Maaş və pensiya kartlarından 18 faiz ƏDV tutulması məsələsinə deputatdan sonra ekspert baxışı...
Rəsul Cahangirli: "Hesab edirəm ki, qanunvericilikdə buna dəyişiklik edilməlidir"
"Bu gün Azərbaycanda kənarda maaş, pensiya kartı ilə hər hansı məhsul alınan zaman Azərbaycan bankları tərəfindən elektron ticarət sayılaraq 18 faiz əlavə dəyər vergisi tətbiq edilir. Bu, gələcəkdə problemlərə yol açacaq".
Bunu Milli Məclisin plenar iclasında millət vəkili Musa Quliyev deyib. Millət vəkili problemin aradan qaldırılması üçün qanunvericiliyə dəyişiklik təklif edib: "Yaxud Maliyyə Bazarlarına Nəzarət Palatası müvafiq normativ aktlara lazımi dəyişikliklər etməlidir ki, insanlar bu problemlə rastlaşmasın".
O da məlumdur ki, bir neçə ildir pensiyaçıların plastik kartlarının imkanları genişlənir. Təqaüdçülərin çoxunun yalnız pul çıxarmaq üçün istifadə etdiyi bu kartlarla indi alış-veriş də etmək mümkündür.
2017-ci il yanvarın 1-dən Azərbaycanın vergi qanunvericiliyində elektron ticarətin də vergiyə cəlb olunmasını nəzərdə tutan yeni dəyişikliklər qüvvəyə minib. Bu yeniliklərə görə, hər sifariş ediləcək malın dəyərinin 18 %-i ƏDV kimi tutulacaq.
Vergi Məcəlləsinin 168.1.5-ci, 169.1-ci və 169.3-cü maddələrinə edilən əlavə və dəyişikliklər virtual məkanda ƏDV-nin tətbiqini tənzimləyir.
Azərbaycan Respublikasının hüdudlarından kənarda otel xidmətlərinin və aviabiletlərin sifarişi üzrə xidmətlər istisna olmaqla, bu məkanda iş və xidmət təqdim edildikdə və ya lotereya, digər yarış və müsabiqə keçirildikdə vergi tutulan əməliyyatın yeri kimi xidmətlərin alıcısının və lotereya, yarış və müsabiqənin iştirakçısının olduğu yer müəyyən olunur və həmin dövlətdə də ƏDV tətbiq olunur.
Ümumilikdə, maaş, pensiya kartı ilə hər hansı məhsul alınan zaman banklar tərəfindən 18 faizlik ƏDV-nin tətbiqinə ekspertlər necə baxır?
Məsələyə münasibət bildirən ekspert Rəsul Cahangirli də hesab edir ki, belə hallar sosial baxımdan yolverilməzdir: "Hansısa pensiyaçı kartı ilə məhsul alırsa, bankların bundan ƏDV tutması doğru yanaşma deyil. İlk növbədə ona görə ki, bu onların sosial vəziyyətinə mənfi təsir edir. Nəzərə alsaq ki, təqaüdçülərin aldıqları pensiyaların məbləği o qədər də böyük deyil, o zaman bunun onlara tətbiq olunması məsləhət deyil. Bəzən banklar belə hallardan sui-istifadə edir. Bu, həqiqətən də gələcəkdə müəyyən sosial narazılıqların yaranmasına yol aça bilər. O baxımdan hesab edirəm ki, qanunvericilikdə buna dəyişiklik edilməlidir. Yəni maaş və pensiya kartı ilə məhsul alanlardan 18 faizlik ƏDV tutulmamalıdır".
Vidadi ORDAHALLI
