Vüqar Bayramov: "Qətər inkişaf etmiş körfəz ölkələrindən biridir"
Qətərin xarici işlər naziri Şeyx Məhəmməd bin Əbdürrəhman Al-Tani Azərbaycan xarici işlər naziri Elmar Məmmədyarovla görüşündən sonra keçirilən mətbuat konfransında deyib ki, "Azərbaycanın üzləşdiyi problemlərlə əlaqədar öz dəstəyimizi ifadə edirik".
O bildirib ki, Qətər-Azərbaycan hökumətlərarası komissiyasının nəzərdə tutulan iclasında iqtisadi əlaqələrin inkişafı müzakirə ediləcək: "İnvestisiyaların təşviqi üçün fondların yaradılması fikri müzakirə olunur. Biz inanırıq ki, mədəniyyət sahəsindəki əməkdaşlıq da əlaqələri gücləndirəcək. Hətta ilin bu fəslində Qətər vətəndaşları Azərbaycana səfər edir. Tələbə mübadiləsi məsələsinə də toxunduq".
Birgə investisiya fondunun prioritetləri, onun ölçüsü və iştirakçıların payları hələlik məlum deyil. Amma məlumdur ki, bu mövzu bundan əvvəl Azərbaycanın iqtisadiyyat naziri Şahin Mustafayev və Qətərin Bakıdakı səfiri Yusif bin Həsən əl-Sai arasında müzakirə olunub. Neft gəlirlərinin azaldığı bir zamanda ölkəyə xarici investisiyanın cəlb edilməsinə böyük ehtiyac var. Bu mənada ərəb ölkələrindən kapital axınının reallaşması məqsədəuyğun hesab edilir. Nəzərə alsaq ki, milyarder ərəb şeyxlərinin də Azərbaycana marağı böyükdür. Ərəblər kapital qoyuluşu üçün münasib ölkə axtarırlar. Neft-qaz sənayesindən əldə olunan gəlirlər sayəsində Qətər müasir, yaxşı inkişaf etmiş iqtisadi infrastruktur və adambaşına düşən gəlir səviyyəsi baxımından Qərbi Avropadan geri qalmayan zəngin bir ölkəyə çevrilib.
Bütün bu deyilənlərin fonunda Azərbaycan-Qətər investisiya fondlarının yaradılmasınının əhəmiyyətini ekspertlər necə dəyərləndirir? Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert Vüqar Bayramov prinsipcə buna müsbət prizmadan yanaşdı: "Qətər inkişaf etmiş körfəz ölkələrindən biridir. Adambaşına düşən ÜDM-yə görə dünyada ilk yerlərdən birini tutur. O baxımdan, Qətərin Azərbaycan üçün investisiya imkanları böyükdür. İki ölkə arasında investisiya fondunun yaradılması sərmayələrin cəlb edilməsi baxımından vacibdir. Bu imkan verəcək ki, Qətərdən gələn sərmayə hesabına iqtisadi sektor inkişaf etsin. Düşünürəm ki, digər körfəz ölkələri ilə də əməkdaşlığın inkişaf etdirilməsi vacibdir. Çünki onlar bir tərəfdən Azərbaycan üçün yeni tərəfdaşdılar. Digər tərəfdən, həmin ölkələrin sərmayə imkanları genişdir. O üzdən, bundan istifadə edilməsi olduqca vacibdir. Eyni zamanda, turizm potensialı baxımından da bu sərfəlidir. Ona görə də iqtisadiyyatın çox fərqli sektorları üzrə Qətər-Azərbaycan arasında münasibətlərin inkişafı və əməkdaşlıq perspektivləri var. Bu baxımdan belə bir fondun yaradılması, nəticədə tərəflərin bu təşəbbüsdən faydalanmasına gətirib çıxara bilər".
Vidadi ORDAHALLI
