədə qeyri-neft sektorunun inkişaf etdirilməsi ilə əlaqədar islahatlar həyata keçirilir. Bununla bağlı son bir ildə xeyli iş görülüb. Nəzərə almaq lazımdır ki, qiymət artımının kökündə duran başlıca faktor dünya bazarında neftin ucuzlaşmasıdırsa, digəri bir sıra məhsulların xaricdən idxal olunması ilə əlaqədardır. Ona görə də yalnız yerli istehsalı artırmaqla, qiymət artımının qarşısını əsaslı şəkildə almaq olar. Hesab edirəm ki, söhbət bundan gedir".
Vidadi ORDAHALLI
