Zakir Əhmədov: "Hesab edirəm ki, əlverişli şərtləri olan kreditlərə önəm verilməlidir"
Məlum olduğu kitmi, Avropa Yenidənqurma və İnkişaf Bankı (AYİB) 2017-ci ildə Azərbaycan üçün əsas prioritetlərini açıqlayıb. Burada bir sıra məsələlər öz əksini tapıb.
AYİB-in Bakı ofisinin rəhbəri İvana Duartenin sözlərinə görə, qurum ölkədə maliyyə sektorunda vəziyyətin yaxşılaşdırılması istiqamətində də fəaliyyət göstərəcək:
"Əlavə səylər ölkənin maliyyə sektorunda vəziyyətin yaxşılaşdırılması, xüsusilə biznes mühitinin sabitləşdirilməsi məqsədilə kreditləşmə sahəsində etimadın artırılması üçün atılacaq. AYİB, həmçinin, biznes mühitinin yaxşılaşdırılmasına yönələn struktur islahatlarının həyata keçirilməsi sahəsində hökumətlə işləməyi davam etdirəcək".
Azərbaycan Cənubi Qafqazda AYİB-in ən iri benefisiarı sayılır. Azərbaycan MDB məkanında və Şərqi Avropa regionunda bankın ən iri kredit götürənlərindən biridir. Bununla yanaşı, AYİB Azərbaycana manatla kredit verməyi də nəzərdən keçirir. Hələ ötən il AYİB bəyan etmişdi ki, onlar Azərbaycanda layihələrin həyata keçirilməsinə ayrılan kreditləri manata konvertasiya etməyi planlaşdırır. Belə olan halda, manatla kreditlərin təklif olunmasına ekspertlər necə baxır? Məsələyə münasibət bildirən ekspert Zakir Əhmədovun fikrincə, prinsipcə, buna müsbət yanaşmaq olar: "Ancaq baxmaq lazımdır ki, manatla təklif olunan kreditlərin şərtləri nə dərəcədə sərfəlidir. Hesab edirəm ki, bu amilə xüsusi fikir vermək lazımdır. AYİB bundan əvvəl Azərbaycana verdiyi kreditləri manatla konvertasiya etməkdə maraqlıdırsa, o zaman həmin bankdan manatla kredit almaq olar. Təbii ki, faiz və digər şərtlər əlverişli olarsa. Azərbaycan 1992-ci ildən AYİB ilə əməkdaşlıq edir. Bir sıra layihələrin həyata keçirilməsində bank yaxından iştirak edir. Məlum olduğu kimi, dünya bazarında neftin qiymətinin düşməsi Azərbaycanın valyuta gəlirlərinə mənfi təsir göstərib. Əvvəlki illərlə müqayisədə valyuta gəlirləri xeyli azalıb. Bu səbəbdən bir sıra layihələri həyata keçirmək üçün xarici kredit təşkilatlarından kredit götürmək zərurəti yaranıb. Bütün bunlara rəğmən, hesab edirəm ki, əlverişli şərtləri olan kreditlərə önəm verilməlidir". Vidadi ORDAHALLI
