"Maliyyə ombudsmanının hüquqi statusu bank və ya müştəri arasında problemlər yaşanarsa, onları yoluna qoymaqdır"
Azərbaycanda maliyyə ombudsmanının yaradılması istiqamətində daha bir addım atılıb. Bu barədə Azərbaycan Banklar Assosiasiyasının (ABA) icraçı direktoru Yunus Abdulov media nümayəndələrinə açıqlamasında məlumat verib. Onun sözlərinə görə, ombudsmanın əsasnaməsi təsdiq edilib. Bununla bağlı qərar ABA-nın sonuncu ümumi yığıncağında qəbul edilib.
Növbəti mərhələdə ombudsmanın reqlamentinin təsdiq edilməsi nəzərdə tutulur ki, bu məsələnin təxminən 2 aydan sonra reallaşacağı gözlənir. Yalnız bundan sonra maliyyə ombudsmanı banklarla müştərilər arasında mübahisələrə baxa biləcək.
Xatırladaq ki, maliyyə sektorunda ombudsmanın yaradılması ideyası ABA-ya məxsusdur. Məqsəd müştərilərin banklara etimadının gücləndirilməsi və tərəflər arasında yaranan mübahisələrin məhkəməsiz həll edilməsidir.
Maliyyə ombudsmanının 2 min ABŞ dollarına qədər olan mübahisələrə baxması nəzərdə tutulub. Bununla belə, yalnız o banklardan ombudsmana şikayət etmək mümkün olacaq ki, onlar "Bankların müştəriləri - fiziki şəxslərlə əlaqədar mübahisələrin baxılmaq üçün bank ombudsmanına verilməsi haqqında Bəyannamə"ni imzalamış olsunlar.
Bundan başqa, maliyyə ombudsmanı mübahisəni mahiyyəti üzrə həll edən qüvvəyə minmiş məhkəmə aktı mövcud olduqda, mübahisəyə bir dəfə baxdıqda, ona dair barışdırıcı sazişi təsdiq etdikdə və ya mübahisəni mahiyyəti üzrə həll edən qərar verdikdə, qaldırılan məsələnin baş verməsindən və iddia olunan hüquq pozuntusundan iki ildən artıq vaxt keçdikdə, məsələ ümumi bank işinə, bankların xidmət çeşidinə və siyasətinə aid olduqda, məsələyə müvafiq qanunvericiliyə uyğun olaraq cinayət tərkibi olduqda, məsələyə aid iş qiymətləndirmə mərhələsində və iş üzrə müqavilə, razılaşma imzalanmamış olduqda, eləcə də iş bankın qiymət siyasətinə aid olduqda, şikayət edilən maliyyə təşkilatının lisenziyası geri çağırıldıqda və ya bu maliyyə təşkilatı ləğv olunduqda, hüquqi səlahiyyəti olmayan və ya qismən hüquq səlahiyyəti olan şəxs tərəfindən müraciət edildikdə ərizəyə baxmaqdan imtina edə bilər.
Bank məsələləri üzrə ekspert Əkrəm Həsənov "Bakı-Xəbər"ə açıqlamasında qeyd etdi ki, maliyyə ombudsmanı ölkəyə lazım olan bir qurumdur. Bu institut tək bank məsələləri üzrə deyil, eyni zamanda, istənilən sektorda istehlakçıların maliyyə məsələləri üzrə hüquqlarının təmin olunmasında yardımçı ola bilər: "Maliyyə ombudsmanının hüquqi statusu bank və ya müştəri arasında problemlər yaşanarsa, onları yoluna qoymaqdır.
Maliyyə ombudsmanının yaradılması təklifini ilk dəfə irəli sürənlərdən biri mənəm. Hələ ötən ilin mart ayında ölkə başçısı İlham Əliyevə məktub ünvanlamışam".
Həmsöhbətimiz təklif edir ki, maliyyə ombudsmanı tam bir müstəqil institut olsun.
Günel CƏLİLOVA
