Zakir Əhmədov: "Güman ki, belə hallara yol verən bankların sayı çoxdur"
Azərbaycan Əmanətlərin Sığortalanması Fondu (ADİF) ləğvedici olaraq lisenziyaları geri alınmış və müvafiq məhkəmə qərarları əsasında müflis elan edilmiş bankların idarəetməsini həyata keçirməyə başladıqdan bir müddət sonra müəyyən işlərdə rəhbər vəzifələrdə işləmiş şəxslərin cinayət əməlləri törətdiklərini aşkar edib.
Bu barədə ADİF-in açıqlamasında bildirilib. Məlumatda deyilir ki, ləğvetmə prosesində olan bir sıra banklar lisenziyaları ləğv edilənə qədər fəaliyyət göstərən zaman rəhbər vəzifələrdə işləmiş bəzi şəxslər vəzifə saxtakarlığı, vəzifə səlahiyyətlərini aşma, mənimsəmə, dələduzluq ediblər. Belə ki, həmin şəxslər bankın müştərilərini onlara məxsus əmlaklarını sataraq əldə olunmuş vəsaiti kredit borcunun bağlanmasına yönəltməyib və ya satışdan əldə olunmuş vəsaitin çox cüzi hissəsini yönəldib, bununla da həmin müştəriləri pis vəziyyətdə qoyub, banka gəlib kredit almayan şəxslərin adlarına çoxlu sayda saxta imza ilə kredit rəsmiləşdirib, bir çox işdə zamin duraraq banklardan müəyyən miqdarda vəsait çıxarıb və bununla da banklara külli miqdarda zərər vurublar.
Bununla əlaqədar müvafiq materiallar toplanıb və Baş Prokuror yanında Korrupsiyaya Qarşı Mübarizə Baş İdarəsinə göndərilib.
Məsələyə münasibət bildirən ekspert Zakir Əhmədovun sözlərinə görə, bununla bağlı araşdırmalar davam etdirilməlidir: "Ümumən təqdirəlayiq haldır ki, bununla bağlı araşdırmalar müvafiq dövlət orqanlarına göndərilib. Çünki bəzi bank təmsilçilərinin yaranan vəziyyətdən istifadə edib saxtakarlıqlara əl atması faktiki olaraq cinayət əməlidir. Çünki həqiqətən də belə banklar müştərilərin başına oyun açıb. Məsələ ondadır ki, bankdan kredit götürən müştəri bunu ödəmədiyi üçün girov qoyduğu əmlak satışa çıxarılıb. Ancaq əmlakın qiyməti ya düzgün qiymətləndirilməyib, ya da satışdan əldə olunan vəsaitin bir hissəsi gizlədilib. Təbii ki, bunu yalnız həmin bankların rəhbər şəxsləri edə bilərdi. Sıravi işçinin bu cür saxtakarlıqlara yol verməsi real görünmür. Ölkədə problemli kreditlərin həcminin artması səbəblərindən biri də bax bu kimi neqativ halların baş verməsidir. Güman ki, belə hallara yol verən bankların sayı çoxdur. O üzdən bu istiqamətdə araşdırmalar daha da genişləndirilməli və günahkarlar cəzalandırılmalıdır".
Vidadi ORDAHALLI
