"Əvvəlki dövrlərdə banklar müxtəlif bəhanələr gətirərək naxçıvanlılara ipoteka krediti vermirdi"
Xəbər verildiyi kimi, Naxçıvanda İpoteka Fondu yaradılıb. Məlumat üçün bildirək ki, "Naxçıvan İpoteka Fondu" ASC "bir pəncərə" sistemi vasitəsilə dövlət qeydiyyatından keçib.
Bu barədə "Vergilər" qəzetinin yaydığı məlumatda qeyd olunub. Fondun nizamnamə kapitalı 500 min manat təşkil edir. ASC-nin rəsmi nümayəndəsi Yalçın Vəliyevdir.
İpoteka Fondu Naxçıvan şəhəri, Cəlil Məmmədquluzadə küçəsi 32 ünvanında yerləşəcək.
Naxçıvanda İpoteka Fondunun yaradılmasına münasibət bildirən iqtisadçı-ekspert Oqtay Haqverdiyev "Bakı-Xəbər"ə açıqlamasında bunları qeyd etdi: "Naxçıvan Muxtar Respublika olduğu üçün orada İpoteka Fondunun yaradılması düzgün qərardır. İpoteka Fondunun yaradılması Naxçıvan əhalisi üçün yaxşı qərardır. Çünki onlar daşınmaz əmlaka sahib olmaq üçün Bakıya üz tutmayacaq".
Həmsöhbətimizin sözlərinə görə, hazırkı şərtlər daxilində Naxçıvanda yaşayan vətəndaşların ipoteka kreditlərinə çıxış imkanı məhdud idi: "Naxçıvanda İpoteka Fondunun yaradılması o bölgədə yaşayanların imkanlarını daha da genişləndirdi və onların vəziyyətini daha da yaxşılaşdırdı. Əvvəlki dövrlərdə banklar müxtəlif bəhanələr gətirərək naxçıvanlılara ipoteka krediti vermirdi. Bu günə qədər dövlət vəsaiti hesabına regionlara cəmi 192 ipoteka krediti verilib. Bu ipoteka kreditləri də ölkə üzrə verilən kreditlərin 1 faizi həcmindədir. Bu isə onu deməyə əsas verir ki, ipoteka kreditlərinə çıxış imkanlarının artırılması bu sahədə problemlərin aradan qaldırılmasına təkan verəcək. Paytaxtla regionlarda yaşayanlar arasında bərabər, ədalətli paylaşım istiqamətində müsbət addımdır".
Ekspertin sözlərinə görə, ipoteka siyasətinin dəyişdirilməsində əsas məqsədlərdən biri regionların ipoteka prosesində iştirakının təmin olunmasıdır: "Əvvəlki dövrlərdə verilən ipoteka kreditlərinin təxminən 90 faizi məhz Bakı şəhəri və Abşeron rayonunun payına düşüb. Bu isə, əslində, ipoteka kreditlərinə əlçatanlığın məhdud olmasına və diskriminasiyaya səbəb olan amillərdən biridir".
Günel CƏLİLOVA
