Ənvər Fərəcov: "Bu, İrandan Azərbaycana daha çox turistin gəlməsi baxımından sərfəlidir"
Novruz bayramından sonra Azərbaycan və İran arasında aviareyslərin sayının artacağı gözlənilir. Bunu jurnalistlərə İranın Azərbaycandakı səfiri Cavad Cahangirzadə bildirib.
C.Cahangirzadə qeyd edib ki, İranın "Mahan Air" aviaşirkətinin dünən Tehran-Bakı marşrutu üzrə ilk reysini həyata keçirməsi ilə iki ölkə arasında həftə ərzində icra edilən areyslərin sayı 14 çatıb. Aviaşirkətin ilk reysi ilə Azərbaycana 35 nəfər gəlib.
Səfir bildirib ki, ötən il Novruz bayramında İrandan Azərbaycana gələn turistlərin sayında 30 dəfə artım qeydə alınmışdı: "Bu il Novruz bayramından sonra turistlərin sayının daha da artacağını gözləyirik. "Mahan Air" şirkəti də bu işə öz töhfəsini verəcək. Bununla, azərbaycanlı turistlərin İrana çıxışı da asanlaşacaq".
Diplomat əlavə edib ki, Azərbaycan və İran arasında turizmin inkişafı investorların da bu sahəyə cəlb edilməsinə imkan verəcək. Məlumata görə, reyslər çərşənbə və şənbə günləri daxil olmaqla, həftədə 2 dəfə, mart ayından başlayaraq isə cümə günü də daxil olmaqla, həftədə 3 dəfə həyata keçiriləcək. Qeyd edək ki, hazırda İranın "ATA" aviaşirkəti Tehran-Bakı reyslərini həyata keçirir.
Bütövlükdə Bakı ilə Tehran arasında belə birbaşa avyareyin fəaliyyətə başlamasına ekspertlər necə yanaşır? Məsələyə münasibət bildirən ekspert Ənvər Fərəcovun fikrincə, bunun bir sıra faydası olacaq: "Tehrana gediş-gəliş daha da rahat olacaq. O cümlədən, Tehrandan Bakıya gəlmək sərfəli olacaq. İki ölkənin paytaxtları arasında birbaşa təyyara reyslərinin fəaliyyət göstərməsi turizm, ticarət və mədəni əlaqələrin genişlənməsi baxımından əhəmiyyətlidir. Bu, İrandan Azərbaycana daha çox turistin gəlməsi baxımından sərfəlidir. Nəzərə alsaq ki, İrandan Azərbğaycana gələn turistlərin sayı ilbəil artır, bundan sonra daha da arta bilər". Vidadi ORDAHALLI
