İlham Şaban: "Qiymət dünya bazarında bir qədər yüksəlib"
Xəbər verildiyi kimi, Neft İxrac Edən Ölkələr Təşkilatına (OPEC) üzv olan və kartelə daxil olmayan ölkələrin 10 dekabr 2016-cı il tarixində Vyanada neft hasilatının azaldılması ilə bağlı əldə etdiyi razılaşmaya uyğun olaraq, Azərbaycan cari ilin yanvar ayı ərzində gündəlik neft hasilatı ilə bağlı məlumatları Birgə Monitorinq Komitəsinin Birgə Texniki Komissiyasına təqdim edib.
Yanvarın 22-də Vyanada Küveyt, Rusiya, Əlcəzair, Venesuela və Omandan ibarət hasilatın azaldılmasına nəzarət komitəsinin iclasında OPEC və qeyri-OPEC dövlətlərinin götürdükləri öhdəliklərin icrasına nəzarət məqsədilə Birgə Texniki Komissiya yaradılıb. Tələb olunan göstəricilər üzrə məlumatlar hazırlanaraq Komissiyaya göndərilib. Beləliklə, 11 ölkənin 2017-ci il yanvarın 1-dən gündəlik neft hasilatını 558 min barrel azaltması barədə əldə olunmuş razılaşma çərçivəsində Azərbaycan hasilatı sutkada 35 min barrel azaltmaqla bağlı götürdüyü öhdəliyi tam yerinə yetirib.
Aparılan təhlillər də göstərir ki, mövcud qərar neft qiymətinin artmasına və sabitləşməsinə müsbət təsir göstərib. Azərbaycanın hasilat həcmi ilə bağlı öhdəliyinə əməl etməsi ölkədə neft hasilatı ilə bağlı aparılan təhlillərin və verilən proqnozların dəqiqliyini sübut etməklə yanaşı, həm də dünya bazarında neftin qiymətinin sabitləşməsi üçün zəruri tədbirlərin görülməsində nə dərəcədə maraqlı və qətiyyətli olmasını da təsdiqləyir.
Onu da qeyd edək ki, Azərbaycan neft bazarında tarazlığın bərpası məqsədilə ilkin vaxtlardan OPEC-in təşəbbüslərini dəstəkləyib.
Maraqlıdır, bəs ekspertlər Azərbaycanın neft hasilatı ilə bağlı öhdəliyə əməl etməsinin qiymətin artmasında rolunu necə dəyərləndirir?
Məsələyə münasibət bildirən Neft Araşdırmaları Mərkəzinin rəhbəri İlham Şabanın fikrincə, hasilatın azaldılmasının Azərbaycan üçün müsbət tərəfləri var: "Neftin qiyməti dünya bazarında bir qədər yüksəlib. İlin ilk gününə neftin qiyməti 56 dollarla başlayıb və indiyədək 58 dollaradək bahalaşıb. Bu çox yaşı qiymətdir. Nəzərə alsaq ki, ötən il yanvar ayında, il başlayanda dünya bazarında neftin bir barrelinin qiyməti 40 dollardan aşağı idi. Yanvar ayının sonunda isə artıq neftin qiyməti 27 dollar idi. Faktiki olaraq, neftin qiymətində iki dəfəyə yaxın artım var. Bu baxımdan da Azərbaycan neftinin həcmi aşağı düşsə də, qiymətin artması onu kompensasiya edir və gələn gəlir azalmır. Azərbaycan dekabrın 10-da bu öhdəliyə imza atıb və orada 6 ay ərzində hasilatın 35 min barrel azalması göstərilib".
Vidadi ORDAHALLI
