Vüqar Bayramov: "Maliyyə Bazarlarına Nəzarət Palatası və Mərkəzi Bank kreditləşmədə regional disbalansın aradan qaldırılması üçün real addımlar atmalıdır"
Bakı ilə rayonlar arasında həm kredit məbləği, həm də faiz dərəcəsi üzrə ciddi fərq var. Mərkəzi Bankın məlumatına əsasən, 16,27 milyard manatlıq ümumi kredit portfelinin 13,79 milyard manatı Bakının payına düşür. Bu isə o deməkdir ki, ümumi kreditləşmənin 85 faizi Bakıda həyata keçirilir. Yəni hər verilən 100 manatlıq kreditin 85 manatı Bakının, qalan 15 manatı isə, Abşeron daxil olmaqla, digər rayonların payına düşür.
Paytaxt Bakı ilə rayonlar arasında qeydə alınan disbalansın aradan qaldırılması üçün konkret hansı addımlar atılmalıdır?
İqtisadçı-eskpert Vüqar Bayramov hesab edir ki, məsələ heç də rayonlarda kredit portfelinin azlığı ilə tamamlanmır: "Belə ki, Bakıda orta kredit faizi 9,2 faiz olduğu halda, əksər rayonlarda kredit faizləri 20 faizdən başlayır. Azərbaycanda ən baha kreditlər Aran iqtisadi rayonunda təklif edilir. Deməli, Mingəçevir, Şirvan, Ağcabədi, Ağdaş, Beyləqan, Bərdə, Biləsuvar, Göyçay, Hacıqabul, İmişli, Kürdəmir, Neftçala, Saatlı, Sabirabad, Salyan, Ucar, Yevlax və Zərdab ən yüksək faizli kredit götürən rayonlardır. Sözügedən iqtisadi rayonda kreditlər üzrə orta faiz 22,6 faizdir. Cənub bölgəmiz bahalı kreditlərin faizinə görə Aran iqtisadi rayonuna cüzi "uduzur". Belə ki, Lənkəran iqtisadi rayonunda orta kredit faizi 22,4 faizdir. Şəki-Zaqatala sakinləri isə orta hesabla 22,0 faizlə kredit götürür".
Ekspertin sözlərinə görə, kreditləşmədəki bu anormallığın aradan qaldırılması üçün tədbirlər görülməlidir: "Deməli, rayonda yaşayan vətəndaşımız Bakı sakinlərinə nisbətən bankdan orta hesabla 2,5 dəfə çox faizlə kredit götürmək məcburiyyətində qalır. Aparılan tədqiqatlar göstərir ki, istehlak kreditləri üzrə orta faiz Mərkəzi Bankın rəsmi orta kredit faizlərindən daha çoxdur. Belə ki, rəsmi statistikada Bakı və rayonlar üzrə orta kredit faizlərinin nisbətən az olması portfelə ipoteka, biznes, güzəştli kreditlər üzrə faiz dərəcələrinin də daxil edilməsi ilə bağlıdır. Rəsmi rəqəmlərin təhlili göstərir ki, Maliyyə Bazarlarına Nəzarət Palatası və Mərkəzi Bank kreditləşmədə regional disbalansın aradan qaldırılması üçün real addımlar atmalıdır".
Günel CƏLİLOVA
