Rəşad Həsənov: "Maliyyə ombudsmanı müstəqil fəaliyyət göstərəcəyi halda istehlakçıların hüquqlarını daha çevik və effektli şəkildə qoruya bilərdi"
Vüqar Bayramov: "Maliyyə ombudsmanı təsisatının ABA-nın nəzdində yaradılması onun müstəqilliyinə xələl gətirməyəcək"
Məlum olduğu kimi, Azərbaycanda maliyyə ombudsmanı Azərbaycan Banklar Assosiasiyasının nəzdində fəaliyyət göstərəcək. ABA 2017-ci ilin aprelinədək maliyyə ombudsmanının reqlamentini təsdiq etməyi planlaşdırır.
Bu barədə assosiasiyanın icraçı direktoru Yunus Abdulov media nümayəndələrinə açıqlamasında deyib. O qeyd edib ki, fevralın 3-də ABA üzvlərinin ümumi iclasında maliyyə ombudsmanının nizamnaməsi təsdiq edilib: "Yaxın iki ay ərzində reqlament üzərində işləri başa çatdırmağı planlaşdırırıq. Reqlament təsdiq olunduqdan sonra ombudsman işə başlaya bilər".
Maraqlıdır, ABA-nın nəzdində fəaliyyət göstərməsi maliyyə ombudsmanının işinə necə təsir edəcək?
İqtisadçıların mövzu ilə bağlı fikirləri fərqli oldu.
İqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, beynəlxalq təcrübəyə nəzər salsaq, eyni modeli müşahidə etmək olar: "Əsas məsələ hər hansı bir tərəfin tərəf kimi üstünlüklərinin təmin olunması deyil, hansısa formada tərəflər üçün hüquqların izah olunması və məhkəmələrə daşınan proseslərin qarşısını almaqdır. İqtisadi anlaşılmazlığın müəyyən qədər sayını azaltmaq məqsədi daşıyır. Bank sektorunda yaşanan problemlərin sayının artması danılmazdır. Məhz bu səbəbdən maliyyə ombudsmanının bankların fəaliyyət göstərdiyi sferada olması bu istiqamətdə müəyyən nəticəyə səbəb ola bilər. Təbii ki, maliyyə ombudsmanı müstəqil fəaliyyət göstərəcəyi halda istehlakçıların hüquqlarını daha çevik və effektli şəkildə qoruya bilərdi".
İqtisadçı-ekspert Vüqar Bayramov qəzetimizə açıqlamasında bildirdi ki, maliyyə ombudsmanı müstəqil qurum olaraq maliyyə sektorunda yaşanan şikayətlərin qəbul olunması və onlara baxılması kimi işləri icra edəcək. Əsasən bank sektorunda yaşanan çətinliklərin həllinə uyğun olaraq qərarlar verəcək: "Ombudsmanın fəaliyyətinin əhəmiyyəti ondan ibarətdir ki, biznesmen və biznes arasında yaranan problemlərin məhkəməyə getmədən həllinə imkan yaradacaq. Nəzərinizə çatdırım ki, Banklar Assosiasiyası müstəqil qurumdur. Maliyyə ombudsmanı təsisatının ABA-nın nəzdində yaradılması onun müstəqilliyinə xələl gətirməyəcək. Sadəcə, texniki baxımdan ombudsmanın assosiasiyanın nəzdində yaradılması məqsədəuyğun hesab oluna bilər. Maliyyə ombudsmanının texniki imkanı vacibdir. Maliyyə ombudsmanının assosiasiyanın nəzdində yaradılması onun texniki imkanları ilə bağlıdır".
Günel CƏLİLOVA
