Zakir Əhmədov: "CQD ilə bağlı nə qədər beynəlxalq maliyyə qurumlarının təklifləri çox olsa, bu..."
İslam İnkişaf Bankı (İİB) "Cənub Qaz Dəhlizi" layihəsinin maliyyələşdirilməsində iştirak etməyə hazırdır. Bunu mətbuata açıqlamasında İİB-nin vitse-prezidenti Sayed Ağa deyib.
Onun sözlərinə görə, bu istiqamətdə müzakirələr hələ davam edir: "Bir sıra texniki məsələlər tədqiq olunur. Bu məsələlər həll olunan kimi İİB bu layihədə Azərbaycanın tərəfdaşı olacaq".
Vitse-prezident qeyd edib ki, tək enerji resurslarının ixracı deyil, həm də onlardan səmərəli istifadə böyük əhəmiyyətə malikdir. Onun fikrincə, məhz bu istiqamətdə effektivliyin təmin olunması nəticəsində qənaət əldə oluna bilər.
Qeyd edək ki, "Cənub Qaz Dəhlizi" 10 milyard kubmetr Azərbaycan qazının Xəzər regionundan Gürcüstan və Türkiyə ərazisindən keçməklə Avropaya nəqlini nəzərdə tutur. İlkin mərhələdə Azərbaycanın "Şahdəniz" qaz-kondensat yatağının işlənməsinin ikinci fazası çərçivəsində hasil olunan qaz "Cənub Qaz Dəhlizi" layihəsi üçün əsas mənbə kimi baxılır. Sonrakı mərhələdə digər mənbələr qoşula bilər. Cənubi Qafqaz qaz kəmərinin genişləndirilməsi, TANAP və TAP boru kəmərlərinin tikintisi yolu ilə qaz yatağının işlənməsinin ikinci mərhələsi çərçivəsində qaz Türkiyəyə və Avropa bazarlarına ixrac ediləcək.
Məsələyə münasibət bildirən ekspert Zakir Əhmədovun sözlərinə görə, İİB-nin belə bir təkliflə çıxış etməsi təsadüfü deyil: "Məsələ ondadır ki, sözügedən bank təmsilçiləri "Cənub Qaz Dəhlizi" layihəsinin perspektivli olmasının fərqindədilər. Ona görə də layihənin maliyyələşdirilməsində iştirak etməkdə bu və ya digər formada maraqlıdılar. Görürlər ki, bura qoyulan vəsaiti bir neçə ildən sonra götürə biləcəklər. Hesab edirəm ki, onların bu təklifi və maliyyələşmə ilə bağlı şərtləri dəyərləndirilməlidir. Digər tərəfdən, CQD ilə bağlı nə qədər beynəlxalq maliyyə qurumlarının təklifləri çox olsa, bu bir o qədər seçim etməyə yaxşı imkanlar yaradır. Yəni hansı maliyyə qurumu sərfəli şərtlərlə maliyələşmə təklif edirsə, ona üstünlük verilməlidir. Ümumən görünən odur ki, bir sıra parametrlərə görə, İİB daha sərfəli şərtlərlə qaz xəttinin tikilməsinə maliyyə ayıra bilər. O baxımdan buna müsbət yanaşıram. Bütün bunlar qaz xəttinin daha tez başa gəlməsinə yardım edə bilər".
Vidadi ORDAHALLI
