Bahadur Bilalov: "Prezidentin sərəncamı bölgələrdə 2 və 3 ulduzlu hostellərin sayının artmasına səbəb olacaq"
Bakıətrafı qəsəbələr və Abşeron rayonu, Sumqayıt və Gəncə şəhərləri istisna olmaqla, Azərbaycanın digər şəhər və rayonlarında minimum 1 milyon manat investisiya qoymaqla mehmanxana, minimum 500 min manat investisiya qoymaqla əyləncə xidməti obyektləri, minimum 100 min manat investisiya qoymaqla iaşə xidməti obyektləri tikəcək fiziki və hüquqi şəxslər investisiya təşviqi sənədi ala biləcək.
Bu, Azərbaycan Prezidenti İlham Əliyevin imzaladığı "İnvestisiyanın həyata keçirildiyi iqtisadi fəaliyyət sahələri, investisiya layihəsinin həcmi ilə bağlı minimal məbləğ və həyata keçiriləcəyi inzibati ərazi vahidləri"nin təsdiq edilməsi haqqında" Azərbaycan Respublikası Prezidentinin 2016-cı il 20 aprel tarixli, 878 nömrəli Fərmanında dəyişikliklər edilməsi barədə" Fərmanında əksini tapıb.
Bakı şəhəri, Bakıətrafı qəsəbələr və Abşeron rayonu istisna olmaqla, minimum 100 min manat investisiya qoymaqla hostel, minimum 2 milyon manat investisiya qoymaqla 2 və 3 ulduzlu yerləşdirmə vasitələri tikəcək fiziki və hüquqi şəxslər də investisiya təşviqi sənədi ala biləcək. Bu halda, Sumqayıt və Gəncə şəhərləri istisna olmaqla, digər şəhər və rayonlarda bu obyektlər turizm və rekreasiya zonalarına daxil olmayan ərazilərdə tikildiyi halda investisiya təşviqi sənədi veriləcək.
Qeyd edək ki, investisiya təşviqi sənədi almış fərdi sahibkar həmin sənədi aldığı andan əldə etdiyi gəlirin, hüquqi şəxsin həmin sənədi aldığı andan əldə etdiyi mənfəətin 50 faizi 7 il müddətinə gəlir vergisindən azad edilir. İnvestisiya təşviqi sənədini almış hüquqi şəxs və fərdi sahibkar həmin sənədi aldığı andan müvafiq əmlakına görə 7 il müddətinə əmlak vergisi və torpaq vergisini ödəməkdən azaddır.
Regionlarda tikiləcək mehmanxana və ya hostellərə güzəştli verginin tətbiq olunması turizmin inkişafına təsir edəcək.
Turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, bu qərar turizmin inkişafına səbəb olacaq: "Turizm ekspertləri və özüm daxil olmaqla, dəfələrlə bölgələrdə tikilən və ya tikiləcək mehmanxanalara güzəştli verginin tətbiq olunmasını təklif etmişdik. Türkiyə təcrübəsinə nəzər salsaq görərik ki, həmin ölkədə tikilən bütün otellər 5 il müddətində vergidən azad olunur. Biz də deyirdik ki, turizmin inkişafı naminə otellərə güzəştli vergi tətbiq etmək lazımdır. Sevindirici haldır ki, ölkə başçısı fevralın 1-də belə bir fərman imzaladı. Güzəştli vergi, Bakı, Gəncə, Sümqayıt və Abşeron istisna olmaqla, digər regionlar üçün nəzərdə tutulub. Bəllidir ki, bu gün Bakıda kifayət qədər mehmanxana tikilib və istifadəyə verilib. Əslində, regional turizmi inkişaf etdirmək lazımdır. Bu baxımdan Prezidentin fərmanı bölgələrdə 2 və 3 ulduzlu hostellərin sayının artmasına səbəb olacaq. Nəticədə turizmin inkişafı sürətlənəcək və bölgələrə səfər edən turistlərin sayı artacaq".
Günel CƏLİLOVA
